ਮੋਨੋਕ੍ਰੋਮ ਆਊਟਫਿਟ ਔਰਤਾਂ ਨੂੰ ਦੇ ਰਹੇ ਸਟਾਈਲਿਸ਼ ਲੁੱਕ

ਵੈੱਬ ਡੈਸਕ- ਅੱਜਕੱਲ੍ਹ ਦੀਆਂ ਮੁਟਿਆਰਾਂ ਅਤੇ ਔਰਤਾਂ ਨੂੰ ਅਜਿਹੇ ਆਊਟਫਿਟਸ ਪਸੰਦ ਹਨ, ਜੋ ਉਨ੍ਹਾਂ ਨੂੰ ਸਟਾਈਲਿਸ਼ ਅਤੇ ਭੀੜ ਤੋਂ ਵੱਖ ਦਿਖਾਉਣ। ਇਸੇ ਵਜ੍ਹਾ ਕਰ ਕੇ ਬਾਜ਼ਾਰ ’ਚ ਤਰ੍ਹਾਂ-ਤਰ੍ਹਾਂ ਦੇ ਰੰਗਾਂ, ਡਿਜ਼ਾਈਨ ਅਤੇ ਪੈਟਰਨ ਦੀਆਂ ਡਰੈੱਸਾਂ ਦੇਖਣ ਨੂੰ ਮਿਲਦੀਆਂ ਹਨ। ਇਨ੍ਹਾਂ ਹੀ ਟ੍ਰੈਂਡਾਂ ’ਚ ਸਭ ਤੋਂ ਉੱਪਰ ਨਾਂ ਆਉਂਦਾ ਹੈ ਮੋਨੋਕ੍ਰੋਮ ਆਊਟਫਿਟਸ ਦਾ। ਮੋਨੋਕ੍ਰੋਮ ਆਊਟਫਿਟਸ ਦਾ ਫੈਸ਼ਨ ਕਦੇ ਆਊਟ ਨਹੀਂ ਹੁੰਦਾ। ਇਹ ਹਰ ਸੀਜ਼ਨ, ਹਰ ਮੌਕੇ ’ਤੇ ਟ੍ਰੈਂਡ ’ਚ ਰਹਿੰਦੇ ਹਨ ਅਤੇ ਪਹਿਨਣ ਵਾਲੀ ਨੂੰ ਇਕ ਆਰਗੈਨਿਕ ਅਤੇ ਕਲਾਸੀ ਲੁੱਕ ਦਿੰਦੇ ਹਨ। ਇਹੋ ਕਾਰਨ ਹੈ ਕਿ ਸਿਰਫ ਕਾਲਜ ਜਾਣ ਵਾਲੀਆਂ ਮੁਟਿਆਰਾਂ ਹੀ ਨਹੀਂ, ਸਗੋਂ ਕੰਮਕਾਜੀ ਔਰਤਾਂ ਵੀ ਇਨ੍ਹਾਂ ਦੀਆਂ ਦੀਵਾਨੀਆਂ ਹਨ।

ਵਿਆਹ, ਪਾਰਟੀ, ਆਫਿਸ ਮੀਟਿੰਗ ਤੋਂ ਲੈ ਕੇ ਸ਼ਾਪਿੰਗ ਅਤੇ ਆਊਟਿੰਗ ਤੱਕ ਹਰ ਜਗ੍ਹਾ ਮੋਨੋਕ੍ਰੋਮ ਆਊਟਫਿਟਸ ’ਚ ਔਰਤਾਂ ਆਸਾਨੀ ਨਾਲ ਦੇਖੀਆਂ ਜਾ ਸਕਦੀਆਂ ਹਨ। ਮੋਨੋਕ੍ਰੋਮ ਦਾ ਮਤਲਬ ਹੈ ‘ਇਕ ਰੰਗ’ ਜਾਂ ‘ਦੋ ਕੰਟਰਾਸਟ ਰੰਗਾਂ ਦਾ ਕੰਬੀਨੇਸ਼ਨ’। ਮੋਨੋਕ੍ਰੋਮ ਆਊਟਫਿਟਸ ’ਚ ਸਭ ਤੋਂ ਜ਼ਿਆਦਾ ਬਲੈਕ ਅਤੇ ਵ੍ਹਾਈਟ ਦਾ ਕੰਬੀਨੇਸ਼ਨ ਦੇਖਣ ਨੂੰ ਮਿਲਦਾ ਹੈ। ਇਸ ਤੋਂ ਇਲਾਵਾ ਬੇਜ਼, ਨੇਵੀ ਬਲੂ, ਪੇਸਟਲ ਸ਼ੇਡਜ਼ ’ਚ ਵੀ ਮੋਨੋਕ੍ਰੋਮ ਲੁੱਕ ਕਾਫੀ ਪਸੰਦ ਕੀਤੀ ਜਾਂਦੀ ਹੈ। ਇਸ ਦੀ ਸਭ ਤੋਂ ਵੱਡੀ ਖਾਸੀਅਤ ਇਹ ਹੈ ਕਿ ਇਕ ਹੀ ਰੰਗ ਦੇ ਵੱਖ-ਵੱਖ ਸ਼ੇਡਜ਼ ਜਾਂ ਬਲੈਕ ਐਂਡ ਵ੍ਹਾਈਟ ਕੌਂਬੋ ਨਾਲ ਲੁੱਕ ਬਹੁਤ ਪਾਲਿਸ਼ਡ ਅਤੇ ਅਟ੍ਰੈਕਟਿਵ ਲੱਗਦੀ ਹੈ। ਇਸ ’ਚ ਕਈ ਤਰ੍ਹਾਂ ਦੇ ਪ੍ਰਿੰਟ ਵੀ ਮਿਲਦੇ ਹਨ, ਜਿਵੇਂ ਲਾਈਨ ਪ੍ਰਿੰਟ, ਜ਼ਿਗਜ਼ੈਗ ਪ੍ਰਿੰਟ, ਡਾਟ ਪ੍ਰਿੰਟ, ਫਲਾਵਰ ਪ੍ਰਿੰਟ ਅਤੇ ਜ਼ੈਬਰਾ ਪ੍ਰਿੰਟ ਆਦਿ। ਵਰਟੀਕਲ ਲਾਈਨਾਂ ਬਾਡੀ ਨੂੰ ਲੰਬਾ ਅਤੇ ਸਲਿਮ ਦਿਖਾਉਂਦੀਆਂ ਹਨ, ਜਦਕਿ ਹੌਰੀਜੌਂਟਲ ਸਟ੍ਰਾਈਪਸ ਥੋੜ੍ਹਾ ਹੈਲਦੀ ਲੁੱਕ ਦਿੰਦੀਆਂ ਹਨ।

ਮੋਨੋਕ੍ਰੋਮ ’ਚ ਆਪਸ਼ਨਾਂ ਦੀ ਭਰਮਾਰ ਹੈ। ਇਸ ’ਚ ਲਾਂਗ ਡਰੈੱਸ, ਟਾਪ-ਬਾਟਮ, ਸਕਰਟ, ਪਲਾਜ਼ੋ, ਪੈਂਟ, ਲਾਂਗ ਕੁੜਤੀ, ਸ਼ਾਰਟ ਕੁੜਤੀ, ਸਾੜ੍ਹੀ ਅਤੇ ਸੂਟ ਤੱਕ ਸ਼ਾਮਲ ਹਨ। ਆਫਿਸ ਜਾਣ ਵਾਲੀਆਂ ਔਰਤਾਂ ਬਲੈਕ-ਵ੍ਹਾਈਟ ਸਟ੍ਰਾਈਪਡ ਸ਼ਰਟ ਨਾਲ ਫਾਰਮਲ ਪੈਂਟ ਪਹਿਨ ਸਕਦੀਆਂ ਹਨ। ਉੱਥੇ ਹੀ, ਕਾਲਜ ਜਾਣ ਵਾਲੀਆਂ ਮੁਟਿਆਰਾਂ ਜ਼ਿਗਜ਼ੈਗ ਪ੍ਰਿੰਟ ਵਾਲੀ ਲਾਂਗ ਕੁੜਤੀ ਜਾਂ ਪਲਾਜ਼ੋ ਸੈੱਟ ਕੈਰੀ ਕਰ ਰਹੀਆਂ ਹਨ। ਵਿਆਹ ਜਾਂ ਪਾਰਟੀ ਲਈ ਮੋਨੋਕ੍ਰੋਮ ਸਾੜ੍ਹੀ ਅਤੇ ਗਾਊਨ ਵੀ ਅੱਜਕੱਲ੍ਹ ਖੂਬ ਟ੍ਰੈਂਡ ’ਚ ਹਨ। ਸਭ ਤੋਂ ਚੰਗੀ ਗੱਲ ਇਹ ਹੈ ਕਿ ਇਨ੍ਹਾਂ ਨੂੰ ਸਟਾਈਲ ਕਰਨਾ ਬਹੁਤ ਆਸਾਨ ਹੈ।

ਬਲੈਕ ਐਂਡ ਵ੍ਹਾਈਟ ਆਊਟਫਿਟ ਨਾਲ ਕੋਈ ਵੀ ਸਾਲਿਡ ਕਲਰ ਦਾ ਬੈਗ, ਜੁੱਤੇ ਅਤੇ ਜਿਊਲਰੀ ਮੈਚ ਹੋ ਜਾਂਦੀ ਹੈ। ਮੋਨੋਕ੍ਰੋਮ ਆਊਟਫਿਟਸ ਦੀ ਸਭ ਤੋਂ ਵੱਡੀ ਖਾਸੀਅਤ ਇਸ ਦੀ ਵਰਸੇਟਿਲਿਟੀ ਹੈ। ਇਸ ਨੂੰ ਮੁਟਿਆਰਾਂ ਅਤੇ ਔਰਤਾਂ ਆਊਟਿੰਗ, ਸ਼ਾਪਿੰਗ, ਕਾਲਜ, ਆਫਿਸ ਮੀਟਿੰਗ ਅਤੇ ਖਾਸ ਮੌਕਿਆਂ ’ਤੇ ਵੀ ਪਹਿਨ ਸਕਦੀਆਂ ਹਨ। ਘੱਟ ਮਿਹਨਤ ’ਚ ਜ਼ਿਆਦਾ ਸਟਾਈਲਿਸ਼ ਦਿਸਣਾ ਹੈ ਤਾਂ ਮੋਨੋਕ੍ਰੋਮ ਤੋਂ ਬਿਹਤਰ ਕੋਈ ਆਪਸ਼ਨ ਨਹੀਂ ਹੈ। ਇਹੋ ਕਾਰਨ ਹੈ ਕਿ ਜੋ ਮੁਟਿਆਰਾਂ ਅਤੇ ਔਰਤਾਂ ਭੀੜ ਤੋਂ ਵੱਖ ਅਤੇ ਕਲਾਸੀ ਦਿਸਣਾ ਚਾਹੁੰਦੀਆਂ ਹਨ, ਉਹ ਇਸ ਸੀਜ਼ਨ ਆਪਣੀ ਵਾਰਡਰੋਬ ’ਚ ਇਕ-ਦੋ ਮੋਨੋਕ੍ਰੋਮ ਆਊਟਫਿਟ ਜ਼ਰੂਰ ਸ਼ਾਮਲ ਕਰ ਰਹੀਆਂ ਹਨ।