ਸਾੜ੍ਹੀ ਦੇ ਨਾਲ ਮੈਚਿੰਗ ਜਿਊਲਰੀ ਬਣੀ ਰਾਇਲ ਲੁੱਕ ਦਾ ਰਾਜ਼

ਵੈੱਬ ਡੈਸਕ- ਭਾਰਤੀ ਪਹਿਰਾਵਿਆਂ ’ਚ ਸਾੜ੍ਹੀ ਦਾ ਸਥਾਨ ਹਮੇਸ਼ਾ ਤੋਂ ਵਿਸ਼ੇਸ਼ ਰਿਹਾ ਹੈ। ਇਹ ਨਾ ਸਿਰਫ਼ ਇਕ ਰਵਾਇਤੀ ਪਹਿਰਾਵਾ ਹੈ, ਸਗੋਂ ਔਰਤਾਂ ਦੀ ਸੁੰਦਰਤਾ, ਸੱਭਿਆਚਾਰ ਅਤੇ ਸ਼ਿਸ਼ਟਾਚਾਰ ਦਾ ਪ੍ਰਤੀਕ ਵੀ ਹੈ। ਵਿਆਹ, ਤਿਉਹਾਰ, ਪਾਰਟੀ ਜਾਂ ਵਿਸ਼ੇਸ਼ ਮੌਕਿਆਂ ’ਚ ਔਰਤਾਂ ਸਾੜ੍ਹੀ ਨੂੰ ਪਹਿਲ ਦਿੰਦੀਆਂ ਹਨ ਪਰ ਸਾੜ੍ਹੀ ਨੂੰ ਸੰਪੂਰਨਤਾ ਉਦੋਂ ਹੀ ਮਿਲਦੀ ਹੈ, ਜਦੋਂ ਇਸ ਨੂੰ ਸਹੀ ਜਿਊਲਰੀ ਦੇ ਨਾਲ ਸਟਾਈਲ ਕੀਤਾ ਜਾਵੇ। ਸਾੜ੍ਹੀ ਦੇ ਨਾਲ ਮੈਚਿੰਗ ਜਿਊਲਰੀ ਔਰਤਾਂ ਨੂੰ ਰਾਇਲ ਅਤੇ ਆਕਰਸ਼ਕ ਲੁੱਕ ਦਿੰਦੀ ਹੈ।

ਜਿੱਥੇ ਕੁਝ ਮੁਟਿਆਰਾਂ ਹਲਕੀ-ਫੁਲਕੀ ਜਿਊਲਰੀ ਪਸੰਦ ਕਰਦੀਆਂ ਹਨ, ਉੱਥੇ ਹੀ ਕਈ ਹੈਵੀ ਸੈੱਟਸ ਦੇ ਨਾਲ ਗ੍ਰੈਂਡ ਲੁੱਕ ਕ੍ਰਿਏਟ ਕਰਨਾ ਚਾਹੁੰਦੀਆਂ ਹਨ। ਗੋਲਡ, ਸਿਲਵਰ ਜਾਂ ਸਟੋਨ ਵਾਲੀ ਜਿਊਲਰੀ ’ਚ ਮੈਚਿੰਗ ਦਾ ਬਦਲ ਸਭ ਤੋਂ ਜ਼ਿਆਦਾ ਲੋਕਪ੍ਰਿਯ ਹੈ। ਔਰਤਾਂ ਹੁਣ ਸਾੜ੍ਹੀ ਦੇ ਰੰਗ, ਪ੍ਰਿੰਟ ਜਾਂ ਕਢਾਈ ਅਨੁਸਾਰ ਜਿਊਲਰੀ ਚੁਣ ਰਹੀਆਂ ਹਨ। ਮੈਚਿੰਗ ਜਿਊਲਰੀ ਦੀ ਗੱਲ ਕਰੀਏ ਤਾਂ ਬਲੈਕ ਸਾੜ੍ਹੀ ਦੇ ਨਾਲ ਬਲੈਕ ਬੀਡਸ, ਓਨਿਕਸ ਜਾਂ ਸਟੋਨ ਵਾਲੀ ਜਿਊਲਰੀ ਦਾ ਸੁਮੇਲ ਬੇਹੱਦ ਖੂਬਸੂਰਤ ਲੱਗਦਾ ਹੈ। ਇਸੇ ਤਰ੍ਹਾਂ ਰੈੱਡ ਜਾਂ ਮੈਰੂਨ ਸਾੜ੍ਹੀ ਦੇ ਨਾਲ ਰੂਬੀ, ਗਾਰਨੇਟ ਜਾਂ ਰੈੱਡ ਸਟੋਨ ਵਾਲੀ ਗੋਲਡ ਜਿਊਲਰੀ ਰਾਇਲ ਦਿੱਖ ਦਿੰਦੀ ਹੈ। ਗ੍ਰੀਨ ਸਾੜ੍ਹੀ ’ਤੇ ਐਮਰਲਡ ਜਾਂ ਪੰਨਾ ਸਟੋਨ, ਜਦਕਿ ਬਲੂ ਸਾੜ੍ਹੀ ’ਤੇ ਸਫਾਇਰ ਜਾਂ ਨੀਲੇ ਸਟੋਨ ਵਾਲੀ ਜਿਊਲਰੀ ਦਾ ਰੁਝਾਨ ਜ਼ੋਰਾਂ ’ਤੇ ਹੈ। ਕਈ ਔਰਤਾਂ ਸਾੜ੍ਹੀ ਦੀ ਕਢਾਈ ਜਾਂ ਬਾਰਡਰ ਦੇ ਗੋਲਡਨ, ਵ੍ਹਾਈਟ ਜਾਂ ਹੋਰ ਰੰਗਾਂ ਨੂੰ ਧਿਆਨ ’ਚ ਰੱਖ ਕੇ ਜਿਊਲਰੀ ਚੁਣਦੀਆਂ ਹਨ।

ਕੁਝ ਫੈਸ਼ਨੇਬਲ ਔਰਤਾਂ ਡਬਲ-ਸ਼ੇਡ ਜਿਊਲਰੀ ਨੂੰ ਵੀ ਅਪਣਾਉਂਦੀਆਂ ਹਨ, ਜਿੱਥੇ ਗੋਲਡ ਬੇਸ ’ਚ ਸਾੜ੍ਹੀ ਦੇ ਹੋਰ ਰੰਗ ਦੇ ਸਟੋਨ ਲੱਗੇ ਹੁੰਦੇ ਹਨ। ਇਸ ਨਾਲ ਲੁੱਕ ’ਚ ਗਹਿਰਾਪਨ ਅਤੇ ਵੈਰਾਇਟੀ ਆਉਂਦੀ ਹੈ। ਇਸ ਤੋਂ ਇਲਾਵਾ, ਸਾੜ੍ਹੀ ਦੇ ਬਲਾਊਜ਼ ਦੇ ਰੰਗ ਨਾਲ ਮੈਚਿੰਗ ਜਿਊਲਰੀ ਚੁਣਨਾ ਵੀ ਇਕ ਸਮਾਰਟ ਤਰੀਕਾ ਹੈ। ਜਿਵੇਂ ਬਲੈਕ ਬਲਾਊਜ਼ ਦੇ ਨਾਲ ਬਲੈਕ ਜਾਂ ਸਿਲਵਰ ਜਿਊਲਰੀ, ਗ੍ਰੀਨ ਬਲਾਊਜ਼ ’ਤੇ ਗ੍ਰੀਨ ਸਟੋਨ, ਜਾਂ ਗੋਲਡਨ ਬਲਾਊਜ਼ ’ਤੇ ਗੋਲਡ ਜਿਊਲਰੀ ਦਾ ਸੁਮੇਲ ਲੁੱਕ ਨੂੰ ਹੋਰ ਵੀ ਕੰਪਲੀਟ ਕਰ ਦਿੰਦਾ ਹੈ।

ਜਿਊਲਰੀ ਤੋਂ ਇਲਾਵਾ ਹੋਰ ਅਸੈਸਰੀਜ਼ ਵੀ ਸਾੜ੍ਹੀ ਦੀ ਲੁੱਕ ਨੂੰ ਬਿਹਤਰ ਬਣਾਉਂਦੀਆਂ ਹਨ। ਕਲੱਚ ਬੈਗ, ਸਨਗਲਾਸਿਜ਼ ਜਾਂ ਗੌਗਲਸ ਦੀ ਚੋਣ ਸਾੜ੍ਹੀ ਦੇ ਰੰਗ ਜਾਂ ਥੀਮ ਨਾਲ ਮੈਚਿੰਗ ਰੱਖੀ ਜਾਂਦੀ ਹੈ। ਹੇਅਰ ਸਟਾਈਲ ’ਚ ਸਿੰਪਲ ਜੂੜੇ ਤੋਂ ਲੈ ਕੇ ਓਪਨ ਹੇਅਰ, ਬ੍ਰੇਡਿਡ ਸਟਾਈਲ ਜਾਂ ਹਾਫ-ਅੱਪ ਹਾਫ-ਡਾਊਨ ਤੱਕ ਸਾਰੇ ਆਪਸ਼ਨਜ਼ ਲੋਕਪ੍ਰਿਯ ਹਨ। ਫੁੱਟਵੀਅਰ ’ਚ ਮੈਚਿੰਗ ਜੁੱਤੀ, ਹਾਈ ਹੀਲਜ਼ ਜਾਂ ਕਢਾਈ ਵਾਲੀਆਂ ਸੈਂਡਲਸ ਦੀ ਵਰਤੋਂ ਆਮ ਹੈ, ਜੋ ਪੂਰੇ ਆਊਟਫਿੱਟ ਨੂੰ ਬੈਲੇਂਸ ਕਰਦੀ ਹੈ। ਕੁੱਲ ਮਿਲਾ ਕੇ, ਸਾੜ੍ਹੀ ਦੇ ਨਾਲ ਮੈਚਿੰਗ ਜਿਊਲਰੀ ਨਾ ਸਿਰਫ਼ ਸੁੰਦਰਤਾ ਵਧਾਉਂਦੀ ਹੈ, ਸਗੋਂ ਔਰਤਾਂ ਨੂੰ ਆਤਮ-ਵਿਸ਼ਵਾਸ ਅਤੇ ਰਾਇਲ ਫੀਲ ਵੀ ਦਿੰਦੀ ਹੈ। ਅੱਜ ਦੀਆਂ ਔਰਤਾਂ ਫੈਸ਼ਨ ਨੂੰ ਆਪਣੀ ਸ਼ੈਲੀ ਅਨੁਸਾਰ ਢਾਲ ਰਹੀਆਂ ਹਨ ਅਤੇ ਮੈਚਿੰਗ ਜਿਊਲਰੀ ਇਸੇ ਸਿਰਜਣਾਤਮਕਤਾ ਦੀ ਸਭ ਤੋਂ ਖੂਬਸੂਰਤ ਮਿਸਾਲ ਹੈ।