ਜ਼ਰੀ ਵਰਕ ਵਾਲੇ ਸੂਟ ਔਰਤਾਂ ਨੂੰ ਦੇ ਰਹੇ ਨੇ ਰਾਇਲ ਲੁੱਕ

ਵੈੱਬ ਡੈਸਕ- ਅੱਜ-ਕੱਲ ਭਾਰਤੀ ਫੈਸ਼ਨ ਦੀ ਦੁਨੀਆ ’ਚ ਜ਼ਰੀ ਵਰਕ ਦਾ ਜਲਵਾ ਬਰਕਰਾਰ ਹੈ। ਮੁਟਿਆਰਾਂ ਅਤੇ ਔਰਤਾਂ ਰਵਾਇਤੀ ਅਤੇ ਆਧੁਨਿਕ ਦੋਵਾਂ ਸਟਾਈਲ ’ਚ ਜ਼ਰੀ ਵਰਕ ਵਾਲੇ ਸੂਟਾਂ ਨੂੰ ਬੇਹੱਦ ਪਸੰਦ ਕਰ ਰਹੀਆਂ ਹਨ। ਇਹ ਸੋਨੇ-ਚਾਂਦੀ ਦੇ ਧਾਗਿਆਂ ਨਾਲ ਕੀਤਾ ਜਾਣ ਵਾਲਾ ਸੂਖਮ ਕਢਾਈ ਦਾ ਕੰਮ ਕੱਪੜਿਆਂ ਨੂੰ ਸ਼ਾਹੀ ਅਤੇ ਚਮਕਦਾਰ ਬਣਾ ਦਿੰਦਾ ਹੈ। ਭਾਵੇਂ ਕੋਈ ਵਿਆਹ-ਫੰਕਸ਼ਨ ਹੋਵੇ ਜਾਂ ਰੋਜ਼ਾਨਾ ਦਾ ਪਹਿਰਾਵਾ, ਜ਼ਰੀ ਵਰਕ ਹਰ ਮੌਕੇ ’ਤੇ ਸੁੰਦਰਤਾ ਵਧਾ ਦਿੰਦਾ ਹੈ। ਮੁਟਿਆਰਾਂ ਦੀ ਪਹਿਲੀ ਪਸੰਦ ’ਚ ਪਲਾਜ਼ੋ ਸੂਟ ਸ਼ਾਮਲ ਹੈ। ਪਲਾਜ਼ੋ ਪੈਂਟ ਦੇ ਨਾਲ ਜ਼ਰੀ ਵਰਕ ਵਾਲੀ ਕੁੜਤੀ ਬੇਹੱਦ ਟ੍ਰੈਂਡੀ ਲੱਗਦੀ ਹੈ। ਲੰਬੀ ਕੁੜਤੀ ’ਤੇ ਵੇਲ-ਬੂਟੇ, ਫੁੱਲ-ਪੱਤੀਆਂ ਜਾਂ ਜਿਆਮਿਤੀ ਪੈਟਰਨ ’ਚ ਕੀਤਾ ਗਿਆ ਜ਼ਰੀ ਦਾ ਕੰਮ ਦਿਨ ਦੇ ਪ੍ਰੋਗਰਾਮਾਂ ਤੋਂ ਲੈ ਕੇ ਸ਼ਾਮ ਦੀ ਪਾਰਟੀ ਤੱਕ ਸੂਟ ਕਰਦਾ ਹੈ। ਇਸੇ ਤਰ੍ਹਾਂ ਪਲੇਅਰ ਸੂਟ (ਪਲਾਜ਼ੋ ਪਲੇਅਰ ਸਟਾਈਲ) ਵੀ ਲੋਕਪ੍ਰਿਯ ਹੈ, ਜਿਸ ’ਚ ਪਲਾਜ਼ੋ ਅਤੇ ਟਾਪ ਦੋਵਾਂ ’ਤੇ ਹਲਕਾ ਜਾਂ ਹੈਵੀ ਜ਼ਰੀ ਵਰਕ ਦਿੱਤਾ ਜਾਂਦਾ ਹੈ।

ਸ਼ਰਾਰਾ ਸੂਟ ਨੇ ਹਾਲ ਹੀ ਦੇ ਸਾਲਾਂ ’ਚ ਖੂਬ ਧੁੰਮਾਂ ਪਾਈਆਂ ਹਨ। ਫਲੇਅਰ ਵਾਲੀ ਸ਼ਰਾਰਾ ਪੈਂਟ ’ਤੇ ਸੋਨੇ-ਚਾਂਦੀ ਦੇ ਜ਼ਰੀ ਧਾਗਿਆਂ ਨਾਲ ਬਣੇ ਡਿਜ਼ਾਈਨ ਬੇਹੱਦ ਆਕਰਸ਼ਕ ਲੱਗਦੇ ਹਨ। ਵਿਆਹ, ਮਹਿੰਦੀ ਜਾਂ ਮੰਗਣੀ ਵਰਗੇ ਮੌਕਿਆਂ ’ਤੇ ਸ਼ਰਾਰਾ ਸੂਟ ’ਚ ਜ਼ਰੀ ਵਰਕ ਔਰਤਾਂ ਨੂੰ ਰਾਇਲ ਲੁੱਕ ਦਿੰਦਾ ਹੈ। ਕਈ ਡਿਜ਼ਾਈਨ ਜਾਰਜੈੱਟ ਜਾਂ ਸਿਲਕ ਫੈਬਰਿਕ ’ਤੇ ਹੈਵੀ ਜ਼ਰੀ ਵਰਕ ਦੇ ਨਾਲ ਸਟੋਨ ਜਾਂ ਸੀਕੁਐਂਸ ਦਾ ਕੰਬੀਨੇਸ਼ਨ ਵੀ ਕਰਦੇ ਹਨ। ਪਟਿਆਲਾ ਸੂਟ ’ਚ ਜ਼ਰੀ ਵਰਕ ਰਵਾਇਤੀ ਟੇਸਟ ਨੂੰ ਬਣਾਈ ਰੱਖਦੇ ਹੋਏ ਆਧੁਨਿਕ ਟੱਚ ਦਿੰਦਾ ਹੈ। ਪਟਿਆਲਾ ਸਲਵਾਰ ਦੀ ਲੂਜ਼ ਫਿਟਿੰਗ ਅਤੇ ਕੁੜਤੀ ’ਤੇ ਬਾਰੀਕ ਜ਼ਰੀ ਕਢਾਈ ਪੰਜਾਬੀ ਸਟਾਈਲ ਨੂੰ ਨਵੀਂ ਊਰਜਾ ਦਿੰਦੀ ਹੈ। ਮੁਟਿਆਰਾਂ ਇਸ ਨੂੰ ਫੈਸਟੀਵਲ ਜਾਂ ਕੈਜ਼ੂਅਲ ਪਾਰਟੀ ’ਚ ਪਸੰਦ ਕਰਦੀਆਂ ਹਨ। ਅਨਾਰਕਲੀ ਸੂਟ ਜ਼ਰੀ ਵਰਕ ਦਾ ਸਭ ਤੋਂ ਪਸੰਦੀਦਾ ਰੂਪ ਹੈ।

ਫਲੋਰ ਲੈਂਥ ਵਾਲੇ ਅਨਾਰਕਲੀ ਗਾਊਨ ’ਤੇ ਫੈਲਿਆ ਜ਼ਰੀ ਵਰਕ ਇਸ ਨੂੰ ਪ੍ਰਿੰਸੈੱਸ ਵਰਗੀ ਲੁੱਕ ਦਿੰਦਾ ਹੈ। ਏ-ਲਾਈਨ, ਕੇਪ ਸਟਾਈਲ ਜਾਂ ਨਾਇਰਾ ਕੱਟ ਅਨਾਰਕਲੀ ’ਚ ਜ਼ਰੀ ਦਾ ਕੰਮ ਵੱਖ-ਵੱਖ ਪੈਟਰਨਾਂ ’ਚ ਦਿਖਦਾ ਹੈ। ਹਾਫ ਸਲੀਵ, ਫੁੱਲ ਸਲੀਵ ਜਾਂ ਸ਼ਾਰਟ ਸਲੀਵ ਵਾਲੀ ਅਨਾਰਕਲੀ ਸੂਟ ਮੁਟਿਆਰਾਂ ਅਤੇ ਔਰਤਾਂ ਦੋਵਾਂ ਲਈ ਪਰਫੈਕਟ ਹੈ। ਫੰਕਸ਼ਨ ’ਚ ਜਿਊਲਰੀ ਦੇ ਨਾਲ ਪਹਿਨਣ ’ਤੇ ਇਹ ਬੇਹੱਦ ਖੂਬਸੂਰਤ ਲੱਗਦੀ ਹੈ। ਜ਼ਰੀ ਵਰਕ ਸਿਰਫ ਸੂਟਾਂ ਤੱਕ ਸੀਮਤ ਨਹੀਂ ਹੈ, ਲਹਿੰਗਾ ਚੋਲੀ ’ਚ ਵੀ ਇਸ ਦੀ ਖੂਬ ਵਰਤੋਂ ਹੁੰਦੀ ਹੈ। ਬਰਾਈਡਲ ਲਹਿੰਗੇ ਤੋਂ ਲੈ ਕੇ ਪਾਰਟੀ ਵੀਅਰ ਲਹਿੰਗੇ ਤੱਕ, ਚੋਲੀ ਅਤੇ ਲਹਿੰਗੇ ਦੇ ਘੇਰੇ ’ਤੇ ਸੋਨੇ ਦੇ ਜ਼ਰੀ ਧਾਗਿਆਂ ਨਾਲ ਬਣੇ ਫੁੱਲ, ਮੋਰ ਜਾਂ ਕਲਾਤਮਕ ਡਿਜ਼ਾਈਨ ਦੇਖੇ ਜਾ ਸਕਦੇ ਹਨ। ਲਹਿੰਗਾ ਚੋਲੀ ’ਚ ਜ਼ਰੀ ਵਰਕ ਪਹਿਨਣ ਵਾਲੀ ਔਰਤ ਨੂੰ ਸ਼ਾਹੀ ਅੰਦਾਜ਼ ਦਿੰਦਾ ਹੈ। ਸਾੜ੍ਹੀ ’ਚ ਜ਼ਰੀ ਵਰਕ ਦੀ ਗੱਲ ਕਰੀਏ ਤਾਂ ਬਨਾਰਸੀ ਸਾੜ੍ਹੀਆਂ ਇਸ ਦੀ ਬਿਹਤਰੀਨ ਉਦਾਹਰਣ ਹਨ। ਹਲਕੇ ਜ਼ਰੀ ਵਰਕ ਵਾਲੇ ਸੂਟ ਬਜਟ ਫ੍ਰੈਂਡਲੀ ਹਨ, ਜਦੋਂ ਕਿ ਹੈਵੀ ਵਰਕ ਵਾਲੇ ਪ੍ਰੀਮੀਅਮ ਲੁੱਕ ਦਿੰਦੇ ਹਨ। ਕੁੱਲ ਮਿਲਾ ਕੇ, ਜ਼ਰੀ ਵਰਕ ਸੂਟ ਮੁਟਿਆਰਾਂ ਅਤੇ ਔਰਤਾਂ ਦੀ ਫੈਸ਼ਨ ਪਸੰਦ ਦਾ ਮਹੱਤਵਪੂਰਨ ਹਿੱਸਾ ਬਣ ਚੁੱਕੇ ਹਨ। ਇਹ ਨਾ ਸਿਰਫ ਸੁੰਦਰਤਾ ਵਧਾਉਂਦੇ ਹਨ, ਸਗੋਂ ਭਾਰਤੀ ਸੱਭਿਆਚਾਰ ਦੀ ਅਮੀਰ ਵਿਰਾਸਤ ਨੂੰ ਵੀ ਜਿਊਂਦਾ ਰੱਖਦੇ ਹਨ। ਭਾਵੇਂ ਪਲਾਜ਼ੋ ਹੋਵੇ, ਸ਼ਰਾਰਾ, ਅਨਾਰਕਲੀ, ਪਟਿਆਲਾ, ਲਹਿੰਗਾ ਚੋਲੀ ਜਾਂ ਸਾੜ੍ਹੀ, ਜ਼ਰੀ ਵਰਕ ਹਰ ਪਹਿਰਾਵੇ ਨੂੰ ਖਾਸ ਬਣਾ ਦਿੰਦਾ ਹੈ। ਇਹ ਟ੍ਰੈਂਡ ਆਉਣ ਵਾਲੇ ਸਮੇਂ ’ਚ ਵੀ ਹੋਰ ਜ਼ਿਆਦਾ ਲੋਕਪ੍ਰਿਯ ਹੋਣ ਵਾਲਾ ਹੈ।