ਵੱਖਵਾਦੀ ਇਮਾਮ ਦੀ ਰਿਹਾਈ ਨੂੰ ਲੈ ਕੇ ਵੱਧੀ ਬ੍ਰਿਟਿਸ਼ ਪੁਲਸ ਦੀ ਚਿੰਤਾ
05/27/2018 7:59:30 PM
ਲੰਡਨ (ਭਾਸ਼ਾ)- ਪਾਕਿਸਤਾਨੀ ਮੂਲ ਦੇ ਵੱਖਵਾਦੀ ਇਸਲਾਮੀ ਉਪਦੇਸ਼ਕ ਦੀ ਜੇਲ ਤੋਂ ਰਿਹਾਈ ਦੀ ਤਿਆਰੀ ਕਰ ਰਹੀ ਸੁਰੱਖਿਆ ਏਜੰਸੀ ਨੂੰ ਉਸ ਦੇ ਬਾਹਰ ਆਉਣ 'ਤੇ ਭਾਈਚਾਰਕ ਤਣਾਅ ਵਧਣ ਦਾ ਖਦਸ਼ਾ ਬਣਿਆ ਹੋਇਆ ਹੈ। ਬ੍ਰਿਟੇਨ ਵਿਚ ਪੈਦਾ ਹੋਏ ਅੰਜਮ ਚੌਧਰੀ ਨੂੰ ਵੱਖਵਾਦ ਦੀ ਸਿੱਖਿਆ ਦੇਣ ਅਤੇ ਮੁਸਲਮਾਨਾਂ ਨੂੰ ਅੱਤਵਾਦ ਸਮੂਹ ਇਸਲਾਮਿਕ ਸਟੇਟ (ਆਈ.ਐਸ.ਆਈ.ਐਸ.) ਨੂੰ ਹਮਾਇਤ ਦੇਣ ਦੀ ਅਪੀਲ ਕਰਨ ਲਈ ਸਤੰਬਰ 2016 ਵਿਚ ਜੇਲ ਭੇਜਿਆ ਗਿਆ ਸੀ। ਉਸ ਨੂੰ ਅਕਤੂਬਰ ਵਿਚ ਸਖ਼ਤ ਚੌਕਸੀ ਵਿਚ ਲਾਇਸੈਂਸ 'ਤੇ ਰਿਹਾਅ ਕੀਤਾ ਜਾਵੇਗਾ। ਨਿਊਜ਼ ਪੇਪਰ ਦਿ ਸੰਡੇ ਟਾਈਮਜ਼ ਨੇ ਸਕਾਟਲੈਂਡ ਯਾਰਡ ਦੇ ਇਕ ਸੂਤਰ ਦੇ ਹਵਾਲੇ ਤੋਂ ਕਿਹਾ ਕਿ ਸੰਭਵ ਹੈ ਕਿ ਉਸ ਦੇ ਕੁਝ ਚੇਲੇ ਜ਼ਿਆਦਾ ਬੜਬੋਲੇ ਹੋ ਜਾਣ ਅਤੇ ਉਨ੍ਹਾਂ ਦਾ ਵੱਖਵਾਦੀ ਰਵੱਈਆ ਹੋਰ ਭੜਕ ਜਾਵੇ। ਸੂਤਰ ਨੇ ਦੱਸਿਆ ਕਿ ਪੁਲਸ ਪੂਰੇ ਦੇਸ਼ ਦੇ ਅਤਿ ਦੱਖਣਪੰਥੀ ਅਤੇ ਇਸਲਾਮੀ ਨੈਟਵਰਕ ਉੱਤੇ ਨਜ਼ਰ ਰੱਖ ਰਹੀ ਹੈ ਅਤੇ ਅਸੀਂ ਮੁਸਲਿਮ ਭਾਈਚਾਰੇ ਨੂੰ ਭਰੋਸਾ ਦੇ ਰਹੇ ਹਾਂ ਕਿ ਅਸੀਂ ਇਸ ਘੜੀ ਨਾਲ ਨਜਿੱਠਣ ਲਈ ਪਹਿਲਾਂ ਤੋਂ ਕਾਰਵਾਈ ਕਰ ਰਹੇ ਹਾਂ। ਇਕ ਸਰਕਾਰੀ ਅਧਿਕਾਰੀ ਨੇ ਨਿਊਜ਼ ਪੇਪਰ ਨੂੰ ਦੱਸਿਆ ਕਿ ਲਾਇਸੈਂਸ ਦੀਆਂ ਸ਼ਰਤਾਂ ਫਿਲਹਾਲ ਤੈਅ ਨਹੀਂ ਕੀਤੀਆਂ ਗਈਆਂ ਹਨ ਪਰ ਮੁਮਕਿਨ ਹੈ ਕਿ ਇਹ ਬਹੁਤ ਸਖ਼ਤ ਹੋਣ ਵਾਲੀ ਹੈ। ਉਨ੍ਹਾਂ ਨੇ ਕਿਹਾ ਕਿ ਸੁਰੱਖਿਆ ਏਜੰਸੀ ਯਕੀਨੀ ਹੀ ਉਸ ਉੱਤੇ ਦਿਨ ਰਾਤ ਨਜ਼ਰ ਰੱਖਣ ਵਾਲੀ ਹੈ। ਇਸਲਾਮੀ ਸਮੂਹ ਅਲ ਮੁਹਾਜਿਰੋਨ ਨੂੰ ਚਲਾਉਣ ਵਾਲੇ ਚੌਧਰੀ ਉੱਤੇ ਆਈ.ਐਸ.ਆਈ.ਐਸ. ਦੇ ਮਾਸਟਰ ਮਾਈਂਡ ਅਬੂ ਬਕਰ ਅਲ-ਬਗਦਾਦੀ ਦਾ ਵਫਾਦਾਰ ਹੋਣ ਦਾ ਦੋਸ਼ ਹੈ।
