ਬ੍ਰਿਟੇਨ 'ਚ ਗੈਰ ਗੋਰੇ ਵਿਅਕਤੀ ਦੀ ਧੌਣ ਨੂੰ ਗੋਡੇ ਨਾਲ ਦਬਾਉਣ ਦੇ ਦੋਸ਼ 'ਚ ਇਕ ਪੁਲਸ ਅਧਿਕਾਰੀ ਮੁਅੱਤਲ

ਲੰਡਨ (ਭਾਸ਼ਾ) : ਇਕ ਵੀਡੀਓ ਵਿਚ ਲੰਡਨ ਵਿਚ ਇਕ ਗੈਰ ਗੋਰੇ ਵਿਅਕਤੀ ਨੂੰ ਗ੍ਰਿਫਤਾਰ ਕਰਦੇ ਸਮੇਂ ਉਸ ਦੇ ਸਿਰ ਅਤੇ ਧੌਣ ਨੂੰ ਗੋਡੇ ਨਾਲ ਦਬਾਉਂਦੇ ਹੋਏ ਵਿੱਖਣ ਦੇ ਬਾਅਦ ਸਕਾਟਲੈਂਡ ਯਾਰਡ ਦੇ ਇਕ ਅਧਿਕਾਰੀ ਨੂੰ ਮੁਅੱਤਲ ਕਰ ਦਿੱਤਾ ਗਿਆ ਹੈ। ਬ੍ਰਿਟੇਨ ਦੀ ਰਾਜਧਾਨੀ ਦੇ ਇਸਲਿੰਗਟਨ ਇਲਾਕੇ ਵਿਚ ਰਿਕਾਰਡ ਕੀਤੀ ਗਈ ਵੀਡੀਓ ਵਿਚ ਵਿੱਖ ਰਿਹਾ ਹੈ ਕਿ ਦੋ ਅਧਿਕਾਰੀ ਫੁਟਪਾਥ 'ਤੇ ਹਥਕੜੀ ਲੱਗੇ ਹੋਏ ਇਕ ਸ਼ੱਕੀ ਨੂੰ ਫੜ ਰਹੇ ਹਨ। ਵੀਰਵਾਰ ਸ਼ਾਮ ਦੀ ਇਸ ਘਟਨਾ ਦੇ ਬਾਅਦ ਇਕ ਦੂਜੇ ਮੈਟਰੋਪੋਲੀਟਨ ਪੁਲਸ ਅਧਿਕਾਰੀ ਨੂੰ ਡਿਊਟੀ ਤੋਂ ਹਟਾ ਦਿੱਤਾ ਗਿਆ ਹੈ।

ਅਮਰੀਕਾ ਦੇ ਮਿਨਿਆਪੋਲਿਸ ਵਿਚ 25 ਮਈ ਨੂੰ ਪੁਲਸ ਹਿਰਾਸਤ ਵਿਚ 46 ਸਾਲਾ ਅਫ਼ਰੀਕੀ-ਅਮਰੀਕੀ ਜਾਰਜ ਫਲਾਇਡ ਦੀ ਮੌਤ ਦੇ ਬਾਅਦ ਬ੍ਰਿਟੇਨ ਵਿਚ ਵੀ ਵਿਆਪਕ ਪ੍ਰਦਰਸ਼ਨ ਹੋਏ ਸਨ। ਸੀਨੀਅਰ ਪੁਲਸ ਅਧਿਕਾਰੀ ਸਰ ਸਟੀਵ ਹਾਊਸ ਨੇ ਦੱਸਿਆ ਕਿ ਇਹ ਫੁਟੇਜ 'ਬਹੁਤ ਜ਼ਿਆਦਾ ਪਰੇਸ਼ਾਨ' ਕਰਣ ਵਾਲੀ ਹੈ ਅਤੇ ਇਹ ਮਾਮਲਾ ਪੁਲਸ ਗਤੀਵਿਧੀਆਂ 'ਤੇ ਨਿਗਰਾਨੀ ਰੱਖਣ ਵਾਲੀ ਸੰਸਥਾ ਨੂੰ ਭੇਜਿਆ ਗਿਆ ਹੈ। ਉਨ੍ਹਾਂ ਕਿਹਾ, 'ਸੋਸ਼ਲ ਮੀਡਿਆ 'ਤੇ ਚੱਲ ਰਹੀ ਜੋ ਵੀਡੀਓ ਫੁਟੇਜ ਮੈਂ ਅੱਜ ਵੇਖੀ ਹੈ ਉਹ ਬਹੁਤ ਜ਼ਿਆਦਾ ਪਰੇਸ਼ਾਨ ਕਰਣ ਵਾਲੀ ਹੈ।  ਇਸ ਵਿਚ ਇਸਤੇਮਾਲ ਕੁੱਝ ਹਥਕੰਡੇ ਚਿੰਤਾ ਦਾ ਵਿਸ਼ਾ ਹਨ... ਇਹ ਪੁਲਸ ਸਿਖਲਾਈ ਦੌਰਾਨ ਨਹੀਂ ਸਿਖਾਏ ਜਾਂਦੇ।' ਉਨ੍ਹਾਂ ਕਿਹਾ, 'ਇਕ ਅਧਿਕਾਰੀ ਨੂੰ ਮੁਅੱਤਲ ਕਰ ਦਿੱਤਾ ਗਿਆ ਹੈ ਅਤੇ ਦੂਜੇ ਅਧਿਕਾਰੀ ਨੂੰ ਆਪਰੇਸ਼ਨਲ ਡਿਊਟੀ ਤੋਂ ਹਟਾ ਦਿੱਤਾ ਹੈ ਪਰ ਅਜੇ ਮੁਅੱਤਲ ਨਹੀਂ ਕੀਤਾ ਹੈ। ਮਹਾਨਗਰ ਪੁਲਿਸ ਨੇ ਪੁਸ਼ਟੀ ਕੀਤੀ ਕਿ ਉਸ ਨੇ 45 ਸਾਲਾ ਸ਼ਖਸ 'ਤੇ ਜਨਤਕ ਸਥਾਨ 'ਤੇ ਚਾਕੂ ਰੱਖਣ ਦਾ ਇਲਜ਼ਾਮ ਲਗਾਇਆ ਹੈ। ਮਾਰਕਸ ਕੂਟੇਨ ਨੂੰ ਸ਼ਨੀਵਾਰ ਨੂੰ ਹਾਈਬਰੀ ਕਾਰਨਰ ਮੈਜਿਸਟਰੇਟ ਦੀ ਅਦਾਲਤ ਵਿਚ ਪੇਸ਼ ਕੀਤਾ ਜਾਵੇਗਾ। ਫੁਟੇਜ ਵਿਚ ਵਿੱਖ ਰਿਹਾ ਹੈ ਕਿ ਇਕ ਅਧਿਕਾਰੀ ਸ਼ੱਕੀ ਨੂੰ ਕਾਬੂ ਵਿਚ ਕਰਣ ਲਈ ਆਪਣੇ ਗੋਡੇ ਦਾ ਇਸਤੇਮਾਲ ਕਰ ਰਿਹਾ ਹੈ ਅਤੇ ਉਸ ਦੇ ਸਿਰ ਨੂੰ ਆਪਣੇ ਹੱਥ ਨਾਲ ਦਬਾਅ ਰਿਹਾ ਹੈ।