ਗਾਹਕ ਨੇ ਕੀਤੀ ਸ਼ਿਕਾਇਤ ਤਾਂ ਕੰਪਨੀ ਮਾਲਕ ਨੇ ਇੰਝ ਸਿਖਾਇਆ ਸਬਕ (ਵੀਡੀਓ)
01/12/2018 5:00:03 PM
ਬੀਜਿੰਗ (ਬਿਊਰੋ)— ਆਮਤੌਰ 'ਤੇ ਹਰ ਕੰਪਨੀ ਆਪਣੇ ਗਾਹਕਾਂ ਦਾ ਖਿਆਲ ਰੱਖਦੀ ਹੈ। ਕੰਪਨੀ ਦੇ ਕਰਮਚਾਰੀ ਗਾਹਕਾਂ ਦੀ ਪਸੰਦ ਅਤੇ ਨਾਪਸੰਦ ਦਾ ਪੂਰਾ ਧਿਆਨ ਰੱਖਦੇ ਹਨ ਪਰ ਚੀਨ ਵਿਚ ਇਕ ਅਜਿਹਾ ਮਾਮਲਾ ਸਾਹਮਣੇ ਆਇਆ ਹੈ, ਜੋ ਠੀਕ ਇਸ ਦੇ ਉਲਟ ਹੈ। ਇਕ ਚੀਨੀ ਕੰਪਨੀ ਮਾਲਕ ਆਪਣੀ ਇਕ ਔਰਤ ਗਾਹਕ ਨੂੰ ਕੁੱਟਣ ਲਈ 804 ਕਿਲੋਮੀਟਰ (500 ਮੀਲ) ਦੀ ਯਾਤਰਾ ਕਰ ਕੇ ਉਸ ਦੇ ਸ਼ਹਿਰ ਪਹੁੰਚਿਆ ਅਤੇ ਉਸ 'ਤੇ ਸਿੱਧਾ ਹਮਲਾ ਕਰ ਦਿੱਤਾ।
ਔਰਤ ਗਾਹਕ ਦੀ ਪਛਾਣ ਸ਼ਿਆਓ ਲੀ ਦੇ ਤੌਰ 'ਤੇ ਕੀਤੀ ਗਈ ਹੈ। ਉਹ ਪੂਰਬੀ ਚੀਨ ਦੇ ਝੇਂਗਝਾਊ ਸ਼ਹਿਰ ਦੀ ਰਹਿਣ ਵਾਲੀ ਹੈ। ਉਸ ਨੇ ਇਕ ਆਨਲਾਈਨ ਰੀਟੇਲ ਕੰਪਨੀ ਤੋਂ ਕੁਝ ਸਾਮਾਨ ਮੰਗਵਾਇਆ ਸੀ ਪਰ ਵਾਅਦੇ ਮੁਤਾਬਕ ਕੰਪਨੀ ਸਾਮਾਨ ਸਮੇਂ 'ਤੇ ਨਹੀਂ ਪਹੁੰਚਾ ਪਾਈ। ਉਸ ਨੂੰ ਆਰਡਰ ਕੀਤਾ ਸਾਮਾਨ ਚਾਰ ਦਿਨ ਦੀ ਦੇਰੀ ਮਗਰੋਂ ਮਿਲਿਆ ਸੀ। ਸ਼ਿਆਓ ਨੇ ਇਸੇ ਸੰਬੰਧੀ ਸ਼ਿਕਾਇਤ ਦਰਜ ਕਰਵਾਈ ਸੀ।
ਇਸ ਸ਼ਿਕਾਇਤ ਨਾਲ ਰੀਟੇਲ ਕੰਪਨੀ ਦੇ ਮਾਲਕ ਝਾਂਗ ਦਾ ਗੁੱਸਾ ਇਸ ਹੱਦ ਤੱਕ ਵੱਧ ਗਿਆ ਕਿ ਗਾਹਕ ਨੂੰ ਸਬਕ ਸਿਖਾਉਣ ਲਈ ਉਸ ਦੇ ਸ਼ਹਿਰ ਸੈਂਕੜੇ ਮੀਲ ਦੀ ਯਾਤਰਾ ਕਰ ਕੇ ਪੁੱਜਾ। ਇਹ ਪੂਰਾ ਮਾਮਲਾ ਸੀ. ਸੀ. ਟੀ. ਵੀ. ਫੁਟੇਜ ਵਿਚ ਕੈਦ ਹੋ ਗਿਆ। ਸੀ. ਸੀ. ਟੀ. ਵੀ. ਫੁਟੇਜ ਵਿਚ ਦੋਸ਼ੀ ਨੂੰ ਸ਼ਿਆਓ 'ਤੇ ਲੱਤਾਂ ਅਤੇ ਮੁੱਕੇ ਮਾਰਦੇ ਦੇਖਿਆ ਜਾ ਸਕਦਾ ਹੈ। ਝਾਂਗ ਨੇ ਸ਼ਿਆਓ ਨੂੰ ਲਗਾਤਾਰ ਥੱਪੜ ਵੀ ਮਾਰੇ, ਜਿਸ ਕਾਰਨ ਉਹ ਜ਼ਮੀਨ 'ਤੇ ਡਿੱਗ ਪਈ ਸੀ। ਦੋਸ਼ੀ ਇਸ ਦੇ ਬਾਅਦ ਵੀ ਨਹੀਂ ਰੁੱਕਿਆ ਅਤੇ ਔਰਤਾਂ ਨੂੰ ਲੱਤਾਂ ਮਾਰਨ ਲੱਗਾ। ਇਸ ਕੁੱਟਮਾਰ ਵਿਚ ਬੁਰੀ ਤਰ੍ਹਾਂ ਜ਼ਖਮੀ ਹੋਈ ਸ਼ਿਆਓ ਨੂੰ ਹਸਪਤਾਲ ਵਿਚ ਭਰਤੀ ਕਰਵਾਇਆ ਗਿਆ।
ਪੁਲਸ ਨੇ ਵੀ ਇਸ ਮਾਮਲੇ ਦੀ ਪੁਸ਼ਟੀ ਕੀਤੀ ਹੈ ਪਰ ਵਿਸਤ੍ਰਿਤ ਵੇਰਵਾ ਦੇਣ ਤੋਂ ਇਨਕਾਰ ਕਰ ਦਿੱਤਾ। ਅਧਿਕਾਰੀਆਂ ਨੇ ਹੈਰਾਨ ਕਰ ਦੇਣ ਵਾਲੇ ਇਸ ਮਾਮਲੇ ਦੀ ਜਾਂਚ ਸ਼ੁਰੂ ਕਰਨ ਦੀ ਗੱਲ ਕਹੀ ਹੈ। ਇਸ ਮਾਮਲੇ ਵਿਚ ਹਾਲੇ ਤੱਕ ਝਾਂਗ 'ਤੇ ਕਿਸੇ ਤਰ੍ਹਾਂ ਦੀ ਕਾਨੂੰਨੀ ਕਾਰਵਾਈ ਬਾਰੇ ਕੋਈ ਜਾਣਕਾਰੀ ਨਹੀਂ ਹੈ। ਸ਼ਿਆਓ ਨੇ ਦਾਅਵਾ ਕੀਤਾ ਕਿ ਝਾਂਗ ਨੇ ਮੈਸੇਜ ਕਰਕੇ ਉਸ ਨੂੰ ਸਬਕ ਸਿਖਾਉਣ ਦੀ ਧਮਕੀ ਦਿੱਤੀ ਸੀ।
