ਇੰਗਲੈਂਡ ''ਚ ਲੁਟੇਰਿਆਂ ਨੇ ਪਿੱਜ਼ਾ ਡਿਲਿਵਰੀ ਬੁਆਏ ਬਣ ਕੇ ਲੁੱਟੇ 25 ਹਜ਼ਾਰ ਪੌਂਡ

8/12/2020 3:08:47 PM

ਲੰਡਨ, (ਰਾਜਵੀਰ ਸਮਰਾ)- ਇੰਗਲੈਂਡ ਵਿਚ ਲੁਟੇਰਿਆਂ ਨੇ ਨਕਲੀ 'ਪਿੱਜ਼ਾ ਡਿਲਿਵਰੀ ਬੁਆਏ' ਬਣ ਕੇ ਇਕ ਘਰ ਵਿਚੋਂ 25000 ਪੌਂਡ ਦਾ ਸੋਨਾ ਲੁੱਟ ਲਿਆ। ਬਰਾਈਮੇਟ ਹਲਕੇ ਦੀ ਮੌਬਰਲੇਅ ਰੋਡ ਸਥਿਤ ਇਕ ਘਰ ਵਿਚ ਨਕਾਬ ਪੋਸ਼ ਲੁਟੇਰਿਆਂ ਨੇ ਘਰ ਦਾ ਦਰਵਾਜ਼ਾ ਖੜਕਾਇਆ ਤਾਂ ਇਕ ਮਹਿਲਾ ਨੇ ਦਰਵਾਜ਼ਾ ਖੋਲਿ੍ਹਆ ਤਾਂ ਲੁਟੇਰਿਆਂ ਨੇ ਕਿਹਾ ਕਿ ਉਹ ਪਿੱਜ਼ਾ ਲੈ ਕੇ ਆਏ ਹਨ। ਮਹਿਲਾ ਨੇ ਆਪਣੀ 18 ਸਾਲਾ ਭਤੀਜੀ ਨਾਡੀਆ ਬੀਬੀ ਨਾਲ ਗੱਲ ਕਰਨ ਨੂੰ ਕਿਹਾ, ਤਾਂ ਨਾਡੀਆ ਨੇ ਉਕਤ ਲੋਕਾਂ ਨੂੰ ਦੱਸਿਆ ਕਿ ਪਿੱਜ਼ਾ ਡਿਲਿਵਰੀ ਇਕ ਘੰਟਾ ਪਹਿਲਾ ਆ ਗਈ ਸੀ ਅਤੇ ਉਨ੍ਹਾਂ ਹੋਰ ਆਰਡਰ ਨਹੀਂ ਕੀਤਾ। ਮਹਿਲਾ ਅਤੇ ਨਾਡੀਆ ਦਰਵਾਜ਼ਾ ਬੰਦ ਕਰਨ ਦੀ ਕੋਸ਼ਿਸ਼ ਕਰ ਰਹੀਆਂ ਸਨ ਤਾਂ ਦੋ ਹੋਰ ਨਕਾਬਪੋਸ਼ ਵਿਅਕਤੀ ਘਰ 'ਚ ਜ਼ਬਰਦਸਤੀ ਦਾਖਲ ਹੋ ਗਏ। ਨਾਡੀਆ ਬੀਬੀ ਨੇ ਦੱਸਿਆ ਕਿ ਉਨ੍ਹਾਂ ਕੋਲ ਹਥੌੜਾ ਅਤੇ ਚਾਕੂ ਸੀ।

ਦੋ ਲੋਕਾਂ ਨੇ ਉਨ੍ਹਾਂ ਨੂੰ ਜਕੜ ਲਿਆ ਅਤੇ ਘਰ 'ਚ ਰਹਿੰਦੇ ਹੋਰ ਬੱਚਿਆਂ ਨੇ ਆਪਣੇ ਕਮਰਿਆਂ ਦਾ ਦਰਵਾਜ਼ਾ ਅੰਦਰੋਂ ਬੰਦ ਕਰ ਲਿਆ ਪਰ ਇਕ ਲੁਟੇਰੇ ਨੇ ਘਰ ਦੇ ਹਰ ਕਮਰੇ ਦੀ ਫਰੋਲਾ-ਫਰੋਲੀ ਕੀਤੀ ਅਤੇ 25000 ਪੌਂਡ ਦਾ ਸੋਨਾ ਅਤੇ ਨਕਦੀ ਲੈ ਕੇ ਫ਼ਰਾਰ ਹੋ ਗਏ। ਮਾਨਚੈਸਟਰ ਪੁਲਸ ਅਨੁਸਾਰ ਉਕਤ ਘਟਨਾ 29 ਜੁਲਾਈ ਨੂੰ ਸ਼ਾਮੀ 10:45 ਵਜੇ ਦੇ ਕਰੀਬ ਉਨ੍ਹਾਂ ਨੂੰ ਸੂਚਨਾ ਮਿਲੀ ਸੀ। ਸੀ. ਸੀ. ਟੀ. ਵੀ. ਦੇ ਫੁਟੇਜ ਅਨੁਸਾਰ ਲੁਟੇਰੇ ਤਿੰਨ ਸਨ ਅਤੇ ਨਕਲੀ ਡਿਲਿਵਰੀ ਵਿਅਕਤੀ ਏਸ਼ਿਆਈ ਮੂਲ ਦਾ ਸੀ।


Lalita Mam

Content Editor Lalita Mam