ਟਰੰਪ ਜੂਨੀਅਰ ਨਾਲ ਕੀਤਾ ਗਿਆ ਸੀ ਹਿਲੇਰੀ ਨੂੰ ਨੁਕਸਾਨ ਪਹੁੰਚਾਉਣ ਵਾਲੀ ਜਾਣਕਾਰੀ ਦਾ ਵਾਅਦਾ

ਵਾਸ਼ਿੰਗਟਨ— ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਸਭ ਤੋਂ ਵੱਡੇ ਬੇਟੇ ਨੇ ਕਿਹਾ ਹੈ ਕਿ ਉਨ੍ਹਾਂ ਦੇ ਪਿਤਾ ਨੂੰ ਰਿਪਬਲਿਕਨ ਉਮੀਦਵਾਰੀ ਮਿਲ ਜਾਣ ਦੇ ਕੁਝ ਸਮਾਂ ਬਾਅਦ ਹੀ ਉਨ੍ਹਾਂ ਨੇ ਰੂਸ ਨਾਲ ਜੁੜੀ ਇਕ ਵਕੀਲ ਨਾਲ ਇਸ ਉਮੀਦ ਨਾਲ ਮੁਲਾਕਾਤ ਕੀਤੀ ਸੀ ਕਿ ਇਸ ਨਾਲ ਉਨ੍ਹਾਂ ਨੂੰ ਚੋਣ ਮੁਹਿੰਮ ਵਿਚ ਮਦਦਗਾਰ ਜਾਣਕਾਰੀ ਮਿਲ ਸਕੇਗੀ। ਇਕ ਅੰਗਰੇਜੀ ਅਖਬਾਰ ਨੇ ਆਪਣੀ ਕਲ ਦੀ ਖਬਰ ਵਿਚ ਵਾਈਟ ਹਾਊਸ ਦੇ ਸਲਾਹਕਾਰਾਂ ਦੇ ਹਵਾਲੇ ਨਾਲ ਦੱਸਿਆ ਸੀ ਕਿ ਟਰੰਪ ਜੂਨੀਅਰ ਹਿਲੇਰੀ ਕਲਿੰਟਨ ਨੂੰ ਨੁਕਸਾਨ ਪਹੁੰਚਾਉਣ ਵਾਲੀ ਜਾਣਕਾਰੀ ਦੇਣ ਦਾ ਵਾਅਦਾ ਕੀਤੇ ਜਾਣ ਉੱਤੇ ਇਸ ਬੈਠਕ ਲਈ ਰਾਜੀ ਹੋ ਗਏ ਸਨ। 
ਜੂਨ ਵਿਚ ਟਰੰਪ ਟਾਵਰ ਵਿਚ ਵਕੀਲ ਨਤਾਲਿਯਾ ਵੇਸੇਲਨਿਤਸਕਾਯਾ ਨਾਲ ਹੋਈ ਇਸ ਬੈਠਕ ਵਿਚ ਟਰੰਪ ਜੂਨੀਅਰ, ਉਨ੍ਹਾਂ ਦੀ ਜੀਜਾ ਜੇਯਰਡ ਕੁਸ਼ਨੇਰ ਅਤੇ ਤੱਤਕਾਲੀਨ ਪ੍ਰਚਾਰ ਪ੍ਰਮੁੱਖ ਪਾਲ ਮੈਨਫੋਰਟ ਮੌਜੂਦ ਸਨ। ਇਸ ਬੈਠਕ ਦੀ ਜਾਣਕਾਰੀ ਸਰਕਾਰੀ ਅਧਿਕਾਰੀਆਂ ਨੇ ਹੀ ਸਰਵਜਨਕ ਕੀਤੀ। 
ਸ਼ਨੀਵਾਰ ਨੂੰ ਟਰੰਪ ਜੂਨੀਅਰ ਅਤੇ ਕੁਸ਼ਨੇਰ ਨੇ ਇਕ ਵੱਖ ਰਿਪੋਰਟ ਦੇ ਬਾਅਦ ਇਸ ਬੈਠਕ ਦੀ ਪੁਸ਼ਟੀ ਕੀਤੀ। ਕਲ ਦੇ ਬਿਆਨ ਵਿਚ ਟਰੰਪ ਜੂਨੀਅਰ ਨੇ ਇਹ ਪੁਸ਼ਟੀ ਨਹੀਂ ਕੀਤੀ ਸੀ ਕਿ ਉਨ੍ਹਾਂ ਨੂੰ ਹਿਲੇਰੀ ਨੂੰ ਨੁਕਸਾਨ ਪਹੁੰਚਾਉਣ ਵਾਲੀ ਜਾਣਕਾਰੀ ਦੇਣ ਦਾ ਵਾਅਦਾ ਕੀਤਾ ਗਿਆ ਸੀ। ਪਰ ਉਨ੍ਹਾਂ ਨੇ ਕਿਹਾ ਕਿ ਉਨ੍ਹਾਂ ਨੂੰ ਸਾਲ 2013 ਦੀ ਮਿਸ ਯੂਨੀਵਰਸ ਪ੍ਰਤੀਯੋਗਤਾ ਨਾਲ ਜੁੜੀ ਰਹੀ ਇਕ ਜਾਣਕਾਰ ਨੂੰ ਮਿਲਣ ਲਈ ਕਿਹਾ ਗਿਆ ਸੀ। ਉਨ੍ਹਾਂ ਨੂੰ ਕਿਹਾ ਗਿਆ ਸੀ ਕਿ ਇਹ ਜਾਣਕਾਰੀ ਪ੍ਰਚਾਰ ਮੁਹਿੰਮ ਲਈ ਖਾਸ ਜਾਣਕਾਰੀ ਉਪਲਬਧ ਕਰਵਾ ਸਕਦੀ ਹੈ। ਟਰੰਪ ਜੂਨੀਅਰ ਨੇ ਕਿਹਾ ਕਿ ਬੈਠਕ ਦੌਰਾਨ ਅਟਾਰਨੀ ਨੇ ਦਾਅਵਾ ਕੀਤਾ ਕਿ,'' ਰੂਸ ਨਾਲ ਜੁੜੇ ਲੋਕ ਡੈਮੋਕ੍ਰੇਟਿਕ ਨੈਸ਼ਨਲ ਕਮੇਟੀ ਨੂੰ ਵਿੱਤ ਪੋਸ਼ਣ ਦੇ ਰਹੇ ਸਨ ਅਤੇ ਹਿਲੇਰੀ ਨੂੰ ਸਮਰਥਨ ਦੇ ਰਹੇ ਸਨ।'' ਟਰੰਪ ਜੂਨੀਅਰ ਨੇ ਕਿਹਾ,'' ਇਸ ਬਾਰੇ ਕੋਈ ਵਿਸਤਾਰ ਨਾਲ ਜਾਣਕਾਰੀ ਨਹੀਂ ਦਿੱਤੀ ਗਈ ਅਤੇ ਨਾ ਹੀ ਉਸ ਦੀ ਪੇਸ਼ਕਸ਼ ਕੀਤੀ ਗਈ। ਜਲਦੀ ਹੀ ਸਪੱਸ਼ਟ ਹੋ ਗਿਆ ਕਿ ਉਸ ਕੋਲ ਕੋਈ ਅਰਥ ਪੂਰਣ ਜਾਣਕਾਰੀ ਨਹੀ ਸੀ।''