ਰਾਜਕੁਮਾਰੀ ਬਿਟ੍ਰੀਸ ਨੇ ਗੁਪਤ ਸਮਾਗਮ ''ਚ ਕੀਤਾ ਵਿਆਹ
Friday, Jul 17, 2020 - 09:19 PM (IST)
ਲੰਡਨ (ਭਾਸ਼ਾ): ਬ੍ਰਿਟੇਨ ਦੀ ਮਹਾਰਾਣੀ ਐਲੀਜ਼ਾਬੇਥ ਦੀ ਪੋਤੀ ਰਾਜਕੁਮਾਰੀ ਬਿਟ੍ਰੀਸ ਨੇ ਸ਼ੁੱਕਰਵਾਰ ਨੂੰ ਵਿੰਡਸਰ ਵਿਚ ਆਪਣੇ ਅਰਬਪਤੀ ਪ੍ਰਾਪਰਟੀ ਡਿਵਲੈਪਰ ਮੰਗੇਤਰ ਐਡੋਆਰਡੋ ਮਾਪੇਲੀ ਮੋਜੀ ਨਾਲ ਇਕ ਬੇਹੱਦ ਨਿੱਜੀ ਸਮਾਗਮ ਵਿਚ ਵਿਆਹ ਕਰ ਲਿਆ।
ਅਖਬਾਰ 'ਸਨ' ਦੀ ਖਬਰ ਮੁਤਾਬਕ ਮਹਾਰਾਣੀ (94) ਤੇ ਉਸ ਦੇ 99 ਸਾਲਾ ਪਤੀ ਡਿਊਕ ਆਫ ਐਡਿਨਬਰਗ ਰਾਜਕੁਮਾਰ ਫਿਲਿਪ ਆਪਣੇ 60 ਸਾਲਾ ਪੁੱਤਰ ਰਾਜਕੁਮਾਰ ਐਂਡ੍ਰਿਊ ਦੇ ਨਾ ਵਿਆਹ ਵਿਚ ਸ਼ਾਮਲ ਹੋਏ। ਕੋਵਿਡ-19 ਮਹਾਮਾਰੀ ਦੇ ਚੱਲਦੇ ਵਿਆਹ ਵਿਚ ਭੌਤਿਕ ਦੂਰੀ ਸਣੇ ਸਾਰੀਆਂ ਸਾਵਧਾਨੀਆਂ ਵਰਤੀਆਂ ਗਈਆਂ ਤੇ ਇਸ ਵਿਚ ਤਕਰੀਬਨ 20 ਮਹਿਮਾਨ ਹੀ ਸ਼ਾਮਲ ਹੋਏ।
ਬਿਟ੍ਰੀਸ (31) ਨੇ 37 ਸਾਲਾ ਮੋਜੀ ਦੇ ਨਾਲ ਸੇਂਟ ਜੇਮਸ ਪੈਲੇਸ ਵਿਚ ਚੈਪਲ ਰਾਇਲ ਵਿਚ ਮਈ ਵਿਚ 150 ਮਹਿਮਾਨਾਂ ਦੀ ਮੌਜੂਦਗੀ ਵਿਚ ਵਿਆਹ ਕਰਨਾ ਸੀ ਪਰ ਕੋਵਿਡ-19 ਲਾਕਡਾਊਨ ਦੇ ਕਾਰਣ ਵਿਆਹ ਟਲ ਗਿਆ ਸੀ।
ਅਖਬਾਰ ਨੇ ਕਿਹਾ ਕਿ ਬਿਟ੍ਰੀਸ ਨੇ ਵਿਆਹ ਤੋਂ ਪਹਿਲੀ ਰਾਤ ਆਪਣੀ ਮਾਂ ਡਚੇਸ ਆਫ ਯਾਰਕ ਸਾਰਾਹ ਫਗੁਰਸਨ ਤੇ ਪਿਤਾ ਐਂਡ੍ਰਿਊ ਦੇ ਨਾਲ ਗੁਜ਼ਾਰੀ। ਮੋਜੀ ਨਾਲ ਬਿਟ੍ਰੀਸ ਦੀ ਮੰਗਣੀ ਸਤੰਬਰ 2018 ਵਿਚ ਹੋਈ ਸੀ।
