ਕਾਂਗੋ ''ਚ ਜਹਾਜ਼ ਹਾਦਸਾ, 23 ਲੋਕਾਂ ਦੀ ਮੌਤ

ਗੋਮਾ - ਕਾਂਗੋ ਲੋਕਤਾਂਤਰਿਕ ਗਣਰਾਜ ਦੇ ਸ਼ਹਿਰ ਗੋਮਾ 'ਚ ਸ਼ਨੀਵਾਰ ਨੂੰ ਇਕ ਜਹਾਜ਼ ਉਡਾਣ ਭਰਨ ਦੌਰਾਨ ਸੰਘਣੀ ਆਬਾਦੀ ਵਾਲੇ ਖੇਤਰ 'ਚ ਹਾਦਸੇ ਦਾ ਸ਼ਿਕਾਰ ਹੋ ਗਿਆ। ਇਸ ਹਾਦਸੇ 'ਚ 23 ਲੋਕਾਂ ਦੀ ਮੌਤ ਹੋ ਗਈ। ਰਾਹਤ ਅਤੇ ਬਚਾਅ ਦਲ ਨੇ ਇਹ ਜਾਣਕਾਰੀ ਦਿੱਤੀ। ਗੋਮਾ ਬਚਾਅ ਸੇਵਾ ਦੇ ਕੋਆਰਡੀਨੇਟਰ ਜੋਸੈਫ ਮਕੁੰਡੀ ਨੇ ਏ. ਐੱਫ. ਪੀ. ਨੂੰ ਦੱਸਿਆ ਕਿ ਅਸੀਂ ਹੁਣ ਤੱਕ 23 ਲਾਸ਼ਾਂ ਕੱਢ ਚੁੱਕੇ ਹਾਂ।

ਗੋਮਾ ਹਵਾਈ ਅੱਡੇ ਦੇ ਅਧਿਕਾਰੀ ਰਿਚਰਡ ਮੈਂਗੋਲੋਪਾ ਨੇ ਆਖਿਆ ਕਿ ਇਸ ਘਟਨਾ 'ਚ ਕਿਸੇ ਦੇ ਵੀ ਬਚਣ ਦੀ ਉਮੀਦ ਨਹੀਂ ਹੈ। ਡੋਰਨੀਅਰ-228 ਗੋਮਾ ਤੋਂ 350 ਕਿਲੋਮੀਟਰ ਉੱਤਰ 'ਚ ਸਥਿਤ ਬੇਨੀ ਜਾ ਰਿਹਾ ਸੀ ਅਤੇ ਇਹ ਜਹਾਜ਼ ਗੋਮਾ ਹਵਾਈ ਅੱਡੇ ਨੇੜੇ ਇਕ ਇਲਾਕੇ 'ਚ ਡਿੱਗਿਆ। ਬਿਜ਼ੀ ਬੀ ਏਅਰਲਾਈਨ ਦੇ ਕਰਮਚਾਰੀ ਹੈਰੀਟਿਅਰ ਨੇ ਦੱਸਿਆ ਕਿ ਜਹਾਜ਼ 'ਚ 17 ਯਾਤਰੀ ਅਤੇ 2 ਚਾਲਕ ਦਲ ਦੇ ਮੈਂਬਰ ਸਨ ਅਤੇ ਇਸ ਨੇ ਸਵੇਰੇ ਕਰੀਬ 9:15 ਵਜੇ ਉਡਾਣ ਭਰੀ ਸੀ।