ਫਿਲਪੀਨਸ : ਤੂਫਾਨ ਕਾਰਨ 16 ਲੋਕਾਂ ਦੀ ਮੌਤ, ਬਿਜਲੀ ਸਪਲਾਈ ਠੱਪ (ਤਸਵੀਰਾਂ)

ਮਨੀਲਾ (ਬਿਊਰੋ): ਫਿਲਪੀਨਸ ਵਿਚ ਕ੍ਰਿਸਮਸ ਦੇ ਦਿਨ ਆਏ ਤੂਫਾਨ 'ਫੇਨਫੋਨ' ਨਾਲ 16 ਲੋਕਾਂ ਦੀ ਮੌਤ ਹੋ ਗਈ। ਕਰੀਬ 10 ਹਜ਼ਾਰ ਲੋਕਾਂ ਨੂੰ ਸੁਰੱਖਿਅਤ ਸਥਾਨਾਂ 'ਤੇ ਭੇਜਿਆ ਗਿਆ ਹੈ। ਅਧਿਕਾਰੀਆਂ ਨੇ ਵੀਰਵਾਰ ਨੂੰ ਦੱਸਿਆ ਕਿ ਇਸ ਨਾਲ ਜਾਇਦਾਦ ਨੂੰ ਕਾਫੀ ਨੁਕਸਾਨ ਪਹੁੰਚਿਆ।

ਤੂਫਾਨ ਦੌਰਾਨ ਹਵਾ ਦੀ ਗਤੀ 195 ਕਿਲੋਮੀਟਰ ਪ੍ਰਤੀ ਘੰਟਾ ਰਹੀ। ਇਸ ਨਾਲ ਕਈ ਘਰਾਂ ਦੀਆਂ ਛੱਤਾਂ ਉੱਡ ਗਈਆਂ।

ਦੇਸ਼ ਭਰ ਵਿਚ ਬਿਜਲੀ ਸਪਲਾਈ ਠੱਪ ਹੋ ਗਈ। ਕਈ ਖੇਤਰਾਂ ਵਿਚ ਮੋਬਾਈਲ ਅਤੇ ਇੰਟਰਨੈੱਟ ਸੇਵਾਵਾਂ ਵੀ ਪ੍ਰਭਾਵਿਤ ਰਹੀਆਂ। 

ਨਿਊਜ਼ ਏਜੰਸੀ ਦੇ ਮੁਤਾਬਕ ਕਾਲਿਬੋ ਸ਼ਹਿਰ ਦੇ ਹਵਾਈ ਅੱਡੇ 'ਤੇ ਫਸੇ ਇਕ ਕੋਰੀਆਈ ਸੈਲਾਨੀ ਜੁੰਗ ਬਿਉਂਗ ਜੂਨ ਨੇ ਦੱਸਿਆ ਕਿ ਬੋਰਾਕੇ ਜਾਣ ਵਾਲੀਆਂ ਸਾਰੀਆਂ ਉਡਾਣਾਂ ਰੱਦ ਕਰ ਦਿੱਤੀਆਂ ਗਈਆਂ।

ਹਵਾਈ ਅੱਡਾ ਬੁਰੀ ਤਰ੍ਹਾਂ ਨੁਕਸਾਨਿਆ ਗਿਆ। ਅਧਿਕਾਰੀ ਸਥਿਤੀ ਨੂੰ ਸਧਾਰਨ ਕਰਨ ਵਿਚ ਜੁਟੇ ਹਨ। ਬੋਰਾਕੇ, ਕੌਰੌਨ ਸਮੇਤ ਹੋਰ ਸੈਲਾਨੀ ਸਥਲਾਂ ਨੂੰ ਨੁਕਸਾਨ ਪਹੁੰਚਿਆ ਹੈ।

ਇਕ ਸੈਲਾਨੀ ਨੇ ਦੱਸਿਆ ਕਿ ਕਾਲਿਬੋ ਸ਼ਹਿਰ ਵਿਚ ਟੈਕਸੀ ਚੱਲ ਰਹੀ ਹੈ ਪਰ ਹਵਾ ਕਾਫੀ ਤੇਜ਼ ਹੈ ਅਤੇ ਮੀਂਹ ਪੈ ਰਿਹਾ ਹੈ। ਇਸ ਲਈ ਕੋਈ ਵੀ ਹਵਾਈ ਅੱਡੇ ਤੋਂ ਜਾਣਾ ਨਹੀਂ ਚਾਹੁੰਦਾ। ਭਾਵੇਂਕਿ ਫੇਨਫੂਨ 2013 ਵਿਚ ਆਏ ਇੱਥੇ ਆਏ 'ਹੈਯਾਨ' ਤੂਫਾਨ ਨਾਲੋਂ ਘੱਟ ਸ਼ਕਤੀਸ਼ਾਲੀ ਹੈ।

ਹੈਯਾਨ ਨਾਲ 7300 ਤੋਂ ਵੱਧ ਲੋਕ ਮਾਰੇ ਗਏ ਸਨ ਜਾਂ ਲਾਪਤਾ ਹੋ ਗਏ ਸਨ। ਪੱਛਮੀ ਵਿਜਾਸ ਖੇਤਰ ਦੇ ਸੂਚਨਾ ਅਧਿਕਾਰੀ ਸਿੰਡੀ ਫੇਰਰ ਦੇ ਮੁਤਾਬਕ ਇਹ ਤੂਫਾਨ ਹੈਯਾਨ ਨਾਲੋਂ ਘੱਟ ਵਿਨਾਸ਼ਕਾਰੀ ਹੈ।