ਨਾਟਕੀ ਮਹਾਦੋਸ਼ ਤੋਂ ਬਾਅਦ ਦੀਨਾ ਬੋਲੁਆਰਤੇ ਬਣੀ ਪੇਰੂ ਦੀ ਪਹਿਲੀ ਮਹਿਲਾ ਰਾਸ਼ਟਰਪਤੀ

ਲੀਮਾ (ਆਈ.ਏ.ਐੱਨ.ਐੱਸ.)- ਪੇਰੂ ਦੀ ਉਪ ਰਾਸ਼ਟਰਪਤੀ ਦੀਨਾ ਬੋਲੁਆਰਤੇ ਕਥਿਤ ਤੌਰ 'ਤੇ ਉਦੋਂ ਦੇਸ਼ ਦੀ ਪਹਿਲੀ ਮਹਿਲਾ ਰਾਸ਼ਟਰਪਤੀ ਬਣ ਗਈ ਜਦੋਂ ਉਹਨਾਂ ਨੇ ਸਾਬਕਾ ਰਾਸ਼ਟਰਪਤੀ ਪੇਡਰੋ ਕਾਸਟੀਲੋ 'ਤੇ ਮਹਾਦੋਸ਼ ਤੋਂ ਬਾਅਦ ਸਹੁੰ ਚੁੱਕੀ।ਸਮਾਚਾਰ ਏਜੰਸੀ ਸ਼ਿਨਹੂਆ ਦੀ ਰਿਪੋਰਟ ਅਨੁਸਾਰ ਕਾਂਗਰਸ ਦੁਆਰਾ ਕਾਸਟੀਲੋ 'ਤੇ ਲਗਾਏ ਮਹਾਦੋਸ਼ ਦੇ ਪੱਖ ਵਿੱਚ 101, ਵਿਰੋਧ ਵਿੱਚ ਛੇ ਅਤੇ 10 ਗੈਰਹਾਜ਼ਰੀ ਦੇ ਨਾਲ ਉਸ ਨੂੰ ਬਰਖਾਸਤ ਕਰਨ ਤੋਂ ਤੁਰੰਤ ਬਾਅਦ ਬੋਲੁਆਰਤੇ ਨੇ ਬੁੱਧਵਾਰ ਨੂੰ ਸਹੁੰ ਚੁੱਕੀ।

ਜੁਲਾਈ 2021 ਵਿਚ ਅਹੁਦੇ 'ਤੇ ਆਉਣ ਤੋਂ ਬਾਅਦ ਇਹ ਉਸ ਵਿਰੁੱਧ ਤੀਜੀ ਮਹਾਦੋਸ਼ ਦੀ ਕਾਰਵਾਈ ਸੀ।ਪੇਰੂ ਦੀ ਨੈਸ਼ਨਲ ਪੁਲਸ (ਪੀਐਨਪੀ) ਨੇ ਪੁਸ਼ਟੀ ਕੀਤੀ ਕਿ ਸਾਬਕਾ ਰਾਸ਼ਟਰਪਤੀ ਨੂੰ ਉਸ ਦਿਨ ਹਿਰਾਸਤ ਵਿੱਚ ਲਿਆ ਗਿਆ ਜਦੋਂ ਉਸਨੇ ਪਹਿਲਾਂ ਕਿਹਾ ਸੀ ਕਿ ਉਹ ਕਾਂਗਰਸ ਦੀ ਥਾਂ ਇੱਕ "ਅਸਾਧਾਰਨ ਐਮਰਜੈਂਸੀ ਸਰਕਾਰ" ਲਿਆ ਰਹੇ ਹਨ।ਇਸ ਨੇ ਟਵਿੱਟਰ 'ਤੇ ਕਿਹਾ ਕਿ ਆਪਣੀਆਂ ਸ਼ਕਤੀਆਂ ਅਤੇ ਵਿਸ਼ੇਸ਼ਤਾਵਾਂ ਨੂੰ ਪੂਰਾ ਕਰਦੇ ਹੋਏ, ਪੀਐਨਪੀ ਨੇ ਰਾਸ਼ਟਰਪਤੀ ਪੇਡਰੋ ਕਾਸਟੀਲੋ ਨੂੰ ਨਜ਼ਰਬੰਦ ਕੀਤਾ ਗਿਆ।ਇਸ ਨੇ ਇੱਕ ਫੋਟੋ ਵੀ ਪ੍ਰਕਾਸ਼ਿਤ ਕੀਤੀ ਜਿੱਥੇ ਕਾਸਟੀਲੋ ਨੂੰ ਲੀਮਾ ਦੇ ਦੂਜੇ ਪੁਲਸ ਖੇਤਰ ਦੇ ਹੈੱਡਕੁਆਰਟਰ ਵਿੱਚ ਇੱਕ ਕੁਰਸੀ 'ਤੇ ਬੈਠੇ ਦੇਖਿਆ ਜਾ ਸਕਦਾ ਹੈ।

ਪੜ੍ਹੋ ਇਹ ਅਹਿਮ ਖ਼ਬਰ-ਕੈਨੇਡਾ : ਕੋਵਿਡ ਦੌਰਾਨ ਤਾਲਾਬੰਦੀ ਕਾਰਨ 'ਪ੍ਰਵਾਸੀ' ਆਰਥਿਕ ਪੱਖੋਂ ਹੋਏ ਪ੍ਰਭਾਵਿਤ, ਜਾਣੋ ਅੰਕੜੇ

ਸਥਾਨਕ ਮੀਡੀਆ ਦੇ ਅਨੁਸਾਰ ਕਾਂਗਰਸ ਨੂੰ ਭੰਗ ਕਰਨ ਦਾ ਐਲਾਨ ਕਰਨ ਤੋਂ ਬਾਅਦ ਕਾਸਟੀਲੋ ਆਪਣੀ ਪਤਨੀ ਅਤੇ ਸਾਬਕਾ ਪ੍ਰਧਾਨ ਮੰਤਰੀ ਐਨੀਬਲ ਟੋਰੇਸ ਸਮੇਤ ਪਰਿਵਾਰਕ ਮੈਂਬਰਾਂ ਦੇ ਨਾਲ ਸਰਕਾਰੀ ਮਹਿਲ ਛੱਡ ਕੇ ਚਲੇ ਗਏ। ਇੱਕ 60 ਸਾਲਾ ਵਕੀਲ ਬੋਲੁਆਰਤੇ ਨੇ ਕਿਹਾ ਕਿ ਉਹ ਜੁਲਾਈ 2026 ਤੱਕ ਸ਼ਾਸਨ ਕਰੇਗੀ, ਜਦੋਂ ਕੈਸਟੀਲੋ ਦਾ ਰਾਸ਼ਟਰਪਤੀ ਕਾਰਜਕਾਲ ਖ਼ਤਮ ਹੋ ਜਾਵੇਗਾ।ਅਹੁਦੇ ਦੀ ਸਹੁੰ ਚੁੱਕਣ ਤੋਂ ਬਾਅਦ ਬੋਲਦਿਆਂ ਉਸਨੇ ਦੇਸ਼ ਨੂੰ ਜਕੜਨ ਵਾਲੇ ਸੰਕਟ ਨੂੰ ਦੂਰ ਕਰਨ ਲਈ ਰਾਜਨੀਤਿਕ ਸ਼ਾਂਤੀ ਦੀ ਮੰਗ ਕੀਤੀ।ਉਸਨੇ ਕਿਹਾ ਕਿ ਮੈਂ ਦੇਸ਼ ਨੂੰ ਬਚਾਉਣ ਲਈ ਸਮਾਂ ਮੰਗ ਰਹੀ ਹਾਂ।

ਬੀਬੀਸੀ ਨੇ ਰਿਪੋਰਟ ਦਿੱਤੀ ਕਿ ਬੁੱਧਵਾਰ ਦੀਆਂ ਘਟਨਾਵਾਂ ਦੀ ਨਾਟਕੀ ਲੜੀ ਕਾਸਟੀਲੋ ਦੁਆਰਾ ਰਾਸ਼ਟਰੀ ਟੈਲੀਵਿਜ਼ਨ 'ਤੇ ਇੱਕ ਸੰਬੋਧਨ ਦੇ ਨਾਲ ਸ਼ੁਰੂ ਹੋਈ. ਜਿਸ ਵਿੱਚ ਉਸਨੇ ਐਮਰਜੈਂਸੀ ਦੀ ਸਥਿਤੀ ਦਾ ਐਲਾਨ ਕੀਤਾ।ਉਸਨੇ ਘੋਸ਼ਣਾ ਕੀਤੀ ਕਿ ਉਹ ਵਿਰੋਧੀ-ਨਿਯੰਤਰਿਤ ਕਾਂਗਰਸ ਨੂੰ ਭੰਗ ਕਰ ਦੇਵੇਗਾ। ਫਿਲਹਾਲ ਪੇਰੂ ਇੱਕ ਮੁਸ਼ਕਲ ਰਾਜਨੀਤਿਕ ਦੌਰ ਵਿੱਚੋਂ ਲੰਘ ਰਿਹਾ ਹੈ, ਹਾਲ ਹੀ ਦੇ ਸਾਲਾਂ ਵਿੱਚ ਕਈ ਰਾਸ਼ਟਰਪਤੀਆਂ ਨੂੰ ਅਹੁਦੇ ਤੋਂ ਹਟਾ ਦਿੱਤਾ ਗਿਆ ਹੈ। 2020 ਵਿੱਚ ਇਸਦੇ ਪੰਜ ਦਿਨਾਂ ਦੇ ਅੰਦਰ ਤਿੰਨ ਰਾਸ਼ਟਰਪਤੀ ਸਨ।ਕਾਸਟੀਲੋ, ਜੋ ਕਿ ਇੱਕ ਖੱਬੇਪੱਖੀ ਸਾਬਕਾ ਸਕੂਲ ਅਧਿਆਪਕ ਹੈ, ਨੂੰ ਜੂਨ 2021 ਵਿੱਚ ਇੱਕ ਧਰੁਵੀਕਰਨ ਚੋਣ ਵਿੱਚ ਚੁਣਿਆ ਗਿਆ ਸੀ ਜਿਸ ਵਿੱਚ ਉਸਨੇ ਆਪਣੇ ਸੱਜੇ-ਪੱਖੀ ਵਿਰੋਧੀ ਕੀਕੋ ਫੁਜੀਮੋਰੀ ਨੂੰ ਹਰਾਇਆ ਸੀ।ਉਹ ਹਾਲ ਹੀ ਵਿਚ ਭ੍ਰਿਸ਼ਟਾਚਾਰ ਦੇ ਦੋਸ਼ਾਂ ਨਾਲ ਲੜ ਰਿਹਾ ਸੀ, ਜਿਸ ਨੂੰ ਉਸ ਨੇ ਕਿਹਾ ਸੀ ਕਿ ਉਹ ਉਸ ਨੂੰ ਹਟਾਉਣ ਦੀ ਸਾਜ਼ਿਸ਼ ਦਾ ਹਿੱਸਾ ਸਨ।

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।