ਹੋ ਜਾਓ ਸਾਵਧਾਨ! ਮੁੜ ਹੋਈ ਮਹਾਮਾਰੀ ਦੀ ਵਾਪਸੀ, ਇਸ ਦੇਸ਼ ''ਚ ਵਿਗੜੇ ਹਾਲਾਤ

ਇੰਟਰਨੈਸ਼ਨਲ ਡੈਸਕ- ਅਮਰੀਕਾ 'ਚ ਕ੍ਰਿਸਮਸ ਅਤੇ ਨਵੇਂ ਸਾਲ ਦੀਆਂ ਛੁੱਟੀਆਂ ਦੀ ਚਮਕ ਵਿਚਕਾਰ ਸਿਹਤ ਮਾਹਿਰਾਂ ਨੇ ਗੰਭੀਰ ਚਿਤਾਵਨੀ ਜਾਰੀ ਕੀਤੀ ਹੈ। ਤਿਉਹਾਰਾਂ ਕਾਰਨ ਵਧ ਰਹੀ ਭੀੜ, ਕੜਾਕੇ ਦੀ ਠੰਢ ਅਤੇ ਟੀਕਾਕਰਨ ਦੀ ਹੌਲੀ ਗਤੀ ਨੇ ਇਕ ਵਾਰ ਮੁੜ ਸਿਹਤ ਪ੍ਰਣਾਲੀ ਲਈ ਚੁਣੌਤੀ ਖੜੀ ਕਰ ਦਿੱਤੀ ਹੈ। ਦੇਸ਼ 'ਚ ਕੋਵਿਡ-19 ਦੇ ਨਾਲ-ਨਾਲ ਇਨਫਲੂਐਂਜ਼ਾ (ਫਲੂ) ਦੇ ਮਾਮਲੇ ਵੀ ਤੇਜ਼ੀ ਨਾਲ ਵਧ ਰਹੇ ਹਨ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਇੰਡੋਰ ਪਾਰਟੀਆਂ ਅਤੇ ਯਾਤਰਾਵਾਂ ਵਾਇਰਸ ਦੇ ਫੈਲਾਅ ਲਈ ਅਨੁਕੂਲ ਮਾਹੌਲ ਤਿਆਰ ਕਰ ਰਹੀਆਂ ਹਨ, ਜਿਸ ਨਾਲ ਹਸਪਤਾਲਾਂ ‘ਤੇ ਬੋਝ ਵਧ ਸਕਦਾ ਹੈ।

ਕੀ ਕੋਵਿਡ-19 ਮੁੜ ਖਤਰਨਾਕ ਹੋ ਰਿਹਾ ਹੈ?

ਤਾਜ਼ਾ ਅੰਕੜਿਆਂ ਮੁਤਾਬਕ ਕੋਵਿਡ ਦੇ ਮਾਮਲੇ ਵਧ ਰਹੇ ਹਨ, ਪਰ ਹਾਲੇ ਹਾਲਤ ਪਿਛਲੇ ਕੁਝ ਸਾਲਾਂ ਦੀ ਸਰਦੀ ਵਰਗੀ ਗੰਭੀਰ ਨਹੀਂ ਹੈ। ਅਮਰੀਕਾ ਦੇ ਰੋਗ ਕੰਟਰੋਲ ਅਤੇ ਰੋਕਥਾਮ ਕੇਂਦਰ (CDC) ਅਨੁਸਾਰ ਦਸੰਬਰ ਦੇ ਮੱਧ ਤੱਕ 31 ਸੂਬਿਆਂ 'ਚ ਸੰਕਰਮਣ ਵਧਣ ਦੇ ਸੰਕੇਤ ਮਿਲੇ ਹਨ। ਵੈਸਟਵਾਟਰ ਨਿਗਰਾਨੀ ਰਿਪੋਰਟ ਦੱਸਦੀ ਹੈ ਕਿ ਨਵੰਬਰ ਤੋਂ ਬਾਅਦ SARS-CoV-2 ਵਾਇਰਸ ਦੀ ਮੌਜੂਦਗੀ 'ਚ ਲਗਭਗ 21 ਫੀਸਦੀ ਵਾਧਾ ਹੋਇਆ ਹੈ। ਖਾਸ ਕਰਕੇ ਮਿਡਵੈਸਟ ਖੇਤਰ ਦੇ ਸੂਬਿਆਂ 'ਚ ਵਾਇਰਸ ਦੀ ਸਰਗਰਮੀ ਸਭ ਤੋਂ ਜ਼ਿਆਦਾ ਦਰਜ ਕੀਤੀ ਗਈ ਹੈ।

ਸਰਦੀਆਂ ‘ਚ ਹੀ ਕਿਉਂ ਵਧਦੇ ਹਨ ਮਾਮਲੇ?

ਮਾਹਿਰਾਂ ਨੇ ਕੋਵਿਡ ਅਤੇ ਫਲੂ ਦੇ ਵਾਧੇ ਪਿੱਛੇ ਚਾਰ ਮੁੱਖ ਕਾਰਨ ਗਿਣਾਏ ਹਨ:

ਕਮਜ਼ੋਰ ਇਮਿਊਨਿਟੀ: ਸਮੇਂ ਨਾਲ ਪਿਛਲੇ ਟੀਕੇ ਜਾਂ ਇਨਫੈਕਸ਼ਨ ਨਾਲ ਬਣੀ ਰੋਗ-ਰੋਕੂ ਤਾਕਤ ਘਟ ਜਾਂਦੀ ਹੈ।

ਬੰਦ ਥਾਵਾਂ ‘ਚ ਭੀੜ: ਠੰਢ ਕਾਰਨ ਲੋਕ ਘਰਾਂ ਦੇ ਅੰਦਰ ਜ਼ਿਆਦਾ ਰਹਿੰਦੇ ਹਨ, ਜਿੱਥੇ ਘੱਟ ਵੈਂਟੀਲੇਸ਼ਨ ਨਾਲ ਵਾਇਰਸ ਤੇਜ਼ੀ ਨਾਲ ਫੈਲਦਾ ਹੈ।

ਨਵੇਂ ਵੈਰੀਐਂਟ: ‘ਸਟ੍ਰੈਟਸ’ (XFG ਵੈਰੀਐਂਟ) ਵਰਗੇ ਹੋਰ ਜ਼ਿਆਦਾ ਸੰਕਰਮਕ ਰੂਪ।

ਤਿਉਹਾਰੀ ਮਿਲਾਪ: ਛੁੱਟੀਆਂ ਦੌਰਾਨ ਯਾਤਰਾ ਅਤੇ ਸਮਾਜਿਕ ਸਮਾਗਮਾਂ ‘ਚ ਵਧਦਾ ਮਿਲਣਾ-ਜੁਲਣਾ।

ਇਨ੍ਹਾਂ ਸੂਬਿਆਂ 'ਚ ਅਲਰਟ

ਮਿਡਵੈਸਟ ਅਤੇ ਨੌਰਥਈਸਟ ਖੇਤਰਾਂ 'ਚ ਸੰਕਰਮਣ ਦੀ ਰਫ਼ਤਾਰ ਸਭ ਤੋਂ ਉੱਚੀ ਹੈ। 18 ਦਸੰਬਰ ਤੱਕ ਦੇ ਅੰਕੜਿਆਂ ਮੁਤਾਬਕ ਮਿਸ਼ੀਗਨ, ਓਹਾਇਓ, ਕੇਂਟਕੀ, ਏਰਿਜੋਨਾ, ਮੈਸਾਚੂਸੇਟਸ, ਮਿਨੀਸੋਟਾ, ਨਿਊ ਮੈਕਸੀਕੋ ਅਤੇ ਵੈਸਟ ਵਰਜੀਨੀਆ ਵਿੱਚ ਵਾਇਰਸ ਦੀ ਸਰਗਰਮੀ ‘ਮੱਧਮ ਤੋਂ ਉੱਚ’ ਪੱਧਰ ‘ਤੇ ਹੈ। ਖ਼ਾਸ ਕਰਕੇ 65 ਸਾਲ ਤੋਂ ਵੱਧ ਉਮਰ ਦੇ ਲੋਕਾਂ ਦੀ ਹਸਪਤਾਲ ਭਰਤੀ ਦਰ ਵਿੱਚ ਹੌਲੀ-ਹੌਲੀ ਵਾਧਾ ਦੇਖਿਆ ਜਾ ਰਿਹਾ ਹੈ।

ਬਚਾਅ ਲਈ ਸਿਹਤ ਵਿਭਾਗ ਦੀ ਸਲਾਹ

ਵਧ ਰਹੇ ਮਾਮਲਿਆਂ ਨੂੰ ਦੇਖਦੇ ਹੋਏ ਸਿਹਤ ਏਜੰਸੀਆਂ ਨੇ ਲੋਕਾਂ ਲਈ ਗਾਈਡਲਾਈਨ ਜਾਰੀ ਕੀਤੀ ਹੈ:

• ਇਸ ਸੀਜ਼ਨ ਦੀ ਅਪਡੇਟਡ ਵੈਕਸੀਨ ਜਾਂ ਬੂਸਟਰ ਡੋਜ਼ ਜ਼ਰੂਰ ਲਗਵਾਓ।
• ਭੀੜ-ਭਾੜ ਵਾਲੀਆਂ ਬੰਦ ਥਾਵਾਂ ਅਤੇ ਜਨਤਕ ਆਵਾਜਾਈ ‘ਚ ਮਾਸਕ ਪਹਿਨੋ।
• ਹੱਥਾਂ ਦੀ ਸਫ਼ਾਈ ਰੱਖੋ ਅਤੇ ਸੈਨੀਟਾਈਜ਼ਰ ਵਰਤੋਂ।
• ਜੇ ਸਰਦੀ-ਬੁਖਾਰ ਦੇ ਲੱਛਣ ਹੋਣ ਤਾਂ ਸਮਾਜਿਕ ਸਮਾਗਮਾਂ ਤੋਂ ਦੂਰ ਰਹੋ ਅਤੇ ਟੈਸਟ ਕਰਵਾਓ।