ਪਾਕਿਸਤਾਨ ''ਚ 100 ਤੋਂ ਵੱਧ ਸੰਸਦ ਮੈਂਬਰ ਨਹੀਂ ਕਰ ਰਹੇ ਆਮਦਨ ਟੈਕਸ ਦਾ ਭੁਗਤਾਨ

ਇਸਲਾਮਾਬਾਦ (ਆਈ.ਏ.ਐੱਨ.ਐੱਸ): ਪਾਕਿਸਤਾਨ ਵਿੱਚ 100 ਤੋਂ ਵੱਧ ਸੰਸਦ ਮੈਂਬਰ ਜਾਂ ਤਾਂ ਆਮਦਨ ਟੈਕਸ ਦਾ ਭੁਗਤਾਨ ਨਹੀਂ ਕਰ ਰਹੇ ਹਨ ਜਾਂ ਪਾਕਿਸਤਾਨ ਫੈਡਰਲ ਬੋਰਡ ਆਫ਼ ਰੈਵੇਨਿਊ (FBR) ਵਿੱਚ ਰਜਿਸਟਰਡ ਨਹੀਂ ਹਨ।ਦੀ ਨਿਊਜ਼ ਨੇ ਇਹ ਜਾਣਕਾਰੀ ਦਿੱਤੀ। ਪਾਕਿਸਤਾਨ ਦੇ 1,170 ਸੰਸਦ ਮੈਂਬਰਾਂ ਵਿੱਚੋਂ 161 ਸੰਸਦ ਮੈਂਬਰਾਂ ਨੇ ਆਪਣੀ ਆਮਦਨ 'ਤੇ ਟੈਕਸ ਦਾ ਭੁਗਤਾਨ ਨਹੀਂ ਕੀਤਾ ਹੈ ਅਤੇ ਨਾ ਹੀ ਕੋਈ ਟੈਕਸ ਰਿਟਰਨ ਭਰੀ ਹੈ। ਇਹ ਸੰਸਦ ਮੈਂਬਰ ਸਮੂਹਿਕ ਤੌਰ 'ਤੇ 35 ਅਰਬ ਰੁਪਏ ਦੀ ਸੰਪੱਤੀ ਦੇ ਮਾਲਕ ਹੁੰਦੇ ਹੋਏ ਟੈਕਸ ਕਾਨੂੰਨਾਂ ਦੀ ਉਲੰਘਣਾ ਕਰ ਰਹੇ ਹਨ। ਅਧਿਕਾਰਤ ਰਿਕਾਰਡ ਦਰਸਾਉਂਦੇ ਹਨ ਕਿ ਕੁਝ ਮੈਂਬਰ ਤਾਂ ਟੈਕਸ ਅਥਾਰਟੀਆਂ ਕੋਲ ਰਜਿਸਟਰਡ ਵੀ ਨਹੀਂ ਹਨ।

ਜੀਓ ਨਿਊਜ਼ ਦੁਆਰਾ ਜਾਂਚੇ ਗਏ ਅਧਿਕਾਰਤ ਦਸਤਾਵੇਜ਼ਾਂ ਵਿੱਚ ਖੁਲਾਸਾ ਹੋਇਆ ਹੈ ਕਿ 103 ਤੋਂ ਵੱਧ ਸੰਸਦ ਮੈਂਬਰਾਂ ਕੋਲ 8 ਅਰਬ ਰੁਪਏ ਦੀ ਸੰਪੱਤੀ ਹੈ ਪਰ ਉਹ ਸਰਗਰਮ ਟੈਕਸਦਾਤਾ ਨਹੀਂ ਹਨ। ਕੁਝ ਦਰਜਨ ਤਾਂ ਟੈਕਸਦਾਤਾ ਵਜੋਂ ਐਫਬੀਆਰ ਨਾਲ ਰਜਿਸਟਰਡ ਵੀ ਨਹੀਂ ਹਨ।ਇਨ੍ਹਾਂ 103 ਸੰਸਦ ਮੈਂਬਰਾਂ ਵਿੱਚੋਂ 76 ਪ੍ਰਮੁੱਖ ਸਿਆਸੀ ਪਾਰਟੀਆਂ ਦੀ ਨੁਮਾਇੰਦਗੀ ਕਰਦੇ ਹਨ, ਇਹਨਾਂ ਵਿਚ  ਪਾਕਿਸਤਾਨੀ ਪ੍ਰਧਾਨ ਮੰਤਰੀ ਇਮਰਾਨ ਖਾਨ ਦੀ ਕੈਬਨਿਟ ਵਿੱਚ ਦੋ ਮੰਤਰੀ ਹਨ।ਅਧਿਕਾਰਤ ਰਿਕਾਰਡ ਦੱਸਦੇ ਹਨ ਕਿ ਇਹ ਸੰਸਦ ਮੈਂਬਰ ‘ਇਨ-ਐਕਟਿਵ ਟੈਕਸਪੇਅਰਜ਼ ਲਿਸਟ’ ਵਿੱਚ ਹਨ। 

ਪੜ੍ਹੋ ਇਹ ਅਹਿਮ ਖਬਰ -ਪਾਕਿ-ਭਾਰਤ ਸਬੰਧ : ਨੇੜੇ ਆਏ ਪਰ ਹਾਲੇ ਵੀ ਕਾਫੀ ਦੂਰੀ ਹੈ

ਚਾਰ ਸੰਸਦ ਮੈਂਬਰ ਜੋ ਸਰਗਰਮ ਟੈਕਸਦਾਤਾ ਨਹੀਂ ਹਨ, ਨੇ ਪਿਛਲੇ ਇੱਕ ਦਹਾਕੇ ਵਿੱਚ ਦੁਬਈ, ਨਾਰਵੇ ਅਤੇ ਲੰਡਨ ਵਿੱਚ ਲੱਖਾਂ ਡਾਲਰਾਂ ਦੀਆਂ ਸੰਪੱਤੀਆਂ ਖਰੀਦੀਆਂ ਹਨ। ਰਿਪੋਰਟ ਵਿਚ ਕਿਹਾ ਗਿਆ ਹੈ ਕਿ ਉਨ੍ਹਾਂ ਵਿਚੋਂ ਲਗਭਗ ਇਕ ਦਰਜਨ ਨੇ ਦੇਸ਼ ਵਿਚ ਨਿਰਮਾਣ ਕੰਪਨੀਆਂ, ਪੈਟਰੋਲ ਪੰਪਾਂ ਆਦਿ ਦੇ ਕਾਰੋਬਾਰਾਂ ਦਾ ਐਲਾਨ ਕੀਤਾ ਹੈ।ਵਿੱਤੀ ਸਾਲ 2018 ਲਈ ਸੰਸਦ ਦੀ ਟੈਕਸ ਡਾਇਰੈਕਟਰੀ ਵਿੱਚ ਕੁੱਲ 1,170 ਸੰਸਦ ਮੈਂਬਰਾਂ ਵਿੱਚੋਂ ਲਗਭਗ 323 ਦਾ ਟੈਕਸ ਰਿਕਾਰਡ ਨਹੀਂ ਸੀ। ਐਫਬੀਆਰ ਡਾਇਰੈਕਟਰੀ ਮੁਤਾਬਕ ਲਗਭਗ 847 ਸੰਸਦ ਮੈਂਬਰਾਂ ਨੇ ਸਾਲ 2018-19 ਲਈ ਸਮੂਹਿਕ ਤੌਰ 'ਤੇ ਲਗਭਗ 1.6 ਅਰਬ ਰੁਪਏ ਟੈਕਸ ਅਦਾ ਕੀਤੇ ਹਨ। ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਡਾਇਰੈਕਟਰੀ ਵਿੱਚ ਕੁੱਲ 1,008 ਸੰਸਦ ਮੈਂਬਰਾਂ ਦੇ ਟੈਕਸ ਵੇਰਵੇ ਹਨ, ਜਦੋਂ ਕਿ 161 ਸੰਸਦ ਮੈਂਬਰਾਂ ਦੇ ਟੈਕਸ ਕਾਲਮ ਖਾਲੀ ਛੱਡੇ ਗਏ ਹਨ ਅਤੇ ਕੁਝ ਨਾਮ ਇਸ ਮਹੱਤਵਪੂਰਨ ਅਧਿਕਾਰਤ ਦਸਤਾਵੇਜ਼ ਵਿੱਚੋਂ ਗਾਇਬ ਹਨ।