WHO ਦੀ ਚਿਤਾਵਨੀ, ਡੈਲਟਾ ਦੇ ਮੁਕਾਬਲੇ ਤੇਜ਼ੀ ਨਾਲ ਫੈਲ ਰਿਹਾ ''ਓਮੀਕਰੋਨ''

ਸੰਯੁਕਤ ਰਾਸ਼ਟਰ/ਜੇਨੇਵਾ (ਭਾਸ਼ਾ): ਕੋਰੋਨਾ ਵਾਇਰਸ ਦਾ ਓਮੀਕਰੋਨ ਰੂਪ ਤੇਜ਼ੀ ਨਾਲ ਆਪਣੇ ਡੈਲਟਾ ਰੂਪ ਨੂੰ ਪਛਾੜ ਰਿਹਾ ਹੈ ਅਤੇ ਇਸ ਰੂਪ ਨਾਲ ਸੰਕਰਮਣ ਦੇ ਮਾਮਲੇ ਹੁਣ ਪੂਰੀ ਦੁਨੀਆ ਵਿੱਚ ਵੱਧ ਤੋਂ ਵੱਧ ਸਾਹਮਣੇ ਆ ਰਹੇ ਹਨ। ਵਿਸ਼ਵ ਸਿਹਤ ਸੰਗਠਨ (WHO) ਦੇ ਇੱਕ ਸੀਨੀਅਰ ਅਧਿਕਾਰੀ ਨੇ ਇਸ ਸਬੰਧ ਵਿੱਚ ਚਿਤਾਵਨੀ ਦਿੱਤੀ ਹੈ। ਗਲੋਬਲ ਹੈਲਥ ਏਜੰਸੀ ਦੇ ਇੱਕ ਅਧਿਕਾਰੀ ਨੇ ਚਿਤਾਵਨੀ ਦਿੱਤੀ ਹੈ ਕਿ ਇਸ ਗੱਲ ਦੇ ਸਬੂਤ ਵੱਧ ਰਹੇ ਕਿ ਓਮੀਕਰੋਨ ਪ੍ਰਤੀਰੋਧਕ ਸ਼ਕਤੀ ਤੋਂ ਬਚ ਸਕਦਾ ਹੈ ਪਰ ਬਿਮਾਰੀ ਦੀ ਗੰਭੀਰਤਾ ਹੋਰ ਰੂਪਾਂ ਨਾਲੋਂ ਘੱਟ ਹੈ। 

ਡਬਲਯੂਐਚਓ ਦੇ ਛੂਤ ਰੋਗ ਮਹਾਮਾਰੀ ਵਿਗਿਆਨੀ ਅਤੇ "ਕੋਵਿਡ-19 ਤਕਨੀਕੀ ਲੀਡ" ਮਾਰੀਆ ਵੈਨ ਕੇਰਖੋਵ ਨੇ ਮੰਗਲਵਾਰ ਨੂੰ ਕਿਹਾ ਕਿ ਓਮੀਕਰੋਨ ਨੂੰ ਕੁਝ ਦੇਸ਼ਾਂ ਵਿੱਚ ਡੈਲਟਾ 'ਤੇ ਹਾਵੀ ਹੋਣ ਵਿੱਚ ਸਮਾਂ ਲੱਗ ਸਕਦਾ ਹੈ ਕਿਉਂਕਿ ਇਹ ਉਨ੍ਹਾਂ ਦੇਸ਼ਾਂ ਵਿੱਚ ਡੈਲਟਾ-ਰੂਪ ਦੇ ਫੈਲਣ ਦੇ ਪੱਧਰ 'ਤੇ ਨਿਰਭਰ ਕਰੇਗਾ। ਕੇਰਖੋਵ ਨੇ ਆਨਲਾਈਨ ਸਵਾਲ-ਜਵਾਬ ਸੈਸ਼ਨ ਦੌਰਾਨ ਕਿਹਾ ਕਿ ਓਮੀਕਰੋਨ ਉਨ੍ਹਾਂ ਸਾਰੇ ਦੇਸ਼ਾਂ ਵਿੱਚ ਪਾਇਆ ਗਿਆ ਹੈ ਜਿੱਥੇ ਜੀਨੋਮ ਕ੍ਰਮ ਦੀ ਤਕਨਾਲੋਜੀ ਚੰਗੀ ਹੈ ਅਤੇ ਇਹ ਸ਼ਾਇਦ ਦੁਨੀਆ ਦੇ ਸਾਰੇ ਦੇਸ਼ਾਂ ਵਿੱਚ ਮੌਜੂਦ ਹੈ। ਫੈਲਣ ਦੇ ਮਾਮਲੇ ਵਿੱਚ ਇਹ ਤੇਜ਼ੀ ਨਾਲ ਡੈਲਟਾ ਨੂੰ ਪਛਾੜ ਰਿਹਾ ਹੈ। ਇਸ ਲਈ ਓਮੀਕਰੋਨ ਪ੍ਰਮੁੱਖ ਰੂਪ ਬਣ ਰਿਹਾ ਹੈ ਜਿਸ ਦੇ ਮਾਮਲੇ ਸਾਹਮਣੇ ਆ ਰਹੇ ਹਨ। 

ਪੜ੍ਹੋ ਇਹ ਅਹਿਮ ਖ਼ਬਰ- ਗਾਰਸੇਟੀ ਭਾਰਤ 'ਚ ਨਵੇਂ ਅਮਰੀਕੀ ਰਾਜਦੂਤ ਨਾਮਜ਼ਦ, ਅੱਜ ਹੋਵੇਗੀ ਵੋਟਿੰਗ

ਉਹਨਾਂ ਨੇ ਇਸ ਬਾਰੇ ਵੀ ਸਾਵਧਾਨ ਕੀਤਾ ਕਿ ਹਾਲਾਂਕਿ ਓਮੀਕਰੋਨ ਦੇ ਡੈਲਟਾ ਰੂਪ ਨਾਲੋਂ ਘੱਟ ਗੰਭੀਰ ਹੋਣ ਬਾਰੇ ਕੁਝ ਜਾਣਕਾਰੀ ਹੈ, "ਇਹ ਇੱਕ ਹਲਕੀ ਬਿਮਾਰੀ ਨਹੀਂ ਹੈ" ਕਿਉਂਕਿ "ਓਮੀਕਰੋਨ ਵਿਚ ਹਸਪਤਾਲ ਵਿੱਚ ਦਾਖਲ ਹੋਣ ਦੀ ਨੌਬਤ ਤੱਕ ਆ ਰਹੀ ਹੈ। ਡਬਲਯੂਐਚਓ ਦੁਆਰਾ ਜਾਰੀ ਕੀਤੇ ਗਏ ਕੋਵਿਡ-19 ਹਫ਼ਤਾਵਾਰੀ ਮਹਾਮਾਰੀ ਅਪਡੇਟ ਦੇ ਅੰਕੜਿਆਂ ਮੁਤਾਬਕ 3 ਤੋਂ 9 ਜਨਵਰੀ ਦੇ ਹਫ਼ਤੇ ਵਿੱਚ ਦੁਨੀਆ ਭਰ ਵਿੱਚ ਕੋਵਿਡ ਦੇ 15 ਮਿਲੀਅਨ ਨਵੇਂ ਕੇਸ ਸਾਹਮਣੇ ਆਏ, ਜੋ ਕਿ ਉਸ ਤੋਂ ਇੱਕ ਹਫ਼ਤੇ ਪਹਿਲਾਂ ਦੇ ਮੁਕਾਬਲੇ 55 ਪ੍ਰਤੀਸ਼ਤ ਵੱਧ ਹੈ, ਜਦੋਂ ਲਗਭਗ 95 ਲੱਖ ਕੇਸ ਸਨ। ਪਿਛਲੇ ਹਫ਼ਤੇ ਕਰੀਬ 43,000 ਮਰੀਜ਼ਾਂ ਦੀ ਮੌਤ ਦੇ ਮਾਮਲੇ ਸਾਹਮਣੇ ਆਏ ਸਨ। 9 ਜਨਵਰੀ ਤੱਕ ਕੋਵਿਡ-19 ਦੇ 30.40 ਕਰੋੜ ਤੋਂ ਵੱਧ ਮਾਮਲੇ ਸਾਹਮਣੇ ਆ ਚੁੱਕੇ ਹਨ ਅਤੇ 54 ਲੱਖ ਤੋਂ ਵੱਧ ਲੋਕਾਂ ਦੀ ਮੌਤ ਹੋ ਚੁੱਕੀ ਹੈ।

ਨੋਟ- ਉਕਤ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।