ਇਮਰਾਨ ਖ਼ਿਲਾਫ਼ ਧਾਰਮਿਕ ਨਫ਼ਰਤ ਫੈਲਾਉਣ ਦੇ ਦੋਸ਼ ''ਚ ਪਾਕਿ ਮੰਤਰੀਆਂ ਵਿਰੁੱਧ ਮਾਮਲਾ ਦਰਜ

ਲਾਹੌਰ (ਏਜੰਸੀ)- ਪਾਕਿਸਤਾਨ ਦੇ ਪੰਜਾਬ ਸੂਬੇ ਦੀ ਸਰਕਾਰ ਨੇ ਦੇਸ਼ ਦੇ ਸਾਬਕਾ ਪ੍ਰਧਾਨ ਮੰਤਰੀ ਇਮਰਾਨ ਖ਼ਾਨ ਨੂੰ 'ਗ਼ੈਰ-ਮੁਸਲਿਮ' ਕਹਿ ਕੇ ਅਤੇ ਉਨ੍ਹਾਂ ਖ਼ਿਲਾਫ਼ ਧਾਰਮਿਕ ਨਫ਼ਰਤ ਭੜਕਾ ਕੇ ਉਨ੍ਹਾਂ ਦਾ ਜੀਵਨ ਖ਼ਤਰੇ ਵਿਚ ਪਾਉਣ ਦੇ ਦੋਸ਼ ਹੇਠ ਸੋਮਵਾਰ ਨੂੰ ਪਾਕਿਸਤਾਨ ਮਸਲਿਮ ਲੀਗ ਨਵਾਜ਼ (ਪੀ.ਐੱਮ.ਐੱਲ.-ਐੱਨ) ਦੇ ਦੋ ਸੀਨੀਅਰ ਮੰਤਰੀਆਂ ਅਤੇ ਇੱਕ ਸਰਕਾਰੀ ਟੈਲੀਵਿਜ਼ਨ ਚੈਨਲ ਦੇ ਮੰਤਰੀਆਂ 'ਤੇ ਮਾਮਲਾ ਦਰਜ ਕੀਤਾ ਹੈ। ਲਾਹੌਰ ਦੀ ਗ੍ਰੀਨ ਟਾਊਨ ਪੁਲਸ ਨੇ ਪਾਕਿਸਤਾਨ ਮੁਸਲਿਮ ਲੀਗ ਨਵਾਜ਼ (ਪੀ.ਐੱਮ.ਐੱਲ.-ਐੱਨ) ਦੇ ਮੰਤਰੀਆਂ ਮਰੀਅਮ ਔਰੰਗਜ਼ੇਬ ਅਤੇ ਮੀਆਂ ਜਾਵੇਦ ਲਤੀਫ਼ ਅਤੇ ਪਾਕਿਸਤਾਨ ਟੈਲੀਵਿਜ਼ਨ (ਪੀਟੀਵੀ) ਦੇ ਮੈਨੇਜਿੰਗ ਡਾਇਰੈਕਟਰ ਸੋਹੇਲ ਖਾਨ ਅਤੇ ਪ੍ਰੋਗਰਾਮ ਕੰਟਰੋਲਰ ਰਾਸ਼ਿਦ ਬੇਗ ਦੇ ਖ਼ਿਲਾਫ਼ ਇੱਕ ਮੌਲਵੀ ਦੀ ਸ਼ਿਕਾਇਤ 'ਤੇ ਅੱਤਵਾਦ ਰੋਕੂ ਐਕਟ 1997 ਦੇ ਤਹਿਤ ਐੱਫ.ਆਈ.ਆਰ. ਦਰਜ ਕੀਤੀ।

ਐੱਫ.ਆਈ.ਆਰ. ਅਨੁਸਾਰ ਲਤੀਫ ਨੇ ਪਾਕਿਸਤਾਨ ਤਹਿਰੀਕ-ਏ-ਇਨਸਾਫ (ਪੀਟੀਆਈ) ਦੇ ਪ੍ਰਧਾਨ ਖਾਨ ਨੂੰ "14 ਸਤੰਬਰ ਨੂੰ ਇੱਕ ਪ੍ਰੈਸ ਕਾਨਫਰੰਸ ਵਿੱਚ ਗੈਰ-ਮੁਸਲਿਮ ਅਤੇ ਘੱਟ ਗਿਣਤੀ ਅਹਿਮਦੀਆ ਭਾਈਚਾਰੇ ਨੂੰ ਸੁਵਿਧਾਵਾਂ ਦੇਣ ਵਾਲਾ" ਕਰਾਰ ਦਿੱਤਾ ਸੀ। ਇਸ ਵਿਚ ਕਿਹਾ ਗਿਆ ਕਿ ਲਤੀਫ ਨੇ ਸੂਚਨਾ ਮੰਤਰੀ ਔਰੰਗਜ਼ੇਬ ਅਤੇ ਪੀਟੀਵੀ ਦੇ ਪ੍ਰਬੰਧ ਨਿਰਦੇਸ਼ਕ ਅਤੇ ਪ੍ਰੋਗਰਾਮ ਕੰਟਰੋਲਰ ਦੇ ਸਹਿਯੋਗ ਨਾਲ ਪ੍ਰੈਸ ਕਾਨਫਰੰਸ ਕੀਤੀ। ਇਸ ਵਿਚ ਕਿਹਾ ਗਿਆ, “ਇਸ ਤਰ੍ਹਾਂ ਕਰ ਕੇ ਇਨ੍ਹਾਂ ਮੰਤਰੀਆਂ ਅਤੇ ਪੀਟੀਵੀ ਅਧਿਕਾਰੀਆਂ ਨੇ ਪੀ.ਟੀ.ਆਈ. ਪ੍ਰਧਾਨ ਇਮਰਾਨ ਖ਼ਾਨ ਵਿਰੁੱਧ ਨਫ਼ਰਤ ਫੈਲਾਈ ਅਤੇ ਉਨ੍ਹਾਂ ਦੀ ਜਾਨ ਨੂੰ ਖ਼ਤਰੇ ਵਿੱਚ ਪਾਇਆ।