ਚੀਨ ਤੋਂ 206 ਜਾਪਾਨੀ ਲੋਕਾਂ ਨੂੰ ਲੈ ਕੇ ਵਾਪਸ ਪਹੁੰਚਿਆ ਜਹਾਜ਼

ਟੋਕੀਓ (ਭਾਸ਼ਾ): ਕੋਰੋਨਾਵਾਇਰਸ ਨਾਲ ਪ੍ਰਭਾਵਿਤ ਚੀਨ ਦੇ ਵੁਹਾਨ ਸ਼ਹਿਰ ਤੋਂ ਜਾਪਾਨ ਦੇ ਲੋਕਾਂ ਦੇ ਪਹਿਲੇ ਸਮੂਹ ਨੂੰ ਲੈ ਕੇ ਇਕ ਜਹਾਜ਼ ਬੁੱਧਵਾਰ ਨੂੰ ਟੋਕੀਓ ਵਾਪਸ ਪਹੁੰਚਿਆ। ਜਹਾਜ਼ ਵਿਚ ਲਿਆਂਦੇ ਗਏ 206 ਲੋਕਾਂ ਵਿਚੋ 4 ਖੰਘ ਅਤੇ ਬੁਖਾਰ ਨਾਲ ਪੀੜਤ ਹਨ। ਉਹਨਾਂ ਨੂੰ ਛੂਤ ਦੇ ਰੋਗਾਂ ਦੇ ਇਲਾਜ ਵਿਚ ਮੁਹਾਰਤ ਰੱਖਣ ਵਾਲੇ ਟੋਕੀਓ ਦੇ ਇਕ ਹਸਪਤਾਲ ਵਿਚ ਭਰਤੀ ਕਰਵਾਇਆ ਗਿਆ ਹੈ। ਭਾਵੇਂਕਿ ਸਿਹਤ ਮੰਤਰਾਲੇ ਨੇ ਹਾਲੇ ਕਿਸੇ ਵੀ ਯਾਤਰੀ ਦੇ ਵਾਇਰਸ ਨਾਲ ਇਨਫੈਕਟਿਡ ਹੋਣ ਦੀ ਪੁਸ਼ਟੀ ਨਹੀਂ ਕੀਤੀ ਹੈ।

ਜਾਪਾਨ ਦੀ ਸਰਕਾਰ ਨੇ ਆਪਣੇ ਲੋਕਾਂ ਨੂੰ ਲਿਆਉਣ ਲਈ ਇਕ ਚਾਰਟਰਡ ਜਹਾਜ਼ ਭੇਜਿਆ ਸੀ। ਇਹਨਾਂ ਵਿਚ ਜ਼ਿਆਦਾਤਰ ਜਾਪਾਨੀ ਵੁਹਾਨ ਦੇ ਉਸ ਸੀ-ਫੂਡ ਬਾਜ਼ਾਰ ਦੇ ਨੇੜੇ ਰਹਿੰਦੇ ਸਨ ਜਿੱਥੋਂ ਦੀ ਕੋਰੋਨਾਵਾਇਰਸ ਦਾ ਪਹਿਲਾ ਮਾਮਲਾ ਸਾਹਮਣੇ ਆਇਆ ਸੀ। ਇੱਥੇ ਲਿਆਂਦੇ ਗਏ ਸਾਰੇ ਜਾਪਾਨੀ ਲੋਕਾਂ ਨੇ ਮਾਸਕ ਪਹਿਨੇ ਹੋਏ ਸਨ। ਜਾਪਾਨ ਵਿਚ ਹੁਣ ਤੱਕ ਇਸ ਵਾਇਰਸ ਦੇ 7 ਮਾਮਲੇ ਸਾਹਮਣੇ ਆਏ ਹਨ। ਇਸ ਵਿਚ ਇਕ ਮਾਮਲਾ ਮਨੁੱਖ ਤੋਂ ਮਨੁੱਖ ਵਿਚ ਫੈਲੇ ਇਨਫੈਕਸ਼ਨ ਦਾ ਵੀ ਹੈ ਜਿਸ ਵਿਚ 60 ਸਾਲ ਦੇ ਇਕ ਟੂਰ ਬੱਸ ਡਰਾਈਵਰ ਨੇ ਵੁਹਾਨ ਤੋਂ 8 ਤੋਂ 16 ਜਨਵਰੀ ਦੇ ਟੂਰ 'ਤੇ ਆਏ ਚੀਨ ਦੇ ਦੋ ਸੈਲਾਨੀ ਸਮੂਹਾਂ ਨੂੰ ਲਿਆਉਣ-ਲਿਜਾਣ ਦਾ ਕੰਮ ਕੀਤਾ ਸੀ। ਇਸ ਡਰਾਈਵਰ ਵਿਚ 14 ਜਨਵਰੀ ਨੂੰ ਇਹ ਲੱਛਣ ਨਜ਼ਰ ਆਉਣ ਲੱਗੇ ਸਨ।