ਹਿਜਾਬ ਤੋਂ ਬਿਨਾਂ ਗਾਉਣਾ ਪਿਆ ਭਾਰੀ, ਈਰਾਨੀ ਗਾਇਕਾ ਨੂੰ 74 ਕੋੜਿਆਂ ਦੀ ਸਜ਼ਾ

ਤੇਹਰਾਨ : ਈਰਾਨ ਦੀ ਇੱਕ ਅਦਾਲਤ ਨੇ ਮਸ਼ਹੂਰ ਗਾਇਕਾ ਅਤੇ ਕੰਪੋਜ਼ਰ ਪਰਸਤੂ ਅਹਿਮਦੀ ਨੂੰ ਇੱਕ ਆਨਲਾਈਨ ਕੰਸਰਟ ਦੌਰਾਨ ਹਿਜਾਬ ਨਾ ਪਹਿਨਣ ਅਤੇ ਬਿਨਾਂ ਬਾਹਾਂ ਵਾਲੀ ਡਰੈੱਸ ਪਹਿਨਣ ਦੇ ਦੋਸ਼ ਵਿੱਚ 74 ਕੋੜੇ ਮਾਰਨ ਦੀ ਸਜ਼ਾ ਸੁਣਾਈ ਹੈ। ਇਸ ਫੈਸਲੇ ਤੋਂ ਬਾਅਦ ਮਨੁੱਖੀ ਅਧਿਕਾਰ ਕਾਰਕੁਨਾਂ ਅਤੇ ਕਲਾਕਾਰਾਂ ਵਿੱਚ ਭਾਰੀ ਰੋਸ ਪਾਇਆ ਜਾ ਰਿਹਾ ਹੈ ਅਤੇ ਸੋਸ਼ਲ ਮੀਡੀਆ 'ਤੇ ਇਸ ਦੀ ਤਿੱਖੀ ਆਲੋਚਨਾ ਹੋ ਰਹੀ ਹੈ।

ਜਾਣਕਾਰੀ ਅਨੁਸਾਰ, ਇਹ ਵਿਵਾਦ ਦਸੰਬਰ 2024 ਵਿੱਚ ਸ਼ੁਰੂ ਹੋਇਆ ਸੀ ਜਦੋਂ 29 ਸਾਲਾ ਪਰਸਤੂ ਨੇ ਯੂਟਿਊਬ (YouTube) 'ਤੇ ਇੱਕ ਲਾਈਵ ਕੰਸਰਟ ਕੀਤਾ ਸੀ। ਇਸ 27 ਮਿੰਟ ਦੀ ਵੀਡੀਓ ਵਿੱਚ ਉਸਨੇ ਈਰਾਨ ਦਾ ਮਸ਼ਹੂਰ ਦੇਸ਼ਭਗਤੀ ਗੀਤ 'ਅਜ ਖੂਨੇ ਜਵਾਨਾਨੇ ਵਤਨ' ਗਾਇਆ ਸੀ। ਇਸ ਪਰਫਾਰਮੈਂਸ ਦੌਰਾਨ ਪਰਸਤੂ ਨੇ ਹਿਜਾਬ ਪਹਿਨਣ ਦੀ ਬਜਾਏ ਕਾਲੇ ਰੰਗ ਦੀ ਸਲੀਵਲੇਸ ਡਰੈੱਸ ਪਹਿਨੀ ਹੋਈ ਸੀ। ਵੀਡੀਓ ਵਾਇਰਲ ਹੋਣ ਤੋਂ ਬਾਅਦ ਈਰਾਨੀ ਅਧਿਕਾਰੀਆਂ ਨੇ ਉਸ ਨੂੰ ਅਤੇ ਉਸ ਦੀ ਪ੍ਰੋਡਕਸ਼ਨ ਟੀਮ ਦੇ ਕੁਝ ਮੈਂਬਰਾਂ ਨੂੰ ਹਿਰਾਸਤ ਵਿੱਚ ਲੈ ਲਿਆ ਸੀ।

ਈਰਾਨ ਦੇ ਕੋਮ ਸੂਬੇ ਦੀ ਅਦਾਲਤ ਨੇ ਗਾਇਕਾ 'ਤੇ 'ਅਸ਼ਲੀਲ ਸਮੱਗਰੀ' ਪ੍ਰਕਾਸ਼ਿਤ ਕਰਨ ਦਾ ਦੋਸ਼ ਲਗਾਇਆ ਹੈ। ਅਦਾਲਤ ਨੇ ਨਾ ਸਿਰਫ ਪਰਸਤੂ ਨੂੰ ਬਲਕਿ ਉਸਦੀ ਪ੍ਰੋਡਕਸ਼ਨ ਟੀਮ ਦੇ 8 ਹੋਰ ਮੈਂਬਰਾਂ ਨੂੰ ਵੀ 74-74 ਕੋੜੇ ਮਾਰਨ ਦੀ ਸਜ਼ਾ ਸੁਣਾਈ ਹੈ। ਇਸ ਤੋਂ ਇਲਾਵਾ, ਗਾਇਕਾ 'ਤੇ ਦੋ ਸਾਲਾਂ ਲਈ ਦੇਸ਼ ਛੱਡਣ 'ਤੇ ਪਾਬੰਦੀ ਲਗਾ ਦਿੱਤੀ ਗਈ ਹੈ ਅਤੇ ਉਸਨੂੰ ਕਿਸੇ ਵੀ ਤਰ੍ਹਾਂ ਦੀਆਂ ਕਲਾਤਮਕ ਗਤੀਵਿਧੀਆਂ ਵਿੱਚ ਹਿੱਸਾ ਲੈਣ ਤੋਂ ਵੀ ਰੋਕ ਦਿੱਤਾ ਗਿਆ ਹੈ।

ਈਰਾਨ ਵਿੱਚ ਮੌਜੂਦਾ ਕਾਨੂੰਨਾਂ ਅਨੁਸਾਰ ਔਰਤਾਂ ਲਈ ਜਨਤਕ ਥਾਵਾਂ 'ਤੇ ਹਿਜਾਬ ਪਹਿਨਣਾ ਲਾਜ਼ਮੀ ਹੈ। ਇਸ ਤੋਂ ਇਲਾਵਾ, ਉੱਥੇ ਔਰਤਾਂ ਦੇ ਇਕੱਲੇ ਗਾਉਣ 'ਤੇ ਵੀ ਸਖਤ ਪਾਬੰਦੀਆਂ ਹਨ। ਜ਼ਿਕਰਯੋਗ ਹੈ ਕਿ ਪਰਸਤੂ ਅਹਿਮਦੀ ਪਹਿਲਾਂ ਵੀ ਇਨ੍ਹਾਂ ਨਿਯਮਾਂ ਦਾ ਵਿਰੋਧ ਕਰਦੀ ਰਹੀ ਹੈ ਅਤੇ ਉਹ 2022 ਵਿੱਚ ਹੋਏ ਹਿਜਾਬ ਵਿਰੋਧੀ ਪ੍ਰਦਰਸ਼ਨਾਂ ਵਿੱਚ ਵੀ ਸਰਗਰਮ ਸੀ। ਮਨੁੱਖੀ ਅਧਿਕਾਰ ਕਾਰਕੁਨਾਂ ਦਾ ਕਹਿਣਾ ਹੈ ਕਿ ਅਜਿਹੇ ਫੈਸਲੇ ਈਰਾਨ ਵਿੱਚ ਅਭਿਵਿਅਕਤੀ ਦੀ ਆਜ਼ਾਦੀ ਦੇ ਮਾੜੇ ਹਾਲਾਤਾਂ ਨੂੰ ਦਰਸਾਉਂਦੇ ਹਨ।