ਬਲੋਚਿਸਤਾਨ ਦੀ 'ਸ਼ੇਰਨੀ' Mehrang Baloch ਨੂੰ ਉਮਰ ਕੈਦ, ਅਦਾਲਤੀ ਫ਼ੈਸਲੇ ਮਗਰੋਂ ਸਮਰਥਕਾਂ 'ਚ ਗੁੱਸੇ ਦੀ ਲਹਿਰ

ਇਸਲਾਮਾਬਾਦ/ਕੁਵੇਟਾ : ਪਾਕਿਸਤਾਨ ਦੇ ਬਲੋਚਿਸਤਾਨ ਸੂਬੇ ਵਿੱਚ ਮਨੁੱਖੀ ਅਧਿਕਾਰਾਂ ਲਈ ਆਵਾਜ਼ ਬੁਲੰਦ ਕਰਨ ਵਾਲੀ ਪ੍ਰਸਿੱਧ ਕਾਰਕੁਨ ਮਹਿਰੰਗ ਬਲੋਚ ਨੂੰ ਕੁਵੇਟਾ ਦੀ ਇੱਕ ਅੱਤਵਾਦ ਵਿਰੋਧੀ ਅਦਾਲਤ (ATC) ਨੇ ਉਮਰ ਕੈਦ ਦੀ ਸਜ਼ਾ ਸੁਣਾਈ ਹੈ। 'ਬਲੋਚਿਸਤਾਨ ਦੀ ਸ਼ੇਰਨੀ' ਵਜੋਂ ਜਾਣੀ ਜਾਂਦੀ ਮਹਿਰੰਗ 'ਤੇ ਸਾਲ 2024 ਵਿੱਚ ਗਵਾਦਰ ਵਿੱਚ ਇੱਕ ਰੈਲੀ ਦੌਰਾਨ ਇੱਕ ਸੁਰੱਖਿਆ ਅਧਿਕਾਰੀ ਦੀ ਮੌਤ ਦੇ ਮਾਮਲੇ ਵਿੱਚ ਇਹ ਕਾਰਵਾਈ ਕੀਤੀ ਗਈ ਹੈ। 

ਸਹਿ-ਮੁਲਜ਼ਮ ਨੂੰ ਵੀ ਸਜ਼ਾ 

ਅਦਾਲਤ ਦੇ ਜੱਜ ਮੁਹੰਮਦ ਅਲੀ ਮੋਬਿਨ ਨੇ ਇਹ ਫੈਸਲਾ ਸੁਣਾਉਂਦਿਆਂ ਮਹਿਰੰਗ ਦੇ ਨਾਲ-ਨਾਲ 'ਬਲੋਚ ਯਕਜਹਿਤੀ ਕਮੇਟੀ' (BYC) ਦੇ ਨੇਤਾ ਸਿਬਗਤੁੱਲਾ ਸ਼ਾਹ ਨੂੰ ਵੀ ਉਮਰ ਕੈਦ ਦੀ ਸਜ਼ਾ ਦਿੱਤੀ ਹੈ। ਜ਼ਿਕਰਯੋਗ ਹੈ ਕਿ ਇਹ ਫੈਸਲਾ ਅਜਿਹੇ ਸਮੇਂ ਆਇਆ ਹੈ, ਜਦੋਂ ਮਹਿਰੰਗ ਬਲੋਚ ਅਤੇ ਹੋਰ ਗ੍ਰਿਫ਼ਤਾਰ ਕੀਤੇ ਗਏ BYC ਨੇਤਾਵਾਂ ਨੇ ਅਦਾਲਤੀ ਕਾਰਵਾਈ ਦਾ ਮੁਕੰਮਲ ਬਾਈਕਾਟ ਕੀਤਾ ਹੋਇਆ ਸੀ।

ਇਹ ਵੀ ਪੜ੍ਹੋ : ਜੰਗ ਖਤਮ ਕਰਨ ਵੱਲ ਵੱਡਾ ਕਦਮ! ਅਮਰੀਕਾ ਵੱਲੋਂ ਈਰਾਨੀ ਤੇਲ ਪਾਬੰਦੀਆਂ 'ਚ 60 ਦਿਨਾਂ ਦੀ ਛੋਟ

ਕਾਰਵਾਈ ਦਾ ਵਿਰੋਧ ਅਤੇ ਬਾਈਕਾਟ 

ਸੂਤਰਾਂ ਅਨੁਸਾਰ, ਗ੍ਰਿਫ਼ਤਾਰ ਕੀਤੇ ਗਏ ਕਾਰਕੁਨ 12 ਜੂਨ ਤੋਂ ਕੁਵੇਟਾ ਜੇਲ੍ਹ ਦੇ ਅੰਦਰ ਕਾਨੂੰਨੀ ਕਾਰਵਾਈ ਦੇ ਵਿਰੋਧ ਵਿੱਚ ਧਰਨੇ 'ਤੇ ਬੈਠੇ ਹਨ। ਮਹਿਰੰਗ ਦੀ ਭੈਣ ਅਤੇ ਵਕੀਲ ਨਾਦੀਆ ਬਲੋਚ ਨੇ ਇਸ ਫੈਸਲੇ ਨੂੰ ਸਿਰੇ ਤੋਂ ਖਾਰਜ ਕਰਦਿਆਂ ਕਿਹਾ ਕਿ ਇਹ ਫੈਸਲਾ ਗੈਰ-ਕਾਨੂੰਨੀ ਹੈ ਕਿਉਂਕਿ ਸਰਕਾਰ ਨੇ ਬਚਾਅ ਪੱਖ ਦੀ ਸਹਿਮਤੀ ਤੋਂ ਬਿਨਾਂ ਹੀ ਉਨ੍ਹਾਂ ਲਈ ਵਕੀਲ ਨਿਯੁਕਤ ਕੀਤੇ ਸਨ। 

ਸੰਘਰਸ਼ ਜਾਰੀ ਰੱਖਣ ਦਾ ਐਲਾਨ 

'ਬਲੋਚ ਯਕਜਹਿਤੀ ਕਮੇਟੀ' ਨੇ ਇੱਕ ਬਿਆਨ ਜਾਰੀ ਕਰਦਿਆਂ ਕਿਹਾ ਕਿ ਪਾਕਿਸਤਾਨੀ ਸੰਸਥਾਵਾਂ ਸ਼ਾਂਤੀਪੂਰਨ ਰਾਜਨੀਤਿਕ ਅੰਦੋਲਨ ਨੂੰ ਦਬਾਉਣ ਲਈ ਕਾਨੂੰਨ ਦੀ ਦੁਰਵਰਤੋਂ ਕਰ ਰਹੀਆਂ ਹਨ। ਸੰਗਠਨ ਨੇ ਸਪੱਸ਼ਟ ਕੀਤਾ ਕਿ ਜੇਲ੍ਹਾਂ ਅਤੇ ਅਜਿਹੀਆਂ ਸਜ਼ਾਵਾਂ ਉਨ੍ਹਾਂ ਦੇ ਅੰਦੋਲਨ ਨੂੰ ਰੋਕ ਨਹੀਂ ਸਕਦੀਆਂ ਅਤੇ ਹੁਣ ਸੰਘਰਸ਼ ਦਾ ਇੱਕ ਨਵਾਂ ਦੌਰ ਸ਼ੁਰੂ ਹੋਵੇਗਾ।

ਇਹ ਵੀ ਪੜ੍ਹੋ : ਲਖਨਊ ਅਗਨੀਕਾਂਡ 'ਚ ਵੱਡਾ ਐਕਸ਼ਨ: ਬਿਲਡਿੰਗ ਮਾਲਕ ਸਣੇ 3 ਗ੍ਰਿਫ਼ਤਾਰ, SIT ਵੱਲੋਂ ਜਾਂਚ ਸ਼ੁਰੂ

ਪੇਸ਼ੇ ਤੋਂ ਡਾਕਟਰ ਹੈ ਮਹਿਰੰਗ 

ਸਰਜਨ ਤੋਂ ਕਾਰਕੁਨ ਬਣੀ ਮਹਿਰੰਗ ਬਲੋਚ ਨੂੰ ਸ਼ੁਰੂ ਵਿੱਚ 'ਮੇਨਟੇਨੈਂਸ ਆਫ ਪਬਲਿਕ ਆਰਡਰ ਐਕਟ' ਤਹਿਤ ਹਿਰਾਸਤ ਵਿੱਚ ਲਿਆ ਗਿਆ ਸੀ। ਹਿਰਾਸਤ ਦੌਰਾਨ ਉਸ 'ਤੇ ਕਈ ਹੋਰ ਅਪਰਾਧਿਕ ਮਾਮਲੇ ਦਰਜ ਕੀਤੇ ਗਏ, ਜਿਨ੍ਹਾਂ ਵਿੱਚ ਪੁਲਸ ਕਾਰਵਾਈ ਦੌਰਾਨ ਹੋਈਆਂ ਮੌਤਾਂ ਦਾ ਮਾਮਲਾ ਵੀ ਸ਼ਾਮਲ ਹੈ। ਕਾਰਕੁਨ ਸੰਮੀ ਦੀਨ ਨੇ ਨਿਆਂਪਾਲਿਕਾ ਦੀ ਆਲੋਚਨਾ ਕਰਦਿਆਂ ਕਿਹਾ ਕਿ ਅਦਾਲਤਾਂ ਇਨਸਾਫ਼ ਕਰਨ ਦੀ ਬਜਾਏ ਦਮਨ ਕਰਨ ਵਾਲਿਆਂ ਦੇ ਹੱਥ ਮਜ਼ਬੂਤ ਕਰ ਰਹੀਆਂ ਹਨ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8