ਇੰਡੋਨੇਸ਼ੀਆ ਮੁੜ ਪੋਲੀਓ ਦੀ ਲਪੇਟ 'ਚ! 4 ਨਵੇਂ ਕੇਸ ਆਏ ਸਾਹਮਣੇ, ਬੱਚਿਆਂ ਦੇ ਟੀਕਾਕਰਨ ਲਈ ਆਏ ਲੋਕ

ਇੰਟਰਨੈਸ਼ਨਲ ਡੈਸਕ : ਇੰਡੋਨੇਸ਼ੀਆ 'ਚ ਸਿਗਲੀ ਕਸਬੇ ਦੇ ਚੌਰਾਹੇ 'ਤੇ ਸਕੂਲੀ ਵਰਦੀਆਂ ਵਾਲੇ ਬੱਚੇ ਅਤੇ ਬਹੁਤ ਛੋਟੇ ਬੱਚੇ ਪੋਲੀਓ ਟੀਕਾਕਰਨ ਲਈ ਆਪਣੇ ਮਾਤਾ-ਪਿਤਾ ਨਾਲ ਲਾਈਨ 'ਚ ਖੜ੍ਹੇ ਹੋਏ ਸਨ। ਇਹ ਨਜ਼ਾਰਾ ਇੰਡੋਨੇਸ਼ੀਆ ਦੇ ਸੁਮਾਤਰਾ ਟਾਪੂ ਦੇ ਉੱਤਰੀ ਖੇਤਰ ਦਾ ਸੀ, ਜਿੱਥੇ ਚਾਰ ਬੱਚੇ ਪੋਲੀਓ ਨਾਲ ਸੰਕਰਮਿਤ ਪਾਏ ਗਏ ਹਨ। 

ਇੰਡੋਨੇਸ਼ੀਆ ਨੇ ਇੱਕ ਦਹਾਕੇ ਤੋਂ ਵੀ ਘੱਟ ਸਮਾਂ ਪਹਿਲਾਂ ਆਪਣੇ ਦੇਸ਼ ਨੂੰ ਪੋਲੀਓ ਮੁਕਤ ਘੋਸ਼ਿਤ ਕੀਤਾ ਸੀ। ਸਿਗਲੀ ਨੇੜੇ ਇੰਡੋਨੇਸ਼ੀਆ ਦੇ ਆਚੇ ਸੂਬੇ ਵਿਚ ਪੋਲੀਓ ਦੀ ਲਾਗ ਦਾ ਪਹਿਲਾ ਮਾਮਲਾ 17 ਅਕਤੂਬਰ ਨੂੰ ਇਕ ਸੱਤ ਸਾਲਾ ਲੜਕੇ ਵਿਚ ਸਾਹਮਣੇ ਆਇਆ ਸੀ ਜੋ ਅੰਸ਼ਕ ਅਧਰੰਗ ਤੋਂ ਪੀੜਤ ਸੀ।ਉਦੋਂ ਤੋਂ, ਤਿੰਨ ਹੋਰ ਬੱਚਿਆਂ ਵਿੱਚ ਪੋਲੀਓ ਵਾਇਰਸ ਦੀ ਲਾਗ ਦੀ ਪੁਸ਼ਟੀ ਹੋਈ ਹੈ, ਜਿਸ ਨਾਲ ਸਰਕਾਰ ਨੂੰ ਵੱਡੇ ਪੱਧਰ 'ਤੇ ਟੀਕਾਕਰਨ ਮੁਹਿੰਮ ਸ਼ੁਰੂ ਕਰਨ ਅਤੇ ਜਨਤਕ ਜਾਗਰੂਕਤਾ ਪੈਦਾ ਕਰਨ ਲਈ ਪ੍ਰੇਰਿਤ ਕੀਤਾ ਗਿਆ ਹੈ। 

ਅਧਿਕਾਰੀਆਂ ਨੇ ਕਿਹਾ ਕਿ ਰੂੜੀਵਾਦੀ ਆਸੇਹ ਪ੍ਰਾਂਤ ਵਿੱਚ ਪੋਲੀਓ ਟੀਕਾਕਰਨ ਦੀਆਂ ਦਰਾਂ ਦੇਸ਼ ਦੇ ਹੋਰ ਹਿੱਸਿਆਂ ਨਾਲੋਂ ਪਿੱਛੇ ਹਨ। ਸਿਹਤ ਮੰਤਰਾਲੇ ਦੇ ਰੋਗ ਨਿਯੰਤਰਣ ਅਤੇ ਰੋਕਥਾਮ ਵਿਭਾਗ ਦੇ ਡਾਇਰੈਕਟਰ ਜਨਰਲ, ਮੈਕਸੀ ਰੇਨ ਰੋਂਡੋਨੁਵੂ ਨੇ ਕਿਹਾ ਕਿ ਸੋਮਵਾਰ ਨੂੰ ਇੰਡੋਨੇਸ਼ੀਆ ਵਿੱਚ ਸ਼ੁਰੂ ਕੀਤੀ ਗਈ ਟੀਕਾਕਰਨ ਮੁਹਿੰਮ ਦੇ ਹਿੱਸੇ ਵਜੋਂ ਪ੍ਰਭਾਵਿਤ ਸੂਬੇ ਵਿੱਚ 1.2 ਮਿਲੀਅਨ ਬੱਚਿਆਂ ਦਾ ਟੀਕਾਕਰਨ ਕੀਤਾ ਜਾਵੇਗਾ।

ਉਨ੍ਹਾਂ ਕਿਹਾ, “ਪੋਲੀਓ ਦਾ ਕੋਈ ਇਲਾਜ ਨਹੀਂ ਹੈ। ਇਸ ਦਾ ਇੱਕੋ ਇੱਕ ਇਲਾਜ ਰੋਕਥਾਮ ਹੈ ਅਤੇ ਰੋਕਥਾਮ ਦਾ ਇੱਕੋ ਇੱਕ ਸਾਧਨ ਟੀਕਾਕਰਨ ਹੈ।” ਇੰਡੋਨੇਸ਼ੀਆ 275 ਮਿਲੀਅਨ ਲੋਕਾਂ ਦੇ ਨਾਲ ਦੁਨੀਆ ਦਾ ਚੌਥਾ ਸਭ ਤੋਂ ਵੱਧ ਆਬਾਦੀ ਵਾਲਾ ਦੇਸ਼ ਹੈ। ਆਸੇਹ ਇੰਡੋਨੇਸ਼ੀਆ ਦਾ ਇਕਲੌਤਾ ਪ੍ਰਾਂਤ ਹੈ ਜਿਸ ਨੂੰ 2006 ਵਿੱਚ ਸ਼ਰੀਆ ਕਾਨੂੰਨ ਲਾਗੂ ਕਰਨ ਦੀ ਇਜਾਜ਼ਤ ਦਿੱਤੀ ਗਈ ਸੀ। 

ਰਾਸ਼ਟਰੀ ਸਰਕਾਰ ਨੇ ਵੱਖਵਾਦੀਆਂ ਨਾਲ ਜੰਗ ਨੂੰ ਖਤਮ ਕਰਨ ਲਈ ਸੂਬੇ ਨੂੰ ਇਹ ਛੋਟ ਦਿੱਤੀ ਸੀ। ਆਸੇਹ ਦੇ ਸਿਹਤ ਦਫਤਰ ਦੇ ਮੁਖੀ ਹਨੀਫ ਨੇ ਵੈਕਸੀਨ ਵਿੱਚ ਸੂਰ ਦਾ ਮਾਸ ਜਾਂ ਅਲਕੋਹਲ ਸ਼ਾਮਲ ਹੋਣ ਬਾਰੇ ਕਿਹਾ ਕਿ ਦੋਵੇਂ ਹੀ ਚੀਜ਼ਾਂ ਮੁਸਲਿਮ ਧਰਮ ਦੇ ਤਹਿਤ ਵਰਜਿਤ ਹਨ। ਟੀਕਾਕਰਨ ਦੀ ਵੈਕਸੀਨ 'ਚ ਇਨ੍ਹਾਂ ਦੇ ਹੋਣ ਦੀਆਂ ਖ਼ਬਰਾਂ ਅਫਵਾਹਾਾਂ ਹਨ  ਤੇ ਅਜਿਹੀਆਂ ਅਫਵਾਹਾਂ ਪੇਂਡੂ ਖੇਤਰਾਂ ਵਿੱਚ ਟੀਕਾਕਰਨ ਦੇ ਯਤਨਾਂ ਨੂੰ ਗੁੰਝਲਦਾਰ ਬਣਾਉਂਦੀਆਂ ਹਨ।