ਜੂਨ-ਜੁਲਾਈ ਤੱਕ ਇਸ ਦੇਸ਼ ''ਚ ਹਾਲਾਤ ਹੋ ਸਕਦੇ ਨੇ ਹੋਰ ਖਰਾਬ, ਕੀਤਾ ਲਾਕਡਾਊਨ ਦਾ ਐਲਾਨ

ਬੁਡਾਪੇਸਟ- ਕੋਰੋਨਾਵਾਇਰਸ ਦੁਨੀਆਰ ਭਰ ਵਿਚ ਤੇਜ਼ੀ ਨਾਲ ਆਪਣੇ ਪੈਰ ਪਸਾਰਦਾ ਜਾ ਰਿਹਾ ਹੈ। ਅਜਿਹੇ ਵਿਚ ਕੁਝ ਲੋਕਾਂ ਦਾ ਕਹਿਣਾ ਹੈ ਕਿ ਇਸ ਵਾਇਰਸ ਦਾ ਅਸਰ ਗਰਮੀ ਦੇ ਮੌਸਮ ਤੇ ਨਮੀ ਵਿਚ ਕਮੀ ਕਾਰਨ ਆਪਣੇ ਆਪ ਘੱਟਣਾ ਸ਼ੁਰੂ ਹੋ ਗਿਆ ਹੈ। ਪਰ ਇਸ ਦੇ ਉਲਟ ਹੰਗਰੀ ਵਿਚ ਆਉਣ ਵਾਲੇ ਦਿਨਾਂ ਵਿਚ ਹਾਲਾਤ ਹੋਰ ਵਿਗੜ ਸਕਦੇ ਹਨ। ਅਜਿਹਾ ਕਹਿਣਾ ਹੈ ਦੇਸ਼ ਦੇ ਪ੍ਰਧਾਨ ਮੰਤਰੀ ਵਿਕਟਰ ਓਰਬਨ ਦਾ।

ਹੰਗਰੀ ਦੇ ਪ੍ਰਧਾਨ ਮੰਤਰੀ ਵਲੋਂ ਦੇਸ਼ ਵਿਚ ਕੋਰੋਨਾਵਾਇਰਸ ਨਾਲ ਲੜਨ ਤੇ ਇਸ ਮਹਾਮਾਰੀ ਦੇ ਪ੍ਰਸਾਰ ਨੂੰ ਘੱਟ ਕਰਨ ਦੇ ਲਈ ਦੋ ਹਫਤਿਆਂ ਦੇ ਲਾਕਡਾਊਨ ਦਾ ਐਲਾਨ ਕੀਤਾ ਗਿਆ ਹੈ। ਪ੍ਰਧਾਨ ਮੰਤਰੀ ਵਿਕਟਰ ਓਹਬਨ ਨੇ ਸ਼ੁੱਕਰਵਾਰ ਨੂੰ ਇਸ ਦੀ ਜਾਣਕਾਰੀ ਦਿੰਦਿਆਂ ਕਿਹਾ ਕਿ ਇਸ ਮਹਾਮਾਰੀ ਦੇ ਜੂਨ ਜਾਂ ਜੁਲਾਈ ਤੱਕ ਦੇਸ਼ ਵਿਚ ਚੋਟੀ 'ਤੇ ਪਹੁੰਚਣ ਦੀ ਉਮੀਦ ਹੈ।

ਦੇਸ਼ ਵਿਚ ਸ਼ਨੀਵਾਰ ਨੂੰ ਸ਼ੁਰੂ ਹੋਣ ਵਾਲੇ ਬੰਦ ਦੌਰਾਨ ਨਾਗਰਿਕਾਂ ਨੂੰ ਖਰੀਦਦਾਰੀ ਕਰਨ ਤੇ ਬਾਹਰ ਜਾਣ ਦੀ ਸੀਮਤ ਆਗਿਆ ਹੋਵੇਗੀ ਪਰ ਲੋਕਾਂ ਨੂੰ ਇਕ-ਦਜੇ ਤੋਂ ਦੂਰੀ ਬਣਾਏ ਰੱਖਣੀ ਹੋਵੇਗੀ ਤੇ ਅਜਿਹਾ ਨਾ ਕਰਨ 'ਤੇ ਪੁਲਸ ਵਲੋਂ ਕਾਰਵਾਈ ਵੀ ਕੀਤੀ ਜਾਵੇਗੀ। ਪੁਲਸ ਦੇ ਕੋਲ ਲੋਕਾਂ ਨੂੰ ਭਾਰੀ ਜੁਰਮਾਨਾ ਲਾਉਣ ਦੀਆਂ ਸ਼ਕਤੀਆਂ ਵੀ ਹੋਣਗੀਆਂ।

ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਸਰਕਾਰ ਅਪ੍ਰੈਲ ਦੇ ਪਹਿਲੇ ਜਾਂ ਦੂਜੇ ਹਫਤੇ ਵਿਚ ਅਰਥਵਿਵਸਥਾ ਦੇ ਲਈ ਇਕ ਆਊਟਬ੍ਰੇਕ ਐਕਸ਼ਨ ਪਲਾਨ ਵੀ ਪੇਸ਼ ਕਰੇਗੀ। ਹੰਗਰੀ ਵਿਚ ਕੋਰੋਨਾਵਾਇਰਸ ਦੇ 300 ਮਾਮਲੇ ਦਰਜ ਕੀਤੇ ਗਏ ਹਨ, ਜਿਹਨਾਂ ਵਿਚੋਂ 10 ਲੋਕਾਂ ਦੀ ਮੌਤ ਹੋ ਗਈ ਹੈ। ਓਰਬਨ ਨੇ ਕਿਹਾ ਕਿ ਦੇਸ਼ ਵਿਚ ਮਾਮਲਿਆਂ ਦੀ ਅਸਲੀ ਗਿਣਤੀ ਸ਼ਾਇਦ ਬਹੁਤ ਜ਼ਿਆਦਾ ਹੈ।