ਭਾਰਤੀਆਂ ਲਈ ਚੰਗੀ ਖ਼ਬਰ, UAE ਤੋਂ ਭਾਰਤ ਲਈ ਹਵਾਈ ਕਿਰਾਏ ''ਚ ਭਾਰੀ ਗਿਰਾਵਟ

ਆਬੂ ਧਾਬੀ (ਬਿਊਰੋ): ਸੁਤੰਤਰਤਾ ਦਿਵਸ ਦੇ ਮੌਕੇ 'ਤੇ ਯੂਏਈ ਤੋਂ ਭਾਰਤ ਆਉਣ ਵਾਲਿਆਂ ਲਈ ਇੱਕ ਵੱਡੀ ਖ਼ਬਰ ਹੈ। ਹਵਾਈ ਜਹਾਜ਼ ਦੀਆਂ ਟਿਕਟਾਂ ਦੀਆਂ ਕੀਮਤਾਂ ਵਿੱਚ 60 ਫੀਸਦੀ ਤੋਂ ਵੱਧ ਦੀ ਗਿਰਾਵਟ ਆਈ ਹੈ। ਜਿਨ੍ਹਾਂ ਜਹਾਜ਼ਾਂ ਵਿਚ ਪਿਛਲੇ ਮਹੀਨੇ ਸੀਟਾਂ ਨਹੀਂ ਸਨ, ਉਹ ਹੁਣ ਖਾਲੀ ਹਨ ਅਤੇ ਉਨ੍ਹਾਂ ਦੀਆਂ ਕੀਮਤਾਂ ਵੀ ਬਹੁਤ ਘੱਟ ਹਨ। ਟਰੈਵਲ ਕੰਪਨੀਆਂ ਦਾ ਕਹਿਣਾ ਹੈ ਕਿ ਪਿਛਲੇ ਮਹੀਨੇ ਜਹਾਜ਼ਾਂ ਦੀਆਂ ਕੀਮਤਾਂ 'ਚ ਉਛਾਲ ਆਇਆ ਸੀ। ਇਸ ਦਾ ਸਭ ਤੋਂ ਵੱਡਾ ਕਾਰਨ ਗਰਮੀਆਂ ਦੀਆਂ ਛੁੱਟੀਆਂ, ਈਦ ਦੀਆਂ ਛੁੱਟੀਆਂ ਅਤੇ ਸੈਰ-ਸਪਾਟਾ ਸੀ। ਉਦੋਂ ਯੂਏਈ ਤੋਂ ਭਾਰਤ ਜਾਣ ਵਾਲੇ ਜਹਾਜ਼ ਮਹਿੰਗੇ ਸਨ।

ਰੂਹ ਟਰੈਵਲਜ਼ ਐਂਡ ਟੂਰਿਜ਼ਮ ਦੇ ਸੇਲਜ਼ ਡਾਇਰੈਕਟਰ ਲੀਬਿਨ ਵਰਗੀਸ ਨੇ ਕਿਹਾ ਕਿ ਗਰਮੀ ਦੀਆਂ ਛੁੱਟੀਆਂ ਲਗਭਗ ਖ਼ਤਮ ਹੋ ਗਈਆਂ ਹਨ ਅਤੇ ਜਿਹੜੇ ਪਰਿਵਾਰ ਛੁੱਟੀਆਂ ਮਨਾਉਣ ਗਏ ਸਨ, ਉਹ ਵਾਪਸ ਆਉਣ ਦੀ ਤਿਆਰੀ ਕਰ ਰਹੇ ਹਨ। ਭਾਰਤ ਤੋਂ ਯੂਏਈ ਤੱਕ ਟਿਕਟਾਂ ਦੀਆਂ ਕੀਮਤਾਂ ਅਸਮਾਨ ਛੂਹ ਰਹੀਆਂ ਹਨ ਪਰ ਇਨ੍ਹਾਂ ਜਹਾਜ਼ਾਂ ਨੂੰ ਖਾਲੀ ਹੱਥ ਵਾਪਸ ਨਹੀਂ ਭੇਜਿਆ ਜਾ ਸਕਦਾ। ਤਾਂ ਇਸ ਲਈ ਯੂਏਈ ਤੋਂ ਭਾਰਤ ਦੀ ਟਿਕਟ ਦੀ ਕੀਮਤ ਵਿੱਚ ਗਿਰਾਵਟ ਦਾ ਇਹ ਸਭ ਤੋਂ ਵੱਡਾ ਕਾਰਨ ਹੈ। ਉਨ੍ਹਾਂ ਕਿਹਾ ਕਿ ਇਸ ਗਰਮੀ ਵਿੱਚ ਯੂਏਈ ਦਾ ਸੈਰ ਸਪਾਟਾ ਵੀ ਵਧਿਆ ਹੈ, ਜਿਸ ਕਾਰਨ ਪਿਛਲੇ ਮਹੀਨੇ ਟਿਕਟਾਂ ਦੀਆਂ ਕੀਮਤਾਂ ਵਿੱਚ ਵਾਧਾ ਹੋਇਆ ਸੀ।

ਇੰਨੀ ਘਟੀ ਟਿਕਟ ਦੀ ਕੀਮਤ 

ਯੂ.ਏ.ਈ. ਤੋਂ ਭਾਰਤ ਦੀ ਉਡਾਣ ਟਿਕਟ ਦੀ ਔਸਤ ਕੀਮਤ 400 ਦਿਰਹਾਮ (8655 ਰੁਪਏ) ਤੋਂ 700 ਦਿਰਹਾਮ (15000 ਰੁਪਏ) ਤੱਕ ਹੈ। ਪਿਛਲੇ ਮਹੀਨੇ ਇਹ ਕੀਮਤ 1200 ਦਿਰਹਾਮ (26,000 ਰੁਪਏ) ਤੋਂ 1700 ਦਿਰਹਾਮ (36,000 ਰੁਪਏ) ਤੱਕ ਸੀ। ਸਕਾਈ ਸਕੈਨਰ ਦੇ ਅਨੁਸਾਰ ਅਗਸਤ ਵਿੱਚ ਦੁਬਈ ਤੋਂ ਮੁੰਬਈ ਦੀ ਉਡਾਣ ਦੀ ਕੀਮਤ 271 ਦਿਰਹਾਮ (5864 ਰੁਪਏ), ਦੁਬਈ ਤੋਂ ਦਿੱਲੀ ਦੀ ਉਡਾਣ ਦੀ ਕੀਮਤ 282 ਦਿਰਹਾਮ (6,100 ਰੁਪਏ) ਅਤੇ ਦੁਬਈ ਤੋਂ ਹੈਦਰਾਬਾਦ ਅਤੇ ਚੇਨਈ ਲਈ 320 ਦਿਰਹਾਮ (6924 ਰੁਪਏ) 460 ਦਿਰਹਾਮ (9954 ਰੁਪਏ) ਦੇ ਵਿਚਕਾਰ ਹੈ। 

ਪੜ੍ਹੋ ਇਹ ਅਹਿਮ ਖ਼ਬਰ- ਕੈਨੇਡਾ ਜਾਣ ਦੇ ਚਾਹਵਾਨਾਂ ਲਈ ਵੱਡੀ ਖ਼ੁਸ਼ਖ਼ਬਰੀ, ਪੰਜਾਬ 'ਚ ਲੱਗਣਗੇ ਐਜੁਕੇਸ਼ਨ ਫੇਅਰ ਅਤੇ ਵੀਜ਼ਾ ਵਰਕਸ਼ਾਪ

ਮੰਗ ਵਿੱਚ ਕਮੀ

ਗਾਲਾਦਰੀ ਇੰਟਰਨੈਸ਼ਨਲ ਟਰੈਵਲ ਸਰਵਿਸਿਜ਼ ਦੇ ਮੈਨੇਜਰ ਰਾਜਾ ਮੀਰ ਵਸੀਮ ਦਾ ਕਹਿਣਾ ਹੈ ਕਿ ਭਾਰਤ ਦੀ ਯਾਤਰਾ ਦੀ ਮੰਗ ਬਹੁਤ ਤੇਜ਼ੀ ਨਾਲ ਘਟੀ ਹੈ। ਕਿਉਂਕਿ ਕਈ ਪਰਿਵਾਰ ਛੁੱਟੀਆਂ 'ਤੇ ਹਨ। ਵਸੀਮ ਨੇ ਕਿਹਾ ਕਿ ਗਰਮੀ ਦੀਆਂ ਛੁੱਟੀਆਂ 'ਤੇ ਗਏ ਪਰਿਵਾਰ ਅਜੇ ਤੱਕ ਵਾਪਸ ਨਹੀਂ ਆਏ ਹਨ ਅਤੇ ਕਈਆਂ ਨੇ ਵਾਪਸੀ ਦੀਆਂ ਟਿਕਟਾਂ ਬੁੱਕ ਨਹੀਂ ਕੀਤੀਆਂ ਹਨ। ਉਸ ਨੇ ਕਿਹਾ ਕਿ ਫਿਲਹਾਲ ਇਸ ਸਮੇਂ ਜੋ ਲੋਕ ਭਾਰਤ ਦੀ ਯਾਤਰਾ ਕਰਨਾ ਚਾਹੁੰਦੇ ਹਨ ਉਹ ਜਾਂ ਤਾਂ ਜੋੜੇ ਹਨ ਜਾਂ ਬੈਚਲਰ ਹਨ ਜੋ ਇਕ ਹਫ਼ਤੇ ਜਾਂ 10 ਦਿਨਾਂ ਦੀ ਛੁੱਟੀ ਲਈ ਜਾ ਰਹੇ ਹਨ।'

ਏਅਰ ਇੰਡੀਆ ਦੀ ਵੱਡੀ ਪੇਸ਼ਕਸ਼

ਏਅਰ ਇੰਡੀਆ ਨੇ ਸੁਤੰਤਰਤਾ ਦਿਵਸ ਦੇ ਮੌਕੇ ਭਾਰਤ ਦੀ ਯਾਤਰਾ ਕਰਨ ਵਾਲੇ ਯਾਤਰੀਆਂ ਲਈ ਵਿਸ਼ੇਸ਼ ਆਫਰ ਸ਼ੁਰੂ ਕੀਤੇ ਹਨ। ਯਾਤਰੀਆਂ ਨੂੰ ਯੂਏਈ ਤੋਂ ਦਿੱਲੀ, ਮੁੰਬਈ ਅਤੇ ਚੇਨਈ ਵਰਗੇ ਸਾਰੇ ਵੱਡੇ ਸ਼ਹਿਰਾਂ ਲਈ 330 ਦਿਰਹਾਮ (7100 ਰੁਪਏ) ਦੇ ਰੂਪ ਵਿੱਚ ਘੱਟ ਤੋਂ ਘੱਟ ਕੀਮਤ 'ਤੇ ਟਿਕਟਾਂ ਮਿਲ ਰਹੀਆਂ ਹਨ। ਇਹ ਆਫਰ 8 ਤੋਂ 21 ਅਗਸਤ ਤੱਕ ਚੱਲੇਗਾ।

ਨੋਟ- ਇਸ ਖ਼ਬਰ ਬਾਰੇ ਕੁਮੈਂਟ ਕਰ ਦਿਓ ਰਾਏ।