ਮੌਤ ਨਾਲ ਜੂਝ ਰਹੇ ਪਿਤਾ ਨੇ ਪੂਰੀ ਕੀਤੀ ਧੀ ਨੂੰ ਵਿਆਹੁਣ ਦੀ ਆਖਰੀ ਇੱਛਾ, ਭਾਵੁਕ ਕਰ ਦੇਣਗੀਆਂ ਤਸਵੀਰਾਂ

ਮਨੀਲਾ (ਏਜੰਸੀ)— ਹਰ ਇਕ ਪਿਤਾ ਦੀ ਇਹ ਇੱਛਾ ਹੁੰਦੀ ਹੈ ਕਿ ਉਹ ਆਪਣੀ ਧੀ ਨੂੰ ਹੱਥੀਂ ਵਿਦਾ ਕਰੇ। ਵਿਆਹ ਦੇ ਸਮੇਂ ਇਕ ਪਿਤਾ ਦਾ ਆਪਣੀ ਧੀ ਨੂੰ ਮੰਡਪ 'ਤੇ ਲਿਆ ਕੇ ਲਾੜੇ ਦੇ ਹੱਥ ਵਿਚ ਉਸ ਦਾ ਹੱਥ ਸੌਂਪਣਾ ਪਿਤਾ-ਧੀ ਦੋਹਾਂ ਲਈ ਬੇਹੱਦ ਭਾਵਨਾਤਮਕ ਪਲ ਹੁੰਦਾ ਹੈ। ਪਿਤਾ ਲਈ ਉਹ ਦਿਨ ਬਹੁਤ ਹੀ ਖਾਸ ਹੁੰਦਾ ਹੈ। 

ਫਿਲਪੀਨਜ਼ ਦੇ ਪੇਡਰੋ ਵਿਲਰਿਨ ਦੀ ਵੀ ਦਿਲੀ ਇੱਛਾ ਸੀ ਕਿ ਉਹ ਆਪਣੀ ਧੀ ਸ਼ਾਰਲੈਟ ਗੇ ਵਿਲਰਿਨ ਦੇ ਵਿਆਹ ਨੂੰ ਦੇਖੇ ਅਤੇ ਉਹ ਖੁਦ ਲਾੜੇ ਦੇ ਹੱਥ 'ਚ ਉਸ ਦਾ ਹੱਥ ਦੇਵੇ। ਲਿਵਰ ਕੈਂਸਰ ਨਾਲ ਪੀੜਤ ਪੇਡਰੋ ਲਈ ਇਹ ਸਭ ਨਾ-ਮੁਮਕਿਨ ਨਜ਼ਰ ਆ ਰਿਹਾ ਸੀ ਪਰ ਪੇਡਰੋ ਨੇ ਸਟ੍ਰੈਚਰ 'ਤੇ ਆ ਕੇ ਇਸ ਰਸਮ ਨੂੰ ਨਿਭਾਇਆ ਅਤੇ ਆਪਣੀ ਧੀ ਦੀ ਜ਼ਿੰਦਗੀ ਦੇ ਇਸ ਖਾਸ ਪਲ ਨੂੰ ਯਾਦਗਾਰ ਬਣਾ ਦਿੱਤਾ।

ਸੋਸ਼ਲ ਮੀਡੀਆ 'ਤੇ ਇਸ ਤਸਵੀਰ ਨੂੰ 'ਏ ਫਾਦਰ'ਜ਼ ਲਵ' ਕੈਪਸ਼ਨ ਲਿਖ ਕੇ ਪੋਸਟ ਕੀਤਾ ਗਿਆ ਹੈ। ਇਹ ਤਸਵੀਰ ਵਾਇਰਲ ਹੋ ਗਈ ਅਤੇ ਇਸ ਨੂੰ 22,000 ਲਾਈਕ ਅਤੇ 15,000 ਸ਼ੇਅਰ ਆ ਚੁੱਕੇ ਹਨ। ਤਸਵੀਰ 'ਚ ਲਾੜੀ ਬਣੀ ਸ਼ਾਰਲੈਟ ਆਪਣੇ ਸਟ੍ਰੈਚਰ 'ਤੇ ਲੇਟੇ ਪਿਤਾ ਦਾ ਹੱਥ ਫੜੀ ਖੜ੍ਹੀ ਹੈ ਅਤੇ ਨਾਲ ਹੀ ਉਸ ਦੀ ਮਾਂ ਖੜ੍ਹੀ ਹੈ। ਇਹ ਤਸਵੀਰ ਬੇਹੱਦ ਹੀ ਭਾਵੁਕ ਕਰ ਦੇਣ ਵਾਲੀ ਹੈ। 

ਸ਼ਾਰਲੈਟ ਦਾ ਵਿਆਹ ਉਂਝ ਦਸੰਬਰ ਮਹੀਨੇ ਹੋਣਾ ਸੀ ਪਰ ਪਿਤਾ ਦੀ ਵਿਗੜਦੀ ਸਿਹਤ ਨੂੰ ਦੇਖਦੇ ਹੋਏ ਵਿਆਹ ਛੇਤੀ ਕਰਨ ਦਾ ਫੈਸਲਾ ਲਿਆ ਗਿਆ। ਸ਼ਾਰਲੈਟ ਦੱਸਦੀ ਹੈ ਕਿ ਮੇਰੇ ਪਿਤਾ ਨੂੰ ਲਿਵਰ ਕੈਂਸਰ ਹੈ। ਪਿਤਾ ਦੀ ਖਰਾਬ ਹਾਲਤ ਕਾਰਨ ਉਸ ਦਾ ਵਿਆਹ ਓਨੀ ਖੁਸ਼ੀ ਵਾਲਾ ਨਹੀਂ ਸੀ, ਜਿੰਨਾ ਹੋਣਾ ਚਾਹੀਦਾ ਸੀ। ਪਾਪਾ ਦੀ ਵਿਗੜਦੀ ਸਿਹਤ ਕਾਰਨ ਵਿਆਹ ਛੇਤੀ ਕਰਨ ਦਾ ਫੈਸਲਾ ਲਿਆ ਗਿਆ, ਕਿਉਂਕਿ ਉਨ੍ਹਾਂ ਨੇ ਮੇਰੀ ਜ਼ਿੰਦਗੀ ਦੇ ਇਸ ਪਲ ਦੀ ਮੇਰੇ ਤੋਂ ਵੀ ਜ਼ਿਆਦਾ ਉਡੀਕ ਕੀਤੀ ਸੀ।