ਸ਼ਖਸ ਨੇ 280 km ਦੀ ਗਤੀ ਨਾਲ ਸਾਈਕਲਿੰਗ ਕਰ ਕੇ ਬਣਾਇਆ ਰਿਕਾਰਡ
Tuesday, Aug 20, 2019 - 04:14 PM (IST)
ਲੰਡਨ (ਬਿਊਰੋ)— ਇੰਗਲੈਂਡ ਦੇ 45 ਸਾਲ ਦੇ ਸਾਈਕਲਿਸਟ ਨੀਲ ਕੈਂਪਬੇਲ ਨੇ 280 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਗਤੀ ਨਾਲ ਸਾਈਕਲ ਚਲਾ ਕੇ ਨਵਾਂ ਵਿਸ਼ਵ ਰਿਕਾਰਡ ਬਣਾਇਆ ਹੈ। ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਡਚ ਸਾਈਕਲਿਸਟ ਦਾ 24 ਸਾਲ ਪੁਰਾਣਾ ਰਿਕਾਰਡ ਤੋੜ ਦਿੱਤਾ ਹੈ। ਇਹ ਰਿਕਾਰਡ ਬਣਾਉਣ ਲਈ ਕੈਂਪਬੇਲ ਨੂੰ ਰਨਵੇਅ 'ਤੇ ਪੋਰਸ਼ੇ ਕਾਰ ਨਾਲ ਬਰਾਬਰੀ ਕਰਨੀ ਸੀ। ਇਹ ਦੌੜ ਨੌਰਥ ਯਾਰਕਸ਼ਾਇਰ ਦੇ 3.2 ਕਿਲੋਮੀਟਰ ਲੰਬੇ ਐੱਲਵਿੰਗਟਨ ਏਅਰਫੀਲਡ ਤੱਕ ਚੱਲੀ।
ਦੌੜ ਦੌਰਾਨ ਨੀਲ ਨੇ ਪੋਰਸ਼ੇ ਦੀ ਬਰਾਬਰੀ ਵੀ ਕੀਤੀ। ਕੈਂਪਬੇਲ ਨੇ ਜਿਸ ਸਾਈਕਲ ਨਾਲ ਇਹ ਰਿਕਾਰਡ ਬਣਾਇਆ ਉਸ ਨੂੰ ਖਾਸ ਤੌਰ 'ਤੇ ਤੇਜ਼ ਗਤੀ ਨਾਲ ਚਲਾਉਣ ਲਈ ਤਿਆਰ ਕੀਤਾ ਗਿਆ ਹੈ। ਇਸ ਸਾਈਕਲ ਦੀ ਕੀਮਤ 15 ਹਜ਼ਾਰ ਪੌਂਡ (ਕਰੀਬ 13 ਲੱਖ ਰੁਪਏ) ਹੈ।
ਵਰਲਡ ਰਿਕਾਰਡ ਬਣਾਉਣ ਮਗਰੋਂ ਕੈਂਪਬੇਲ ਨੇ ਕਿਹਾ,''ਹੁਣ ਉਹ ਰਾਹਤ ਮਹਿਸੂਸ ਕਰ ਰਹੇ ਹਨ। ਉਨ੍ਹਾਂ ਦੀ ਟੀਮ ਨੇ ਹੈਰਾਨੀਜਨਕ ਰੂਪ ਨਾਲ ਬਹੁਤ ਹੀ ਸ਼ਾਨਦਾਰ ਕੰਮ ਕੀਤਾ।'' ਰਿਪੋਰਟ ਮੁਤਾਬਕ 1995 ਵਿਚ ਨੀਦਰਲੈਂਡ ਦੇ ਸਾਈਕਲਿਸਟ ਨੇ 268.76 ਕਿਲੋਮੀਟਰ ਦੀ ਗਤੀ ਨਾਲ ਸਾਈਕਲ ਚਲਾਈ ਸੀ, ਜੋ ਹੁਣ ਤੱਕ ਦਾ ਵਿਸ਼ਵ ਰਿਕਾਰਡ ਸੀ।
ਭਾਵੇਂਕਿ ਸਭ ਤੋਂ ਤੇਜ਼ ਸਾਈਕਲ ਚਲਾਉਣ ਦਾ ਵਿਸ਼ਵ ਰਿਕਾਰਡ ਅਮਰੀਕੀ ਮਹਿਲਾ ਸਾਈਕਲਿਸਟ ਡੇਨਿਸ ਕੋਰਨੇਕ ਦੇ ਨਾਮ ਹੈ। ਉਸ ਨੇ ਸਾਲ 2018 ਵਿਚ 296.010 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਗਤੀ ਨਾਲ ਸਾਈਕਲ ਚਲਾਈ ਸੀ। ਹੁਣ ਕੈਂਪਬੇਲ ਦਾ ਇਰਾਦਾ ਇਸ ਰਿਕਾਰਡ ਨੂੰ ਤੋੜਨ ਦਾ ਹੈ।
ਕੈਂਪਬੇਲ ਦਾ ਕਹਿਣਾ ਹੈ ਕਿ ਉਹ ਅਗਲੇ ਸਾਲ ਅਮਰੀਕਾ ਦੇ ਉਟਾਹ ਵਿਚ ਸਥਿਤ ਬੋਨੇਵਿਲੇ ਸਾਲਟ ਫਲੈਟਸ ਦੇ 6 ਮੀਲ ਦੇ ਟਰੈਕ 'ਤੇ 354 ਕਿਲੋਮੀਟਰ ਪ੍ਰਤੀ ਘੰਟੇ ਦੀ ਗਤੀ ਤੱਕ ਪਹੁੰਚਣ ਦੀ ਕੋਸ਼ਿਸ਼ ਕਰਨਗੇ।
ਦੁਨੀਆ ਦੀ ਸਭ ਤੋਂ ਤੇਜ਼ ਸਾਈਕਲਿਸਟ ਡੇਨਿਸ ਮਿਊਲਰ ਨੇ ਵੀ ਆਪਣਾ ਵਿਸ਼ਵ ਰਿਕਾਰਡ ਇਸੇ ਟਰੈਕ 'ਤੇ ਬਣਾਇਆ ਸੀ।
