Ontario : 401 ਹਾਈਵੇਅ ''ਤੇ ਭਿਆਨਕ ਸਕੂਲੀ ਬੱਸ ਹਾਦਸਾ, ਡਰਾਈਵਰ ਦੀ ਮੌਤ, 4 ਵਿਦਿਆਰਥੀ ਜ਼ਖਮੀ

ਲੰਡਨ (Ontario): ਓਨਟਾਰੀਓ ਪ੍ਰੋਵਿੰਸ਼ੀਅਲ ਪੁਲਸ (OPP) ਨੇ ਦੱਸਿਆ ਕੀਤਾ ਕਿ ਲੰਡਨ, ਓਨਟਾਰੀਓ ਦੇ ਨੇੜੇ ਹਾਈਵੇਅ 401 ਦੀਆਂ ਪੱਛਮ ਵੱਲ ਜਾਣ ਵਾਲੀਆਂ ਲੇਨਾਂ 'ਤੇ ਸਕੂਲੀ ਬੱਸ ਦੇ ਹਾਦਸੇ ਦਾ ਸ਼ਿਕਾਰ ਹੋਣ ਕਾਰਨ ਬੱਸ ਡਰਾਈਵਰ ਦੀ ਮੌਤ ਹੋ ਗਈ ਹੈ। ਇਸ ਦਰਦਨਾਕ ਹਾਦਸੇ 'ਚ ਚਾਰ ਬੱਚਿਆਂ ਨੂੰ ਮਾਮੂਲੀ ਸੱਟਾਂ ਲੱਗੀਆਂ ਹਨ ਤੇ ਉਨ੍ਹਾਂ ਨੂੰ ਇਲਾਜ ਲਈ ਹਸਪਤਾਲ ਲਿਜਾਇਆ ਗਿਆ।

ਇਹ ਹਾਦਸਾ ਐਤਵਾਰ ਸਵੇਰੇ ਲਗਭਗ 9:40 ਵਜੇ ਵਾਪਰਿਆ। OPP ਕਾਂਸਟੇਬਲ ਸਟੀਵਨ ਡੂਗੇ ਨੇ ਦੱਸਿਆ ਕਿ ਬੱਸ ਹਾਈਵੇਅ ਤੋਂ ਅਚਾਨਕ ਹੇਠਾਂ ਉਤਰ ਗਈ ਤੇ ਪਲਟ ਗਈ। ਹਾਦਸੇ ਵਾਲੀ ਬੱਸ 'ਚ ਕੁੱਲ 42 ਯਾਤਰੀ ਸਵਾਰ ਸਨ।

Viral Video! Toronto ਫੂਡ ਆਊਟਲੈੱਟ 'ਤੇ ਭਾਰਤੀ ਵਿਅਕਤੀ ਨਾਲ ਬਦਸਲੂਕੀ

ਮ੍ਰਿਤਕ ਡਰਾਈਵਰ ਦੀ ਉਮਰ 52 ਸਾਲ ਦੱਸੀ ਜਾ ਰਹੀ ਹੈ ਜੋ ਕਿ ਵਾਟਰਲੂ ਖੇਤਰ ਦਾ ਰਹਿਣ ਵਾਲਾ ਸੀ ਅਤੇ ਉਸ ਨੂੰ ਮੌਕੇ 'ਤੇ ਹੀ ਮ੍ਰਿਤਕ ਐਲਾਨ ਕਰ ਦਿੱਤਾ ਗਿਆ ਸੀ। ਪੁਲਸ ਨੇ ਅਜੇ ਤੱਕ ਡਰਾਈਵਰ ਦੀ ਮੌਤ ਦੇ ਕਾਰਨਾਂ ਜਾਂ ਹਾਦਸੇ ਦੀ ਵਜ੍ਹਾ ਦੀ ਪੁਸ਼ਟੀ ਨਹੀਂ ਕੀਤੀ ਹੈ।

ਕਿਵੇਂ ਵਾਪਰਿਆ ਹਾਦਸਾ
ਇਹ ਹਾਦਸਾ ਕਿਵੇਂ ਹੋਇਆ, ਇਸ ਬਾਰੇ ਜਾਣਕਾਰੀ ਪੂਰੀ ਤਰ੍ਹਾਂ ਸਪੱਸ਼ਟ ਨਹੀਂ ਹੈ, ਪਰ ਕਈ ਵਿਦਿਆਰਥੀਆਂ ਅਤੇ ਮਾਪਿਆਂ ਨੇ ਦੱਸਿਆ ਕਿ ਡਰਾਈਵਰ ਨੂੰ ਕੋਈ ਡਾਕਟਰੀ ਐਮਰਜੈਂਸੀ ਆਈ ਲੱਗਦੀ ਸੀ। ਹਾਲਾਂਕਿ, ਕਾਂਸਟੇਬਲ ਡੂਗੇ ਨੇ ਕਿਹਾ ਕਿ ਉਹ ਇਸ ਗੱਲ ਦੀ ਪੁਸ਼ਟੀ ਨਹੀਂ ਕਰ ਸਕਦੇ ਕਿ ਇਹ ਸਿਹਤ ਸਬੰਧੀ ਘਟਨਾ ਸੀ ਜਾਂ ਨਹੀਂ। ਜਾਂਚਕਰਤਾ ਇਹ ਤੈਅ ਕਰਨ ਦੀ ਕੋਸ਼ਿਸ਼ ਕਰ ਰਹੇ ਹਨ ਕਿ ਬੱਸ ਸੜਕ ਤੋਂ ਕਿਉਂ ਹੇਠਾਂ ਉੱਤਰੀ, ਭਾਵੇਂ ਇਹ ਮਕੈਨੀਕਲ ਖਰਾਬੀ ਕਾਰਨ ਹੋਇਆ ਸੀ ਜਾਂ ਡਾਕਟਰੀ ਕਾਰਨਾਂ ਕਰਕੇ।

ਛੁੱਟੀਆਂ 'ਤੇ ਜਾ ਰਿਹਾ ਸੀ ਨੌਵੀਂ ਜਮਾਤ ਦਾ ਗਰੁੱਪ
ਇਹ ਬੱਸ ਕਿਚਨਰ ਵਾਟਰਲੂ ਕਾਲਜੀਏਟ ਅਤੇ ਵੋਕੇਸ਼ਨਲ ਸਕੂਲ (KCI) ਦੇ ਨੌਵੀਂ ਜਮਾਤ ਦੇ ਵਿਦਿਆਰਥੀਆਂ ਨੂੰ ਸਕੂਲ ਟ੍ਰਿਪ ਲਈ ਪੁਆਇੰਟ ਪੀਲੀ ਨੈਸ਼ਨਲ ਪਾਰਕ ਲੈ ਜਾ ਰਹੀ ਸੀ।

ਇੱਕ 13 ਸਾਲਾ ਵਿਦਿਆਰਥੀ, ਸ਼ਾਰਲੋਟ ਵੈਲਡਨ ਨੇ ਦੱਸਿਆ ਕਿ ਹਾਦਸੇ ਤੋਂ ਬਾਅਦ, "ਅਸੀਂ ਐਮਰਜੈਂਸੀ ਹੈਚ ਖੋਲ੍ਹਿਆ ਅਤੇ ਹਰ ਕੋਈ ਲੋਕਾਂ ਨੂੰ ਬਾਹਰ ਨਿਕਲਣ 'ਚ ਮਦਦ ਕਰ ਰਿਹਾ ਸੀ।" ਇੱਕ ਹੋਰ ਵਿਦਿਆਰਥੀ ਮੈਡੀ ਨੇ ਦੱਸਿਆ, "ਅਸੀਂ ਬੱਸ ਦੇ ਪਿਛਲੇ ਪਾਸੇ ਸੀ, ਅਸੀਂ ਲੱਕੜ ਉੱਡਦੀ ਦੇਖੀ, ਅਤੇ ਫਿਰ ਅਸੀਂ ਟੋਏ ਵਿੱਚ ਡਿੱਗ ਗਏ।"

ਹਾਦਸੇ ਤੋਂ ਬਾਅਦ, ਹਾਈਵੇਅ ਦੀਆਂ ਪੱਛਮ ਵੱਲ ਜਾਣ ਵਾਲੀਆਂ ਲੇਨਾਂ ਕਈ ਘੰਟਿਆਂ ਲਈ ਬੰਦ ਕਰ ਦਿੱਤੀਆਂ ਗਈਆਂ ਸਨ ਅਤੇ ਸ਼ਾਮ 4:30 ਵਜੇ ਤੋਂ ਬਾਅਦ ਦੁਬਾਰਾ ਖੋਲ੍ਹੀਆਂ ਗਈਆਂ। ਮਾਪਿਆਂ ਨੂੰ ਆਪਣੇ ਬੱਚਿਆਂ ਨੂੰ ਮਿਲਣ ਲਈ ਲੰਡਨ ਦੇ ਸਾਊਥਈਸਟ ਵਿੱਚ ਈਸਟ ਲਾਇਨਜ਼ ਕਮਿਊਨਿਟੀ ਸੈਂਟਰ ਵਿੱਚ ਇੱਕ ਕਮਾਂਡ ਸੈਂਟਰ ਸਥਾਪਤ ਕੀਤਾ ਗਿਆ ਸੀ। ਵਾਟਰਲੂ ਖੇਤਰੀ ਜ਼ਿਲ੍ਹਾ ਸਕੂਲ ਬੋਰਡ ਨੇ ਕਿਹਾ ਕਿ ਸਥਿਤੀ ਨੂੰ ਦੇਖਦੇ ਹੋਏ ਵਿਦਿਆਰਥੀਆਂ ਨੂੰ ਲੋੜੀਂਦੀ ਸਹਾਇਤਾ ਪ੍ਰਦਾਨ ਕੀਤੀ ਜਾਵੇਗੀ।