ਨਿਊਯਾਰਕ ''ਚ ਖੁੱਲ੍ਹਿਆ ਅਨੋਖਾ ਕੈਫੇ: ਹੁਣ ਇਨਸਾਨਾਂ ਦੀ ਨਹੀਂ, AI ਗਰਲਫ੍ਰੈਂਡ-ਬੁਆਏਫ੍ਰੈਂਡ ਨਾਲ ਹੋ ਰਹੀ ਹੈ ਡੇਟਿੰਗ

ਗੈਜੇਟ ਡੈਸਕ - ਅਮਰੀਕਾ ਦੇ ਨਿਊਯਾਰਕ ਸ਼ਹਿਰ 'ਚ ਇਕ ਅਜਿਹਾ ਅਨੋਖਾ ਕੈਫੇ ਖੁੱਲ੍ਹਿਆ ਹੈ, ਜਿੱਥੇ ਲੋਕ ਕਿਸੇ ਇਨਸਾਨ ਨਾਲ ਨਹੀਂ ਸਗੋਂ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (AI) ਪਾਰਟਨਰ ਨਾਲ ਡੇਟਿੰਗ ਕਰ ਰਹੇ ਹਨ। ਵੈਲੇਨਟਾਈਨ ਵੀਕ ਦੇ ਦੌਰਾਨ ਸ਼ੁਰੂ ਹੋਇਆ ਇਹ ਕੈਫੇ ਸੋਸ਼ਲ ਮੀਡੀਆ 'ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਿਹਾ ਹੈ।

ਕਿਵੇਂ ਹੁੰਦੀ ਹੈ AI ਨਾਲ ਡੇਟਿੰਗ?
ਨਿਊਯਾਰਕ ਦੇ 'ਹੇਲਸ ਕਿਚਨ' ਇਲਾਕੇ 'ਚ ਖੁੱਲ੍ਹੇ ਇਸ ਪੌਪ-ਅੱਪ ਕੈਫੇ ਦਾ ਨਾਂ 'ਈਵਾ ਏਆਈ ਕੈਫੇ' ਦੱਸਿਆ ਜਾ ਰਿਹਾ ਹੈ। ਇੱਥੇ ਆਉਣ ਵਾਲੇ ਲੋਕ ਆਪਣੇ ਮੋਬਾਈਲ ਜਾਂ ਟੈਬਲੇਟ 'ਤੇ ਮੌਜੂਦ AI ਚੈਟਬੋਟ ਨੂੰ ਆਪਣੇ ਸਾਹਮਣੇ ਰੱਖ ਕੇ ਕੌਫੀ ਪੀਂਦੇ ਹਨ ਅਤੇ ਗੱਲਾਂ ਕਰਦੇ ਹਨ। ਕੈਫੇ ਨੂੰ ਇਸ ਤਰ੍ਹਾਂ ਡਿਜ਼ਾਈਨ ਕੀਤਾ ਗਿਆ ਹੈ ਕਿ ਲੋਕ ਇਕੱਲੇ ਬੈਠ ਸਕਣ ਅਤੇ ਮੋਬਾਈਲ ਸਟੈਂਡ 'ਤੇ ਆਪਣੇ AI ਸਾਥੀ ਨੂੰ ਰੱਖ ਕੇ ਡੇਟ ਵਰਗਾ ਅਨੁਭਵ ਲੈ ਸਕਣ।

ਲੋਕ ਕਿਉਂ ਪਸੰਦ ਕਰ ਰਹੇ ਹਨ ਇਹ ਟ੍ਰੈਂਡ?
ਸਰੋਤਾਂ ਅਨੁਸਾਰ, ਬਹੁਤ ਸਾਰੇ ਲੋਕਾਂ ਨੂੰ AI ਨਾਲ ਗੱਲ ਕਰਨਾ ਜ਼ਿਆਦਾ ਆਰਾਮਦਾਇਕ ਲੱਗਦਾ ਹੈ ਕਿਉਂਕਿ ਇਸ 'ਚ ਰਿਜੈਕਸ਼ਨ (ਨਕਾਰੇ ਜਾਣ) ਜਾਂ ਕਿਸੇ ਦੇ ਫੈਸਲੇ ਦਾ ਕੋਈ ਡਰ ਨਹੀਂ ਹੁੰਦਾ। ਕਈ ਲੋਕ ਇਸਨੂੰ ਇਕੱਲੇਪਣ 'ਚ ਇਕ ਸਹਾਰਾ ਮੰਨਦੇ ਹਨ ਅਤੇ ਇਸਨੂੰ ਇਕ 'ਸੇਫ ਸਪੇਸ' ਵਜੋਂ ਦੇਖ ਰਹੇ ਹਨ, ਜਿੱਥੇ ਉਹ ਬਿਨਾਂ ਕਿਸੇ ਦਬਾਅ ਦੇ ਆਪਣੀ ਗੱਲ ਰੱਖ ਸਕਦੇ ਹਨ। ਕੁਝ ਲੋਕ ਸਿਰਫ ਉਤਸੁਕਤਾ ਕਾਰਨ ਵੀ ਇੱਥੇ ਪਹੁੰਚ ਰਹੇ ਹਨ ਤਾਂ ਜੋ ਉਹ ਦੇਖ ਸਕਣ ਕਿ AI ਨਾਲ ਡੇਟਿੰਗ ਦਾ ਅਨੁਭਵ ਕਿਹੋ ਜਿਹਾ ਹੁੰਦਾ ਹੈ।

 ਮਾਹਿਰਾਂ ਦੀ ਚਿੰਤਾ 
ਜਿੱਥੇ ਕੁਝ ਲੋਕ ਇਸਨੂੰ ਤਕਨਾਲੋਜੀ ਦਾ ਅਗਲਾ ਕਦਮ ਮੰਨ ਰਹੇ ਹਨ, ਉੱਥੇ ਹੀ ਟੈਕ ਮਾਹਿਰਾਂ ਵੱਲੋਂ ਚਿੰਤਾ ਵੀ ਜਤਾਈ ਜਾ ਰਹੀ ਹੈ। ਮਾਹਿਰਾਂ ਦਾ ਮੰਨਣਾ ਹੈ ਕਿ ਭਾਵੇਂ AI ਇਕੱਲੇਪਣ ਨੂੰ ਘੱਟ ਕਰਨ 'ਚ ਮਦਦਗਾਰ ਹੋ ਸਕਦਾ ਹੈ, ਪਰ ਇਸ ਨਾਲ ਲੋਕ ਅਸਲੀ ਇਨਸਾਨੀ ਰਿਸ਼ਤਿਆਂ ਤੋਂ ਦੂਰ ਹੋ ਸਕਦੇ ਹਨ।

ਫਿਲਹਾਲ ਇਹ ਕੈਫੇ ਇੱਕ ਸੀਮਤ ਸਮੇਂ ਲਈ ਪ੍ਰਯੋਗ ਵਜੋਂ ਖੋਲ੍ਹਿਆ ਗਿਆ ਹੈ। ਹੁਣ ਦੇਖਣਾ ਇਹ ਹੋਵੇਗਾ ਕਿ ਕੀ ਭਵਿੱਖ 'ਚ AI ਨਾਲ ਕੌਫੀ ਪੀਣਾ ਇੱਕ ਆਮ ਗੱਲ ਬਣ ਜਾਵੇਗੀ ਜਾਂ ਇਹ ਸਿਰਫ ਇੱਕ ਵਾਇਰਲ ਟ੍ਰੈਂਡ ਬਣ ਕੇ ਰਹਿ ਜਾਵੇਗਾ।