ਚੱਕਰਵਾਤ ''ਦਿਤਵਾ'' ਤੋਂ ਬਾਅਦ ਐਮਰਜੈਂਸੀ ਰਿਸਪਾਂਸ ''ਚ ਭਾਰਤ ਸਭ ਤੋਂ ਅੱਗੇ : ਸ਼੍ਰੀਲੰਕਾ

ਕੋਲੰਬੋ- ਚੱਕਰਵਾਤ 'ਦਿਤਵਾ' ਦੇ ਭਿਆਨਕ ਤਬਾਹੀ ਲਿਆਂਦੇ ਤੂਫ਼ਾਨ ਤੋਂ ਬਾਅਦ ਭਾਰਤ ਨੇ ਸ਼੍ਰੀਲੰਕਾ 'ਚ ਐਮਰਜੈਂਸੀ ਕਾਰਵਾਈਆਂ ਅਤੇ ਰਾਹਤ ਕੰਮਾਂ 'ਚ ਸਭ ਤੋਂ ਪਹਿਲਾਂ ਹਿੱਸਾ ਲਿਆ ਹੈ। ਸ਼੍ਰੀਲੰਕਾ ਦੇ ਰਾਸ਼ਟਰਪਤੀ ਅਨੁਰਾ ਕੁਮਾਰਾ ਦਿਸਨਾਯਕੇ ਦੇ ਦਫ਼ਤਰ ਨੇ ਮੰਗਲਵਾਰ ਨੂੰ ਪੁਸ਼ਟੀ ਕੀਤੀ ਕਿ ਭਾਰਤ ਨੇ ਤੁਰੰਤ ਰਾਹਤ ਮਿਸ਼ਨ ਸ਼ੁਰੂ ਕਰਕੇ ਵਿਸ਼ਾਲ ਸਹਿਯੋਗ ਦਿੱਤਾ।

ਰਾਸ਼ਟਰਪਤੀ ਦਫ਼ਤਰ ਨੇ ਕਿਹਾ,“ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਰਾਸ਼ਟਰਪਤੀ ਦਿਸਨਾਯਕੇ ਨਾਲ ਗੱਲਬਾਤ ਕਰਦਿਆਂ ਡੂੰਘੀ ਹਮਦਰਦੀ ਪ੍ਰਗਟ ਕੀਤੀ ਅਤੇ ਯਕੀਨ ਦਵਾਇਆ ਕਿ ਇਸ ਮੁਸ਼ਕਲ ਘੜੀ 'ਚ ਭਾਰਤ ਸ਼੍ਰੀਲੰਕਾ ਦੇ ਲੋਕਾਂ ਦੇ ਨਾਲ ਪੂਰੀ ਤਰ੍ਹਾਂ ਖੜ੍ਹਾ ਹੈ।” ਸੋਮਵਾਰ ਨੂੰ ਹੋਈ ਗੱਲਬਾਤ ਦੌਰਾਨ, ਮੋਦੀ ਨੇ ਚੱਕਰਵਾਤ ਨਾਲ ਹੋਈ ਜਾਨ-ਮਾਲ ਦੀ ਵੱਡੀ ਹਾਨੀ 'ਤੇ ਦੁੱਖ ਜਤਾਇਆ ਅਤੇ ਸਭ ਪ੍ਰਭਾਵਿਤ ਇਲਾਕਿਆਂ 'ਚ ਮੁੜ ਵਸੇਬਾ ਕਾਰਜਾਂ ਲਈ ਨਿਰੰਤਰ ਸਹਿਯੋਗ ਦਾ ਭਰੋਸਾ ਦਿੱਤਾ।

ਚਕਰਵਾਤ 'ਦਿਤਵਾ' ਦੀ ਤਬਾਹੀ

ਸ਼੍ਰੀਲੰਕਾ ਇਸ ਵੇਲੇ ਭਿਆਨਕ ਹੜ੍ਹ, ਜ਼ਮੀਨ ਖਿਸਕਣ ਅਤੇ ਮੁੱਢਲੇ ਢਾਂਚੇ ਵੱਡੇ ਨੁਕਸਾਨ ਦੇ ਕਾਰਨ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੈ। ਕਈ ਜ਼ਿਲ੍ਹੇ ਪੂਰੀ ਤਰ੍ਹਾਂ ਕੱਟ ਗਏ ਹਨ ਅਤੇ ਦੇਸ਼ ਦੀ ਆਫ਼ਤ-ਪ੍ਰਬੰਧਨ ਸਮਰੱਥਾ ‘ਤੇ ਭਾਰੀ ਦਬਾਅ ਹੈ। ਸ਼੍ਰੀਲੰਕਾ ਦੇ ਆਫ਼ਤ ਪ੍ਰਬੰਧਨ ਕੇਂਦਰ (DMC) ਅਨੁਸਾਰ 410 ਲੋਕਾਂ ਦੀ ਮੌਤ, 336 ਲੋਕ ਲਾਪਤਾ ਹੋ ਚੁੱਕੇ ਹਨ। ਇਹ ਅੰਕੜੇ 16 ਨਵੰਬਰ ਤੋਂ ਚੱਲ ਰਹੀਆਂ ਚਰਮ ਮੌਸਮੀ ਸਥਿਤੀਆਂ ਦੇ ਨਤੀਜੇ ਹਨ। 

ਭਾਰਤ ਦਾ ਰਾਹਤ ਮਿਸ਼ਨ — ‘ਆਪਰੇਸ਼ਨ ਸਾਗਰ ਬੰਧੂ’

ਭਾਰਤ ਨੇ ‘ਆਪਰੇਸ਼ਨ ਸਾਗਰ ਬੰਧੂ’ ਦੇ ਤਹਿਤ 80 NDRF ਜਵਾਨਾਂ ਦੀਆਂ ਦੋ Urban Search & Rescue ਟੀਮਾਂ ਸ਼੍ਰੀਲੰਕਾ ਭੇਜੀਆਂ। ਇਸ ਨਾਲ ਭਾਰਤ ਦੀ “ਗੁਆਂਢੀ ਪਹਿਲਾਂ” ਨੀਤੀ ਦੀ ਇਕ ਵਾਰ ਫਿਰ ਪੁਸ਼ਟੀ ਹੋਈ।

ਰਾਹਤ ਸਮੱਗਰੀ ‘ਤੇ ਸ਼੍ਰੀਲੰਕਾ ਦਾ ਵੱਡਾ ਫੈਸਲਾ

ਮੰਗਲਵਾਰ ਨੂੰ ਸ਼੍ਰੀਲੰਕਾ ਸਰਕਾਰ ਨੇ ਐਲਾਨ ਕੀਤਾ ਕਿ ਹੜ੍ਹ ਰਾਹਤ ਸਮੱਗਰੀ ਨੂੰ ਕਸਟਮ ਡਿਊਟੀ ਅਤੇ ਹੋਰ ਲਾਗਤਾਂ ਤੋਂ ਮੁਕਤ ਕੀਤਾ ਜਾਵੇਗਾ ਪਰ ਸ਼ਰਤ ਇਹ ਹੈ ਕਿ ਸਮੱਗਰੀ ਆਫ਼ਤ ਪ੍ਰਬੰਧਨ ਡਾਇਰੈਕਟਰ ਜਨਰਲ ਜਾਂ ਰੱਖਿਆ ਮੰਤਰਾਲਾ ਦੇ ਸਕੱਤਰ ਦੇ ਨਾਮ ‘ਤੇ ਭੇਜੀ ਜਾਵੇ।