ਬ੍ਰਿਟੇਨ ਸਾਹਮਣੇ ਖੜ੍ਹੀ ਹੋਈ ਕੈਂਸਰ ਨਾਲ ਨਜਿੱਠਣ ਲਈ ਵੱਡੀ ਚੁਣੌਤੀ

ਲੰਡਨ - ਕੋਵਿਡ-19 ਵਾਇਰਸ ਨੇ ਬ੍ਰਿਟੇਨ ਵਿੱਚ ਤਬਾਹੀ ਮਚਾਈ ਅਤੇ ਕਈ ਲੋਕਾਂ ਦੀ ਜਾਨ ਲੈ ਲਈ ਪਰ ਮਹਾਮਾਰੀ ਦੀ ਸ਼ੁਰੂਆਤ ਵਿੱਚ ਮਾਹਿਰਾਂ ਨੇ ਚੇਤਾਵਨੀ ਦਿੱਤੀ ਸੀ ਕਿ ਤਾਲਾਬੰਦੀ ਦੇ ਅਣਇੱਛਤ ਨਤੀਜੇ ਕਈ ਹੋਰ ਜਾਨਾਂ ਲੈ ਸਕਦੇ ਹਨ। ਕੈਂਸਰ ਦੇ ਸਬੰਧ ਵਿੱਚ ਮਾਹਿਰਾਂ ਦੀਆਂ ਚਿੰਤਾਵਾਂ ਵਿਸ਼ੇਸ਼ ਧਿਆਨ ਮੰਗਦੀਆਂ ਸਨ ਕਿਉਂਕਿ ਇਸ ਸਬੰਧੀ ਕਈ ਸਕ੍ਰੀਨਿੰਗਾਂ ਨੂੰ ਸ਼ੁਰੂ ਵਿੱਚ ਮੁਅੱਤਲ ਕਰ ਦਿੱਤਾ ਗਿਆ ਸੀ। ਰੁਟੀਨ ਡਾਇਗਨੌਸਟਿਕ ਟੈਸਟਾਂ ਨੂੰ ਵੀ ਮੁਲਤਵੀ ਕਰ ਦਿੱਤਾ ਗਿਆ ਸੀ ਅਤੇ ਅਸਪੱਸ਼ਟ ਮਾਮਲਿਆਂ ਦੇ ਹੱਲ ਵਿੱਚ ਦੇਰੀ ਹੋਈ ਸੀ। ਉਸ ਸਮੇਂ ਮਾਡਲਿੰਗ ਨੇ ਸੁਝਾਅ ਦਿੱਤਾ ਕਿ ਰੁਕਾਵਟਾਂ ਹਜ਼ਾਰਾਂ ਵਾਧੂ ਮੌਤਾਂ ਦਾ ਕਾਰਨ ਬਣ ਸਕਦੀਆਂ ਹਨ। ਭਿਆਨਕ ਭਵਿੱਖਬਾਣੀਆਂ ਹੁਣ ਤੱਕ ਸਹੀ ਸਾਬਤ ਹੋਈਆਂ ਜਾਪਦੀਆਂ ਹਨ। 

ਆਕਸਫੋਰਡ ਯੂਨੀਵਰਸਿਟੀ ਦੀ ਖੋਜਕਰਤਾ ਨਿਕੋਲਾ ਬਾਰਕਲੇ ਦਾ ਕਹਿਣਾ ਹੈ ਕਿ ਸ਼ੁਰੂਆਤੀ ਜਾਂਚ ਤੋਂ ਪਤਾ ਲੱਗਣ ਵਾਲੇ ਜ਼ਿਆਦਾਤਰ ਕੈਂਸਰ ਵਿਚ ਮੌਤ ਦਰ 20 ਸਾਲ ਪਹਿਲਾਂ ਦੇ ਪੱਧਰ 'ਤੇ ਵਾਪਸ ਆ ਗਈ ਹੈ। ਉਨ੍ਹਾਂ ਦੀ ਟੀਮ ਦੀਆਂ ਮੁੱਢਲੀਆਂ ਖੋਜਾਂ ਤੋਂ ਪਤਾ ਚੱਲਦਾ ਹੈ ਕਿ ਕੋਲੋਰੈਕਟਲ ਕੈਂਸਰ ਵਿੱਚ ਇੱਕ ਸਾਲ ਤੱਕ ਜਿਉਂਦੇ ਰਹਿਣ ਵਾਲੇ ਮਰੀਜ਼ਾਂ ਦੀ ਹਿੱਸੇਦਾਰੀ ਮਹਾਮਾਰੀ ਤੋਂ ਠੀਕ ਪਹਿਲਾਂ 79% ਤੋਂ ਘਟ ਕੇ 76% ਹੋ ਗਈ ਹੈ। ਉਹਨਾਂ ਮੁਤਾਬਕ ਕਈ ਤਰ੍ਹਾਂ ਦੇ ਕੈਂਸਰ ਦੇ ਨੁਕਸਾਨ ਨੂੰ ਅਜੇ ਵੀ ਮਾਪਿਆ ਨਹੀਂ ਜਾ ਸਕਦਾ ਹੈ ਜੋ ਹੌਲੀ-ਹੌਲੀ ਵਧਦੇ ਹਨ, ਜਾਂ ਤੇਜ਼ੀ ਨਾਲ ਵਧਣ ਵਾਲੀਆਂ ਬਿਮਾਰੀਆਂ ਦੌਰਾਨ ਜਿਨ੍ਹਾਂ ਦੇ ਲੱਛਣ ਲੁਕੇ ਹੋਏ ਹੋ ਸਕਦੇ ਹਨ। 

ਉਦਾਹਰਣ ਲਈ ਫੇਫੜਿਆਂ ਦੇ ਕੈਂਸਰ ਦੌਰਾਨ ਲਗਾਤਾਰ ਖੰਘ ਦਾ ਲੱਛਣ, ਕੋਵਿਡ ਦੇ ਇੱਕ ਆਮ ਲੱਛਣ ਦੇ ਸਮਾਨ ਹੈ। ਕੋਵਿਡ ਦੌਰਾਨ ਰਿਕਾਰਡ ਕੀਤੀਆਂ ਗਈਆਂ ਮੌਤਾਂ ਵੀ ਤਸਵੀਰ ਨੂੰ ਧੁੰਦਲਾ ਕਰ ਸਕਦੀਆਂ ਹਨ। ਹੋ ਸਕਦਾ ਹੈ ਕਿ ਕੁਝ ਦੀ ਮੌਤ ਦਾ ਕੋਈ ਹੋਰ ਕਾਰਨ ਹੋਵੇ। ਦਰਅਸਲ ਕੈਂਸਰ ਨਾਲ ਨਜਿੱਠਣ ਵਿੱਚ ਬ੍ਰਿਟੇਨ ਦੀਆਂ ਸਮੱਸਿਆਵਾਂ ਦਾ ਇੱਕੋ ਇੱਕ ਕਾਰਨ ਮਹਾਮਾਰੀ ਅਤੇ ਲਾਕਡਾਊਨ ਨਹੀਂ ਹੈ। 18 ਅਮੀਰ ਦੇਸ਼ਾਂ ਵਿੱਚੋਂ, ਬ੍ਰਿਟੇਨ ਵਿੱਚ ਪਹਿਲਾਂ ਹੀ ਤਿੰਨ ਸਭ ਤੋਂ ਆਮ ਕੈਂਸਰ: ਫੇਫੜੇ, ਕੋਲਨ ਅਤੇ ਛਾਤੀ ਲਈ ਪੰਜ ਸਾਲਾਂ ਦੀ ਜਿਊਂਦਾ ਰਹਿਣ ਦੀ ਦਰ ਸਭ ਤੋਂ ਘੱਟ ਸੀ। ਇਸ ਵਿੱਚ ਕਿਸੇ ਵੀ ਹੋਰ ਜੀ 7 ਦੇਸ਼ ਦੀ ਤੁਲਨਾ ਵਿਚ ਪ੍ਰਤੀ ਵਿਅਕਤੀ ਕੈਂਸਰ ਨਾਲ ਵੱਧ ਮੌਤਾਂ ਹੋਈਆਂ ਹਨ। ਗ਼ਰੀਬ ਬਰਤਾਨਵੀ ਲੋਕਾਂ ਦੇ ਇਸ ਬਿਮਾਰੀ ਨਾਲ ਮਰਨ ਦੀ ਸੰਭਾਵਨਾ ਵਧੇਰੇ ਹੁੰਦੀ ਹੈ।