ਸਿੰਗਾਪੁਰ ਏਅਰਸ਼ੋਅ ਤੋਂ ਪਹਿਲਾਂ ਵੱਡੀ ਸਾਜ਼ਿਸ਼? ''ਪਾਯਾ ਲੇਬਰ ਏਅਰ ਬੇਸ'' ''ਚ ਬੰਬ ਦੀ ਖ਼ਬਰ ਨਾਲ ਮਚੀ ਹਫੜਾ-ਦਫੜੀ !

ਸਿੰਗਾਪੁਰ (ਏਜੰਸੀ) - ਸਿੰਗਾਪੁਰ ਦੇ ਸਭ ਤੋਂ ਵੱਡੇ 'ਪਾਯਾ ਲੇਬਰ ਏਅਰ ਬੇਸ' ਨੂੰ ਬੰਬ ਨਾਲ ਉਡਾਉਣ ਦੀ ਧਮਕੀ ਮਿਲਣ ਤੋਂ ਬਾਅਦ ਪੂਰੇ ਦੇਸ਼ ਵਿੱਚ ਸਨਸਨੀ ਫੈਲ ਗਈ। ਹਾਲਾਂਕਿ, ਸੁਰੱਖਿਆ ਏਜੰਸੀਆਂ ਦੀ ਸਖ਼ਤ ਜਾਂਚ ਤੋਂ ਬਾਅਦ ਇਹ ਧਮਕੀ ਫ਼ਰਜ਼ੀ ਨਿਕਲੀ।

ਆਨਲਾਈਨ ਪੋਸਟ ਰਾਹੀਂ ਦਿੱਤੀ ਗਈ ਸੀ ਚਿਤਾਵਨੀ 

ਰੱਖਿਆ ਮੰਤਰਾਲਾ ਦੇ ਬੁਲਾਰੇ ਅਨੁਸਾਰ, 'ਰੀਪਬਲਿਕ ਆਫ਼ ਸਿੰਗਾਪੁਰ ਏਅਰ ਫੋਰਸ' ਨੂੰ ਇੱਕ ਸੋਸ਼ਲ ਮੀਡੀਆ ਪਲੇਟਫਾਰਮ 'ਰੈਡਿਟ' ਰਾਹੀਂ ਇਹ ਧਮਕੀ ਦਿੱਤੀ ਗਈ ਸੀ। ਪੋਸਟ ਵਿੱਚ ਦਾਅਵਾ ਕੀਤਾ ਗਿਆ ਸੀ ਕਿ ਇੱਕ ਨਿਸ਼ਚਿਤ ਸਮੇਂ ਅਤੇ ਤਰੀਕ 'ਤੇ ਏਅਰ ਬੇਸ ਦੇ ਅੰਦਰ ਧਮਾਕਾ ਕੀਤਾ ਜਾਵੇਗਾ। ਧਮਕੀ ਮਿਲਦੇ ਹੀ ਹਵਾਈ ਸੈਨਾ ਅਤੇ ਪੁਲਸ ਹਰਕਤ ਵਿੱਚ ਆ ਗਈ ਅਤੇ ਪੂਰੇ ਏਅਰ ਬੇਸ ਦੀ ਬਾਰੀਕੀ ਨਾਲ ਤਲਾਸ਼ੀ ਲਈ ਗਈ।

ਸਿੰਗਾਪੁਰ ਏਅਰਸ਼ੋਅ 2026 ਤੋਂ ਪਹਿਲਾਂ ਵਧੀ ਚਿੰਤਾ 

ਦੱਸ ਦੇਈਏ ਕਿ ਇਹ ਧਮਕੀ ਅਜਿਹੇ ਸਮੇਂ ਮਿਲੀ ਹੈ ਜਦੋਂ ਸਿੰਗਾਪੁਰ 3 ਤੋਂ 8 ਫਰਵਰੀ ਤੱਕ ਵਿਸ਼ਵ ਪੱਧਰੀ 'ਸਿੰਗਾਪੁਰ ਏਅਰਸ਼ੋਅ' ਦੀ ਮੇਜ਼ਬਾਨੀ ਕਰਨ ਜਾ ਰਿਹਾ ਹੈ। ਇਸ ਏਅਰਸ਼ੋਅ ਵਿੱਚ ਭਾਰਤੀ ਹਵਾਈ ਸੈਨਾ ਦੀ ਮਸ਼ਹੂਰ 'ਸਾਰੰਗ ਹੈਲੀਕਾਪਟਰ ਟੀਮ' ਵੀ ਆਪਣੀ ਕਲਾਬਾਜ਼ੀ ਦਿਖਾਉਣ ਲਈ ਪਹੁੰਚ ਰਹੀ ਹੈ। ਅਜਿਹੇ ਵੱਡੇ ਪ੍ਰੋਗਰਾਮ ਤੋਂ ਠੀਕ ਪਹਿਲਾਂ ਮਿਲੀ ਇਸ ਧਮਕੀ ਨੇ ਸੁਰੱਖਿਆ ਏਜੰਸੀਆਂ ਨੂੰ ਚੌਕਸ ਕਰ ਦਿੱਤਾ ਹੈ।

ਦੋਸ਼ੀਆਂ ਦੀ ਭਾਲ ਜਾਰੀ 

ਰੱਖਿਆ ਮੰਤਰਾਲੇ ਨੇ ਸਪੱਸ਼ਟ ਕੀਤਾ ਹੈ ਕਿ ਜਾਂਚ ਦੌਰਾਨ ਕੋਈ ਵੀ ਸ਼ੱਕੀ ਵਸਤੂ ਨਹੀਂ ਮਿਲੀ। ਪੁਲਸ ਨੇ ਇਸ ਸਬੰਧੀ ਮਾਮਲਾ ਦਰਜ ਕਰ ਲਿਆ ਹੈ ਅਤੇ ਇਹ ਪਤਾ ਲਗਾਇਆ ਜਾ ਰਿਹਾ ਹੈ ਕਿ ਇਹ ਫ਼ਰਜ਼ੀ ਪੋਸਟ ਕਿਸ ਨੇ ਅਤੇ ਕਿਸ ਮਕਸਦ ਨਾਲ ਪਾਈ ਸੀ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਅਫਵਾਹ ਫੈਲਾਉਣ ਵਾਲਿਆਂ ਵਿਰੁੱਧ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।