ਇੰਡੋਨੇਸ਼ੀਆ : ਜਵਾਲਾਮੁਖੀ 'ਚ ਜ਼ਬਰਦਸਤ ਧਮਾਕਿਆਂ ਪਿੱਛੋਂ ਕਈ ਫਲਾਈਟਾਂ ਰੱਦ, ਵੱਡੀ ਗਿਣਤੀ 'ਚ ਭਾਰਤੀਆਂ ਦੇ ਫਸੇ ਹੋਣ ਦਾ ਖ
11/27/2017 5:11:55 PM
ਜਕਾਰਤਾ— ਇੰਡੋਨੇਸ਼ੀਆ 'ਚ ਉਸ ਵੇਲੇ ਦਹਿਸ਼ਤ ਦਾ ਮਾਹੌਲ ਬਣ ਗਿਆ ਜਦੋਂ ਬਾਲੀ ਟਾਪੂ 'ਤੇ ਸਥਿਤ ਜਵਾਲਾਮੁਖੀ ਅਚਾਨਕ ਸਰਗਰਮ ਹੋ ਗਿਆ ਤੇ ਉਸ 'ਚ ਧਮਾਕੇ ਨਾਲ ਹਜ਼ਾਰਾਂ ਮੀਟਰ ਉੱਚੇ ਧੂੰਏ ਦੇ ਬੱਦਲ ਛਾ ਗਏ।
ਇੰਡੋਨੇਸ਼ੀਆ ਦੇ ਮਸ਼ਹੂਰ ਬਾਲੀ ਟਾਪੂ ਦੇ ਮਾਊਂਟ ਅਗੁੰਗ 'ਚ ਜਵਾਲਾਮੁਖੀ 'ਚ ਲਗਾਤਾਰ ਧਮਾਕੇ ਹੋ ਰਹੇ ਹਨ, ਜਿਸ ਨਾਲ ਨੇੜੇ ਦੀਆਂ ਕਈ ਥਾਵਾਂ ਰਾਖ ਨਾਲ ਢੱਕੀਆਂ ਗਈਆਂ। ਦੱਸਿਆ ਜਾ ਰਿਹਾ ਹੈ ਕਿ ਇਸ ਟਾਪੂ 'ਤੇ ਜ਼ਿਆਦਾਤਰ ਭਾਰਤੀਆਂ ਤੇ ਆਸਟਰੇਲੀਅਨਾਂ ਦੇ ਫਸੇ ਹੋਣ ਦਾ ਖਦਸ਼ਾ ਹੈ।
ਇੰਡੋਨੇਸ਼ੀਆ ਦੀ ਸਰਕਾਰ ਨੇ ਜਵਾਲਾਮੁਖੀ ਧਮਾਕਿਆਂ ਨੂੰ ਦੇਖਦੇ ਹੋਏ ਹਵਾਈ ਉਡਣਾ ਲਈ ਚਿਤਾਵਨੀ ਜਾਰੀ ਕੀਤੀ ਹੈ ਤੇ ਕਈ ਫਲਾਈਟਾਂ ਨੂੰ ਰੱਦ ਕਰ ਦਿੱਤਾ ਗਿਆ ਹੈ। ਹਾਲ 'ਚ ਕੈਂਸਲ ਕੀਤੀਆਂ ਫਲਾਇਟਾਂ ਕਾਰਨ 5,500 ਯਾਤਰੀਆਂ ਨੂੰ ਸਟੈਂਡਬਾਏ ਰੱਖਿਆ ਗਿਆ ਹੈ।
ਜਾਣਕਾਰੀ ਮੁਤਾਬਕ ਇਹ ਹੁਣ ਤੱਕ ਦਾ ਸਭ ਤੋਂ ਵੱਡਾ ਧੂੰਏ ਦਾ ਗੁਬਾਰ ਹੈ। ਇਸ ਤੋਂ ਪਹਿਲਾਂ ਜਵਾਲਾਮੁਖੀ ਦੀ ਸਰਗਰਮੀ ਨੂੰ ਦੇਖਦੇ ਹੋਏ 7.5 ਕਿਲੋਮੀਟਰ ਦੇ ਦਾਇਰੇ ਦੇ ਰਿਹਾਇਸ਼ੀ ਇਲਾਕੇ ਨੂੰ ਖਾਲੀ ਕਰਵਾ ਲਿਆ ਗਿਆ ਸੀ।
ਦੱਸਿਆ ਜਾ ਰਿਹਾ ਹੈ ਕਿ ਇਸ ਜਵਾਲਾਮੁਖੀ 'ਚ ਸਭ ਤੋਂ ਪਹਿਲਾ ਧਮਾਕਾ ਸਥਾਨਕ ਸਮੇਂ ਮੁਤਾਬਕ ਸ਼ਨੀਵਾਰ ਸਵੇਰੇ 4:30 ਵਜੇ ਹੋਇਆ ਸੀ।
ਬਾਲੀ ਦੀ ਡਿਜ਼ਾਸਟਰ ਮੈਨੇਜਮੈਂਟ ਏਜੰਸੀ ਦਾ ਕਹਿਣਾ ਹੈ ਕਿ ਇਹ ਧਮਾਕੇ ਐਤਵਾਰ ਨੂੰ ਵੀ ਜਾਰੀ ਹਨ ਤੇ ਹਵਾ 'ਚ 2,000 ਮੀਟਰ ਦਾ ਧੂੰਏ ਦਾ ਗੁਬਾਰ ਛਾਇਆ ਹੋਇਆ ਹੈ। ਜਾਣਕਾਰੀ ਮੁਤਾਬਤ ਇਨ੍ਹਾਂ ਧਮਾਕਿਆਂ ਤੋਂ ਬਾਅਦ ਇੰਡੋਨੇਸ਼ੀਆ ਸਰਕਾਰ ਵਲੋਂ ਲੈਵਲ 3 ਦਾ ਅਲਰਟ ਜਾਰੀ ਕੀਤਾ ਗਿਆ ਹੈ।
