ਆਸਿਮ ਮੁਨੀਰ ਦਾ ਖ਼ੌਫ਼ਨਾਕ ਚਿਹਰਾ ਹੋਇਆ ਬੇਨਕਾਬ ! ਜੈਸ਼ ਕਮਾਂਡਰ ਨੇ ਖੋਲ੍ਹੇ ਪਾਕਿਸਤਾਨੀ ਫੌਜ ਦੇ ਕਾਲੇ ਚਿੱਠੇ

ਇੰਟਰਨੈਸ਼ਨਲ ਡੈਸਕ : ਭਾਰਤ ਵੱਲੋਂ ਚਲਾਈ ਗਈ 'ਆਪਰੇਸ਼ਨ ਸਿੰਦੂਰ' ਦੀ ਮੁਹਿੰਮ ਤੋਂ ਬਾਅਦ ਪਾਕਿਸਤਾਨੀ ਫੌਜ ਤੇ ਅੱਤਵਾਦੀ ਸੰਗਠਨਾਂ ਦੇ ਨਾਪਾਕ ਗਠਜੋੜ ਦਾ ਇੱਕ ਵੱਡਾ ਖੁਲਾਸਾ ਹੋਇਆ ਹੈ। ਅੱਤਵਾਦੀ ਸੰਗਠਨ ਜੈਸ਼-ਏ-ਮੁਹੰਮਦ ਦੇ ਟਾਪ ਕਮਾਂਡਰ ਇਲੀਆਸ ਕਸ਼ਮੀਰੀ ਨੇ ਕਬੂਲ ਕੀਤਾ ਹੈ ਕਿ ਪਾਕਿਸਤਾਨੀ ਫੌਜ ਦੇ ਮੁਖੀ ਆਸਿਮ ਮੁਨੀਰ ਨੇ ਖੁਦ ਅੱਤਵਾਦੀਆਂ ਨੂੰ ਭਾਰਤ ਵਿਰੁੱਧ ਜੰਗ ਲਈ ਉਕਸਾਉਂਦਿਆਂ 'ਗਜ਼ਵਾ-ਏ-ਹਿੰਦ' ਦਾ ਨਾਅਰਾ ਦਿੱਤਾ ਸੀ।

ਅੱਤਵਾਦੀਆਂ ਦੀ ਰੈਲੀ 'ਚ ਖੋਲ੍ਹੇ ਰਾਜ਼ 
5 ਫਰਵਰੀ ਨੂੰ ਪੀ.ਓ.ਕੇ. (PoK) ਦੇ ਰਾਡਲਕੋਟ ਵਿੱਚ ਨਵੇਂ ਭਰਤੀ ਕੀਤੇ ਗਏ ਅੱਤਵਾਦੀਆਂ ਦੀ ਇੱਕ ਰੈਲੀ ਨੂੰ ਸੰਬੋਧਨ ਕਰਦਿਆਂ ਇਲੀਆਸ ਕਸ਼ਮੀਰੀ ਨੇ ਦੱਸਿਆ ਕਿ ਜਦੋਂ ਜੰਗ ਦੇ ਹਾਲਾਤ ਬਣੇ ਸਨ, ਉਦੋਂ ਉਨ੍ਹਾਂ ਦੇ ਸਿਪਹਸਾਲਾਰ (ਆਸਿਮ ਮੁਨੀਰ) ਨੇ ਐਲਾਨ ਕੀਤਾ ਸੀ ਕਿ ਇਹ 'ਗਜ਼ਵਾ-ਏ-ਹਿੰਦ' (ਭਾਰਤ ਵਿਰੁੱਧ ਧਰਮ ਯੁੱਧ) ਹੈ। ਕਸ਼ਮੀਰੀ ਨੇ ਕਿਹਾ ਕਿ ਜਿਹਾਦ ਹੀ ਉਨ੍ਹਾਂ ਦੀ ਪਛਾਣ ਅਤੇ ਮਕਸਦ ਹੈ, ਚਾਹੇ ਸਰਕਾਰ ਉਨ੍ਹਾਂ ਦਾ ਸਾਥ ਦੇਵੇ ਜਾਂ ਨਾ।

'ਆਪਰੇਸ਼ਨ ਸਿੰਦੂਰ' ਨੇ ਉਡਾਏ ਹੋਸ਼ 
ਭਾਰਤ ਨੇ 'ਆਪਰੇਸ਼ਨ ਸਿੰਦੂਰ' ਤਹਿਤ ਪਾਕਿਸਤਾਨ ਅਤੇ ਪੀ.ਓ.ਕੇ. ਵਿੱਚ ਅੱਤਵਾਦੀਆਂ ਦੇ ਕਿਲ੍ਹਿਆਂ ਨੂੰ ਨੇਸਤਨਾਬੂਦ ਕਰ ਦਿੱਤਾ ਸੀ। ਇਸ ਏਅਰਸਟ੍ਰਾਈਕ ਵਿੱਚ ਜੈਸ਼-ਏ-ਮੁਹੰਮਦ ਦਾ ਗੜ੍ਹ ਮੰਨੇ ਜਾਣ ਵਾਲੇ ਬਹਾਵਲਪੁਰ ਵਿੱਚ ਸਿਖਲਾਈ ਕੇਂਦਰਾਂ ਨੂੰ ਤਬਾਹ ਕਰ ਦਿੱਤਾ ਗਿਆ ਸੀ। ਇਲੀਆਸ ਕਸ਼ਮੀਰੀ ਨੇ ਪਹਿਲਾਂ ਵੀ ਖੁਲਾਸਾ ਕੀਤਾ ਸੀ ਕਿ 7 ਮਈ ਨੂੰ ਹੋਏ ਭਾਰਤੀ ਹਮਲੇ ਵਿੱਚ ਜੈਸ਼ ਮੁਖੀ ਮੌਲਾਨਾ ਮਸੂਦ ਅਜ਼ਹਰ ਦਾ ਪਰਿਵਾਰ ਮਾਰਿਆ ਗਿਆ ਸੀ।

ਪਾਕਿਸਤਾਨ ਦੀ 'ਸ਼ੀਸ਼ੇ ਦੀ ਦੀਵਾਰ' ਹੋਈ ਚਕਨਾਚੂਰ
 ਭਾਰਤ ਦੀ ਕਾਰਵਾਈ ਦੇ ਜਵਾਬ ਵਿੱਚ ਪਾਕਿਸਤਾਨ ਨੇ ਆਪਣੇ ਆਪਰੇਸ਼ਨ ਦਾ ਨਾਂ 'ਬੁਨਯਾਨ ਅਲ ਮਰਸੂਸ' ਰੱਖਿਆ ਸੀ, ਜਿਸਦਾ ਮਤਲਬ ਹੈ 'ਸ਼ੀਸ਼ੇ ਵਰਗੀ ਮਜ਼ਬੂਤ ਦੀਵਾਰ'। ਇਸ ਨਾਂ ਰਾਹੀਂ ਪਾਕਿਸਤਾਨ ਦੁਨੀਆ ਸਾਹਮਣੇ ਖੁਦ ਨੂੰ ਮਜ਼ਬੂਤ ਦਿਖਾਉਣਾ ਚਾਹੁੰਦਾ ਸੀ, ਪਰ ਭਾਰਤ ਦੀਆਂ ਸਟ੍ਰਾਈਕਾਂ ਨੇ ਉਸ ਦੇ ਅੱਤਵਾਦੀ ਢਾਂਚੇ ਨੂੰ ਬੁਰੀ ਤਰ੍ਹਾਂ ਢਹਿ-ਢੇਰੀ ਕਰ ਦਿੱਤਾ। ਇਸ ਕਬੂਲਨਾਮੇ ਤੋਂ ਬਾਅਦ ਹੁਣ ਇੱਕ ਵਾਰ ਫਿਰ ਪਾਕਿਸਤਾਨੀ ਫੌਜ ਦੀ ਅੱਤਵਾਦੀਆਂ ਨਾਲ ਮਿਲੀਭੁਗਤ ਦੁਨੀਆ ਸਾਹਮਣੇ ਬੇਨਕਾਬ ਹੋ ਗਈ ਹੈ।

ਜਗ ਬਾਣੀ ਈ-ਪੇਪਰ ਨੂੰ ਪੜ੍ਹਨ ਅਤੇ ਐਪ ਨੂੰ ਡਾਊਨਲੋਡ ਕਰਨ ਲਈ ਇੱਥੇ ਕਲਿੱਕ ਕਰੋ

For Android:- https://play.google.com/store/apps/details?id=com.jagbani&hl=en

For IOS:- https://itunes.apple.com/in/app/id538323711?mt=8

For Whatsapp:- https://whatsapp.com/channel/0029Va94hsaHAdNVur4L170e