ਮਾਨਚੈਸਟਰ ਨੇੜੇ ਜੰਗਲਾਂ ''ਚ ਲੱਗੀ ਅੱਗ 500 ਏਕੜ ''ਚ ਫੈਲੀ

ਨਿਊਜਰਸੀ (ਵਾਰਤਾ)- ਅਮਰੀਕਾ ਵਿਚ ਮਾਨਚੈਸਟਰ ਟਾਊਨਸ਼ਿਪ ਨੇੜੇ ਜੰਗਲਾਂ ਵਿਚ ਲੱਗੀ ਅੱਗ 500 ਏਕੜ ਵਿਚ ਫੈਲ ਗਈ ਹੈ ਅਤੇ ਫਾਇਰ ਫਾਈਟਰ ਇਸ ਨੂੰ ਬੁਝਾਉਣ ਲਈ ਸਖ਼ਤ ਮਿਹਨਤ ਕਰ ਰਹੇ ਹਨ। ਨਿਊਜਰਸੀ ਫੋਰੈਸਟ ਫਾਇਰ ਸਰਵਿਸ ਨੇ ਮੰਗਲਵਾਰ ਨੂੰ ਦੱਸਿਆ ਕਿ ਨੇਜਦੀਪ ਫੋਰੈਸਟ ਫਾਇਰ ਅਤੇ ਮੈਕਗਾਇਰ-ਡਿਕਸ-ਲੇਕਹਰਸਟ ਫਾਇਰ ਡਿਪਾਰਟਮੈਂਟ ਦੀ ਯੂਨੀਫਾਈਡ ਕਮਾਂਡ ਦੇ ਫਾਇਰ ਫਾਈਟਰ ਮਾਨਚੈਸਟਰ ਟਾਊਨਸ਼ਿਪ ਦੇ ਜੰਗਲ ਵਿਚ ਲੱਗੀ ਅੱਗ ਨੂੰ ਬੁਝਾਉਣ, ਰੂਟ 539 ਅਤੇ ਹੋਰੀਕਨ ਐਵੀਨਿਊ ਦੇ ਨਾਲ ਰਾਜ ਦੀ ਅਤੇ ਨਿੱਜੀ ਸੰਪਤੀ ਨੂੰ ਬਚਾਉਣ ਵਿਚ ਲੱਗੇ ਹੋਏ ਹਨ।

ਅੱਗ 500 ਏਕੜ ਵਿਚ ਫੈਲ ਗਈ ਹੈ ਤੇ ਇਸ ਦੇ ਸਿਰਫ਼ 10 ਫ਼ੀਸਦੀ ਹਿੱਸੇ 'ਤੇ ਕਾਬੂ ਪਾਇਆ ਜਾ ਸਕਿਆ ਹੈ। ਉਨ੍ਹਾਂ ਦੱਸਿਆ ਕਿ ਫਾਇਰ ਫਾਈਟਰਾਂ ਨੇ ਅੱਗ 'ਤੇ ਕਾਬੂ ਪਾਉਣ ਲਈ ਮੁਹਿੰਮ ਸ਼ੁਰੂ ਕਰ ਦਿੱਤੀ ਹੈ। ਫਾਇਰ ਸਰਵਿਸ ਨੇ ਟਵੀਟ ਕਰਕੇ ਕਿਹਾ ਕਿ ਅੱਗ ਨਾਲ 25 ਇਮਾਰਤਾਂ ਨੂੰ ਖ਼ਤਰਾ ਹੈ। ਉਨ੍ਹਾਂ ਕਿਹਾ ਕਿ ਓਸ਼ਨ ਕਾਊਂਟੀ ਦੇ ਸਥਾਨਕ ਵਾਲੰਟੀਅਰ ਅੱਗ ਤੋਂ ਇਮਾਰਤਾਂ ਦੀ ਰੱਖਿਆ ਕਰ ਰਹੇ ਹਨ। ਫਾਇਰ ਸਰਵਿਸ ਨੇ ਦੱਸਿਆ ਕਿ ਲੋਂਗ ਸਵੈਂਪ ਰੋਡ ਅਤੇ ਰੂਟ 70 ਦੇ ਵਿਚਕਾਰ ਰੂਟ 539 ਨੂੰ ਬੰਦ ਕਰ ਦਿੱਤਾ ਗਿਆ ਹੈ ਅਤੇ ਰੂਟ 70 'ਤੇ ਹੋਰੀਕਨ ਐਵੇਨਿਊ ਬੰਦ ਹੈ।

ਉਨ੍ਹਾਂ ਦੱਸਿਆ ਕਿ ਨਿਊ ਜਰਸੀ ਦੇ ਲੇਕਹਰਸਟ ਬੋਰੋ ਵਿੱਚ ਡਿਵੀਜ਼ਨ ਸਟ੍ਰੀਟ ਦੇ ਵਸਨੀਕਾਂ ਲਈ ਇੱਕ ਲਾਜ਼ਮੀ ਨਿਕਾਸੀ ਦਾ ਆਦੇਸ਼ ਜਾਰੀ ਕੀਤਾ ਗਿਆ ਹੈ। ਫਾਇਰ ਸਰਵਿਸ ਨੇ ਅੱਗ ਬੁਝਾਉਣ ਵਾਲੇ ਖੇਤਰ ਵਿੱਚ ਡਰੋਨ ਨਾ ਉਡਾਉਣ ਦੀ ਅਪੀਲ ਕਰਦੇ ਹੋਏ ਕਿਹਾ ਕਿ ਜੇਕਰ ਕੋਈ ਡਰੋਨ ਜੰਗਲ ਦੀ ਅੱਗ ਦੇ ਉੱਪਰ ਜਾਂ ਨੇੜੇ ਉੱਡਦਾ ਪਾਇਆ ਜਾਂਦਾ ਹੈ, ਤਾਂ ਉਸ ਨੂੰ ਜੰਗਲਾਤ ਫਾਇਰ ਸਰਵਿਸ ਦੇ ਹਵਾਈ ਸਹਾਇਤਾ ਨਾਲ ਡੇਗ ਦਿੱਤਾ ਜਾਵੇਗਾ।