ਇਸ ਕੁੜੀ ਨੇ ਅੰਬ ਦੀਆਂ ਗਿਟਕਾਂ ਨਾਲ ਬਣਾਈ ਖੂਬਸੂਰਤ ਡਰੈੱਸ, ਬਣੀ ਚਰਚਾ ਦਾ ਵਿਸ਼ਾ (ਤਸਵੀਰਾਂ)

ਸਿਡਨੀ (ਬਿਊਰੋ): ਕਿਸੇ ਨੇ ਸੱਚ ਹੀ ਕਿਹਾ ਹੈ ਕਿ ਸ਼ੌਂਕ ਬਹੁਤ ਵੱਡੀ ਗੱਲ ਹੈ। ਸ਼ੌਂਕ ਨਾਲ ਸਬੰਧਤ ਆਸਟ੍ਰੇਲੀਆ ਦੇ ਕੁਈਨਜ਼ਲੈਂਡ ਦਾ ਇਕ ਦਿਲਚਸਪ ਮਾਮਲਾ ਸਾਹਮਣੇ ਆਇਆ ਹੈ। ਇੱਥੇ ਇਕ 18 ਸਾਲਾ ਕੁੜੀ ਨੇ ਅੰਬ ਦੀਆਂ ਗਿਟਕਾਂ ਨਾਲ ਬਹੁਤ ਹੀ ਖੂਬਸੂਰਤ ਡਰੈੱਸ ਬਣਾਈ ਹੈ। ਇਸ ਡਰੈੱਸ ਦੀ ਦੁਨੀਆ ਭਰ ਵਿਚ ਤਾਰੀਫ ਹੋ ਰਹੀ ਹੈ। ਜੇਸਿਕਾ ਕੋਲਿਸਨਸ ਨਾਮ ਦੀ ਇਸ ਕੁੜੀ ਨੇ ਆਪਣੀ ਡਰੈੱਸ ਬਣਾਉਣ ਲਈ 700 ਅੰਬ ਦੀਆਂ ਗਿਟਕਾਂ ਦੀ ਵਰਤੋਂ ਕੀਤੀ ਹੈ। ਜੇਸਿਕਾ ਨੇ ਇਹ ਡਰੈੱਸ ਆਪਣੇ ਫਾਈਨਲ ਡਿਜ਼ਾਈਨ ਐਂਡ ਤਕਨਾਲੋਜੀ ਪ੍ਰਾਜੈਕਟ ਦੇ ਲਈ ਬਣਾਈ ਹੈ।

ਇੰਝ ਬਣਾਈ ਡਰੈੱਸ
11ਵੀਂ ਕਲਾਸ ਵਿਚ ਪੜ੍ਹਨ ਵਾਲੀ ਜੇਸਿਕਾ ਦੱਸਦੀ ਹੈ ਕਿ ਉਹ ਕਈ ਸਾਲਾਂ ਤੋਂ ਆਪਣੇ ਅੰਬਾਂ ਦੇ ਖੇਤ ਵਿਚ ਗਿਟਕਾਂ ਨੂੰ ਬੇਕਾਰ ਹੁੰਦੇ ਦੇਖ ਰਹੀ ਸੀ। ਇਸ ਦੇ ਬਾਅਦ ਉਸ ਨੇ ਇਹਨਾਂ ਗਿਟਕਾਂ ਨੂੰ ਇਕੱਠਾ ਕਰਨਾ ਸ਼ੁਰੂ ਕਰ ਦਿੱਤਾ। ਉਹ ਅੰਬ ਦਾ ਗੁਦਾ ਕੱਢ ਕੇ ਗਿਟਕ ਨੂੰ ਪੂਰੀ ਤਰ੍ਹਾਂ ਸਾਫ ਕਰ ਲੈਂਦੀ ਸੀ ਅਤੇ ਫਿਰ ਉਸ ਨੂੰ ਉੱਲੀ ਲੱਗਣ ਤੋਂ ਬਚਾਉਣ ਲਈ ਸੁਕਾ ਦਿੰਦੀ ਸੀ।

ਫਿਰ ਉਸ ਨੂੰ ਸਮਤਲ ਬਣਾਉਂਦੀ ਸੀ। ਇਸ ਦੇ ਬਾਅਦ ਉਸ ਨੇ ਇਸ ਨਾਲ ਡਰੈੱਸ ਬਣਾਉਣੀ ਸ਼ੁਰੂ ਕਰ ਦਿੱਤੀ। ਗਿਟਕਾਂ ਛੋਟੀਆਂ ਅਤੇ ਸਮਤਲ ਸਨ ਤਾਂ ਡਰੈੱਸ ਬਣਾਉਣ ਵਿਚ ਕੋਈ ਮੁਸ਼ਕਲ ਨਹੀਂ ਆਈ। ਇਸ 'ਤੇ ਜੇਸਿਕਾ ਨੇ ਰੰਗ ਕਰਨ ਦੇ ਬਾਰੇ ਵਿਚ ਇਸ ਲਈ ਨਹੀਂ ਸੋਚਿਆ ਕਿਉਂਕਿ ਸੁੱਕਣ ਦੇ ਬਾਅਦ ਉਹਨਾਂ ਦਾ ਰੰਗ ਕੁਦਰਤੀ ਤੌਰ 'ਤੇ ਕਾਫੀ ਚੰਗਾ ਹੋ ਜਾਂਦਾ ਸੀ।

ਰੋਜ਼ਾਨਾ ਤਿੰਨ ਘੰਟੇ ਕਰਦੀ ਸੀ ਕੰਮ
ਇਸ ਦੇ ਬਾਅਦ ਜੇਸਿਕਾ ਨੇ ਇਹਨਾਂ ਗਿਟਕਾਂ ਨੂੰ ਗਾਊਨ ਬਣਾਉਣ ਲਈ ਸਿਉਣਾ ਸ਼ੁਰੂ ਕੀਤਾ। ਇਸ ਦੇ ਲਈ ਕਰੀਬ 280 ਕਿਲੋ ਅੰਬ ਲੱਗੇ। ਜੇਸਿਕਾ ਦੱਸਦੀ ਹੈ ਕਿ ਉਹ ਕੋਰੋਨਾਵਾਇਰਸ ਮਹਾਮਾਰੀ ਦੇ ਦੌਰਾਨ ਆਪਣੇ ਘਰ ਤੋਂ ਖੇਤ ਤੱਕ ਜਾਂਦੀ ਸੀ।ਉੱਥੇ ਉਹ ਚਾਰ ਮਹੀਨੇ ਤੱਕ ਰਹੀ। ਉਹ ਰੋਜ਼ਾਨਾ 3 ਘੰਟੇ ਡਰੈੱਸ ਬਣਾਉਣ ਵਿਚ ਲਗਾਉਂਦੀ ਸੀ।

ਇਸ ਦੌਰਾਨ ਉਸ ਨੂੰ ਕਾਫੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ। ਜਿਵੇਂ ਸੂਈ ਬਾਰ-ਬਾਰ ਟੁੱਟ ਜਾਂਦੀ ਸੀ ਪਰ ਆਖਿਰਕਾਰ ਡਰੈੱਸ ਬਣ ਕੇ ਤਿਆਰ ਹੋ ਗਈ। ਹੁਣ ਉਹ ਕਾਫੀ ਖੁਸ਼ ਹੈ। ਉਸ ਨੇ ਆਪਣੇ ਪ੍ਰਾਜੈਕਟ ਦੇ ਲਈ ਇਕ 80 ਪੇਜ ਦਾ ਪੋਰਟਫੋਲੀਓ ਵੀ ਤਿਆਰ ਕੀਤਾ ਹੈ।

ਇਸ ਤਰ੍ਹਾਂ ਦਾ ਕੱਪੜਾ ਚਾਹੁੰਦੀ ਹੈ ਜੇਸਿਕਾ
ਜੇਸਿਕਾ ਦੀ ਮਾਂ ਕਾਇਲੀ ਦੱਸਦੀ ਹੈ ਕਿ ਤਕਨੀਕ ਅਤੇ ਪੈਸੇ ਦੀ ਕਮੀ ਦੇ ਬਾਵਜੂਦ ਵੀ ਉਹਨਾਂ ਦੀ ਬੇਟੀ ਨੇ ਇਕ ਖੂਬਸੂਰਤ ਡਰੈੱਸ ਤਿਆਰ ਕੀਤੀ ਹੈ। ਇਸ ਡਰੈੱਸ ਦਾ ਕੁੱਲ ਵਜ਼ਨ 5 ਕਿਲੋ ਹੈ। ਜੇਸਿਕਾ ਦੇ ਮਾਤਾ-ਪਿਤਾ ਸਾਲ 1999 ਤੋਂ ਹੀ ਅੰਬਾਂ ਦੀ ਖੇਤੀ ਕਰ ਰਹੇ ਹਨ। ਪੂਰਾ ਸਾਲ ਆਸਟ੍ਰੇਲੀਆ ਵਿਚ ਇਹਨਾਂ ਦੇ ਅੰਬ ਡਿਲੀਵਰ ਹੁੰਦੇ ਹਨ। ਜਦੋਂ ਅੰਬ ਸੁਪਰਮਾਰਕੀਟਸ ਦੇ ਲਈ ਜਾਂਦੇ ਹਨ ਤਾਂ ਉਹਨਾਂ ਵਿਚ ਗੁਣਵੱਤਾ ਦਾ ਵੀ ਖਾਸ ਧਿਆਨ ਰੱਖਿਆ ਜਾਂਦਾ ਹੈ। ਜਿਸ ਕਾਰਨ ਅੰਬਾਂ ਦੀ ਛਾਂਟੀ ਹੋ ਜਾਂਦੀ ਹੈ। ਜੇਸਿਕਾ ਕਹਿੰਦੀ ਹੈ ਕਿ ਅੰਬ ਦੇ ਉਦਯੋਗ ਵਿਚ ਕਾਫੀ ਨੁਕਸਾਨ ਹੁੰਦਾ ਹੈ ਇਸ ਲਈ ਉਹ ਚਾਹੁੰਦੀ ਹੈ ਕਿ ਅੱਗੇ ਚੱਲ ਕੇ ਇਸ ਨਾਲ ਕੋਈ ਕਾਟਨ ਜਿਹਾ ਕੱਪੜਾ ਬਣਾਇਆ ਜਾ ਸਕੇ।