ਨਿਊਯਾਰਕ ਸਿਟੀ ਦੇ ਚਿੜੀਆਘਰ ''ਚ 15 ਪੰਛੀਆਂ ਦੇ ਬਰਡ ਫਲੂ ਨਾਲ ਮਰਨ ਦਾ ਖਦਸ਼ਾ

ਨਿਊਯਾਰਕ (ਏਜੰਸੀ)- ਨਿਊਯਾਰਕ ਸਿਟੀ ਦੇ 2 ਚਿੜੀਆਘਰਾਂ ਵਿੱਚ ਹੁਣ ਤੱਕ ਘੱਟੋ-ਘੱਟ 15 ਪੰਛੀਆਂ ਦੀ ਮੌਤ ਬਰਡ ਫਲੂ (ਏਵੀਅਨ ਫਲੂ) ਕਾਰਨ ਹੋਣ ਦਾ ਖਦਸ਼ਾ ਹੈ। ਇਹ ਜਾਣਕਾਰੀ ਚਿੜੀਆਘਰ ਚਲਾਉਣ ਵਾਲੀ ਇੱਕ ਸੰਸਥਾ ਨੇ ਦਿੱਤੀ। ਵਾਈਲਡ ਲਾਈਫ ਕੰਜ਼ਰਵੇਸ਼ਨ ਸੋਸਾਇਟੀ ਦੇ ਅਨੁਸਾਰ, ਕਵੀਨਜ਼ ਚਿੜੀਆਘਰ ਵਿੱਚ 3 ਬੱਤਖਾਂ ਦੀ ਮੌਤ ਏਵੀਅਨ ਫਲੂ ਨਾਲ ਹੋ ਗਈ। ਮਰੀਆਂ ਬੱਤਖਾਂ ਦੇ ਨਮੂਨਿਆਂ ਦੀ ਜਾਂਚ ਰਿਪੋਰਟ ਅਜੇ ਆਉਣੀ ਬਾਕੀ ਹੈ। ਬ੍ਰੌਂਕਸ ਚਿੜੀਆਘਰ ਦੇ 9 ਜੰਗਲੀ ਪੰਛੀਆਂ ਦੀ ਵੀ ਸੰਭਵ ਤੌਰ 'ਤੇ ਇਨਫੈਕਸ਼ਨ ਕਾਰਨ ਮੌਤ ਹੋ ਗਈ।

ਅਧਿਕਾਰੀਆਂ ਨੇ ਕਿਹਾ, "ਪਿਛਲੇ 2 ਹਫ਼ਤਿਆਂ ਵਿੱਚ ਅਸੀਂ ਸਾਵਧਾਨੀ ਦੇ ਤੌਰ 'ਤੇ ਪਾਰਕ ਦੇ ਸੁਰੱਖਿਅਤ ਖੇਤਰਾਂ ਵਿੱਚ ਸੰਕਟਗ੍ਰਸਤ ਪੰਛੀਆਂ ਦੀਆਂ ਪ੍ਰਜਾਤੀਆਂ ਨੂੰ ਤਬਦੀਲ ਕਰ ਦਿੱਤਾ ਹੈ।" ਰਾਜ ਦੇ ਅਧਿਕਾਰੀਆਂ ਨੇ ਸ਼ੁੱਕਰਵਾਰ ਨੂੰ ਮਹਾਨਗਰ ਖੇਤਰ ਦੇ ਸਾਰੇ ਪੰਛੀ ਬਾਜ਼ਾਰਾਂ ਨੂੰ ਇੱਕ ਹਫ਼ਤੇ ਲਈ ਬੰਦ ਕਰਨ ਦਾ ਆਦੇਸ਼ ਦਿੱਤਾ। ਇਹ ਫੈਸਲਾ ਬ੍ਰੌਂਕਸ, ਬਰੁਕਲਿਨ ਅਤੇ ਕਵੀਨਜ਼ ਵਿੱਚ ਨਿਯਮਤ ਨਿਰੀਖਣ ਦੌਰਾਨ ਏਵੀਅਨ ਫਲੂ ਦੇ 7 ਮਾਮਲੇ ਪਾਏ ਜਾਣ ਤੋਂ ਬਾਅਦ ਲਿਆ ਗਿਆ। ਨਿਊਯਾਰਕ ਦੀ ਗਵਰਨਰ ਕੈਥੀ ਹੋਚੁਲ ਨੇ ਕਿਹਾ ਕਿ ਇਸ ਵੇਲੇ ਇਸ ਵਾਇਰਸ ਤੋਂ ਜਨਤਕ ਸਿਹਤ ਨੂੰ ਕੋਈ ਖ਼ਤਰਾ ਨਹੀਂ ਹੈ, ਪਰ ਸਾਵਧਾਨੀ ਵਜੋਂ, ਪੰਛੀ ਬਾਜ਼ਾਰਾਂ ਨੂੰ ਬੰਦ ਕਰਨ ਦਾ ਫੈਸਲਾ ਲਿਆ ਗਿਆ ਹੈ। ਏਵੀਅਨ ਫਲੂ ਨੇ ਪੂਰੇ ਅਮਰੀਕਾ ਵਿੱਚ ਪੋਲਟਰੀ ਸੈਕਟਰ ਨੂੰ ਪ੍ਰਭਾਵਿਤ ਕੀਤਾ ਹੈ।