ਟਰੰਪ ਦਾ UK ਤੇ ਸਪੇਨ ''ਤੇ ਫੁੱਟਿਆ ਗੁੱਸਾ, ਸਪੇਨ ਨਾਲ ਵਪਾਰਕ ਰਿਸ਼ਤੇ ਖਤਮ ਕਰਨ ਦਾ ਐਲਾਨ
Wednesday, Mar 04, 2026 - 03:25 AM (IST)
ਵਾਸ਼ਿੰਗਟਨ: ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਈਰਾਨ ਵਿਰੁੱਧ ਚੱਲ ਰਹੀ ਫੌਜੀ ਕਾਰਵਾਈ ਦੌਰਾਨ ਸਹਿਯੋਗ ਨਾ ਦੇਣ 'ਤੇ ਆਪਣੇ ਪੁਰਾਣੇ ਸਹਿਯੋਗੀਆਂ, ਬ੍ਰਿਟੇਨ ਅਤੇ ਸਪੇਨ ਵਿਰੁੱਧ ਸਖ਼ਤ ਰੁਖ਼ ਅਖਤਿਆਰ ਕਰ ਲਿਆ ਹੈ। ਓਵਲ ਆਫਿਸ ਵਿੱਚ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਟਰੰਪ ਨੇ ਬ੍ਰਿਟਿਸ਼ ਪ੍ਰਧਾਨ ਮੰਤਰੀ ਕੀਰ ਸਟਾਰਮਰ ਦੀ ਰੱਜ ਕੇ ਨਿੰਦਾ ਕੀਤੀ ਅਤੇ ਸਪੇਨ ਨਾਲ ਸਾਰਾ ਵਪਾਰ ਬੰਦ ਕਰਨ ਦਾ ਵੱਡਾ ਐਲਾਨ ਕਰ ਦਿੱਤਾ।
"ਸਟਾਰਮਰ ਵਿੰਸਟਨ ਚਰਚਿਲ ਨਹੀਂ ਹਨ"- ਟਰੰਪ
ਰਾਸ਼ਟਰਪਤੀ ਟਰੰਪ ਨੇ ਬ੍ਰਿਟਿਸ਼ ਪ੍ਰਧਾਨ ਮੰਤਰੀ ਕੀਰ ਸਟਾਰਮਰ ਦੇ ਰਵੱਈਏ ਨੂੰ ਬਹੁਤ ਹੀ "ਅਣ-ਸਹਿਯੋਗੀ" ਦੱਸਿਆ। ਟਰੰਪ ਨੇ ਦੋਸ਼ ਲਗਾਇਆ ਕਿ ਯੂ.ਕੇ. ਨੇ ਸ਼ੁਰੂ ਵਿੱਚ ਅਮਰੀਕੀ ਬੰਬਾਰ ਜਹਾਜ਼ਾਂ ਨੂੰ ਚਾਗੋਸ ਟਾਪੂ 'ਤੇ ਸਥਿਤ 'ਡਿਏਗੋ ਗਾਰਸੀਆ' ਫੌਜੀ ਅੱਡੇ ਦੀ ਵਰਤੋਂ ਕਰਨ ਤੋਂ ਰੋਕ ਦਿੱਤਾ ਸੀ। ਟਰੰਪ ਨੇ ਤੰਜ ਕੱਸਦਿਆਂ ਕਿਹਾ, "ਅਸੀਂ ਜਿਸ ਵਿਅਕਤੀ ਨਾਲ ਸਿੱਝ ਰਹੇ ਹਾਂ, ਉਹ ਵਿੰਸਟਨ ਚਰਚਿਲ ਨਹੀਂ ਹੈ।" ਉਨ੍ਹਾਂ ਅੱਗੇ ਕਿਹਾ ਕਿ ਅਜਿਹੇ ਆਗੂ ਸਬੰਧਾਂ ਨੂੰ ਖਰਾਬ ਕਰਦੇ ਹਨ। ਹਾਲਾਂਕਿ, ਟਰੰਪ ਨੇ ਇਹ ਵੀ ਨੋਟ ਕੀਤਾ ਕਿ ਸਟਾਰਮਰ ਨੇ ਐਤਵਾਰ ਦੇਰ ਰਾਤ ਅਮਰੀਕੀ ਫੌਜ ਨੂੰ ਅੱਡਿਆਂ ਦੀ ਵਰਤੋਂ ਕਰਨ ਦੀ ਇਜਾਜ਼ਤ ਦੇ ਦਿੱਤੀ ਸੀ।
ਸਪੇਨ ਨਾਲ ਵਪਾਰਕ ਨਾਤਾ ਤੋੜਨ ਦੀ ਤਿਆਰੀ
ਟਰੰਪ ਦਾ ਸਭ ਤੋਂ ਸਖ਼ਤ ਹਮਲਾ ਸਪੇਨ 'ਤੇ ਰਿਹਾ। ਸਪੇਨ ਦੁਆਰਾ ਅਮਰੀਕੀ ਫੌਜ ਨੂੰ ਆਪਣੇ ਅੱਡੇ ਵਰਤਣ ਤੋਂ ਮਨ੍ਹਾ ਕਰਨ 'ਤੇ ਨਾਰਾਜ਼ ਟਰੰਪ ਨੇ ਐਲਾਨ ਕੀਤਾ ਕਿ ਅਮਰੀਕਾ ਸਪੇਨ ਨਾਲ ਸਾਰਾ ਵਪਾਰ ਖਤਮ ਕਰ ਦੇਵੇਗਾ। ਟਰੰਪ ਨੇ ਕਿਹਾ, "ਸਪੇਨ ਦਾ ਰਵੱਈਆ ਭਿਆਨਕ ਰਿਹਾ ਹੈ। ਅਸੀਂ ਸਪੇਨ ਨਾਲ ਕੋਈ ਲੈਣ-ਦੇਣ ਨਹੀਂ ਰੱਖਣਾ ਚਾਹੁੰਦੇ"। ਉਨ੍ਹਾਂ ਨੇ ਅਮਰੀਕੀ ਖਜ਼ਾਨਾ ਸਕੱਤਰ ਸਕਾਟ ਬੇਸੈਂਟ ਨੂੰ ਸਪੇਨ ਨਾਲ ਸਾਰੇ ਵਪਾਰਕ ਸਬੰਧ ਤੁਰੰਤ ਪ੍ਰਭਾਵ ਨਾਲ ਕੱਟਣ ਦੇ ਨਿਰਦੇਸ਼ ਦਿੱਤੇ ਹਨ।
ਜੰਗ ਕਾਰਨ 'ਵਿਸ਼ੇਸ਼ ਸਬੰਧਾਂ' 'ਚ ਆਈ ਦਰਾੜ
ਜ਼ਿਕਰਯੋਗ ਹੈ ਕਿ 28 ਫਰਵਰੀ ਨੂੰ ਅਮਰੀਕਾ ਅਤੇ ਇਜ਼ਰਾਈਲ ਨੇ ਈਰਾਨ 'ਤੇ ਵੱਡੇ ਹਵਾਈ ਹਮਲੇ ਕੀਤੇ ਸਨ, ਜਿਸ ਵਿੱਚ ਈਰਾਨੀ ਸੁਪਰੀਮ ਲੀਡਰ ਆਇਤੁੱਲਾ ਖਮੇਨੇਈ ਅਤੇ ਚਾਰ ਹੋਰ ਸੀਨੀਅਰ ਅਧਿਕਾਰੀ ਮਾਰੇ ਗਏ ਸਨ। ਇਸ ਜੰਗੀ ਕਾਰਵਾਈ ਦੌਰਾਨ ਸਹਿਯੋਗੀਆਂ ਦੇ ਵੱਖੋ-ਵੱਖਰੇ ਸਟੈਂਡ ਕਾਰਨ ਅਮਰੀਕਾ ਦੇ ਆਪਣੇ ਪੁਰਾਣੇ ਸਹਿਯੋਗੀਆਂ ਨਾਲ 'ਵਿਸ਼ੇਸ਼ ਸਬੰਧਾਂ' ਵਿੱਚ ਤਣਾਅ ਪੈਦਾ ਹੋ ਗਿਆ ਹੈ। ਈਰਾਨ ਵੱਲੋਂ ਵੀ ਖੇਤਰ ਵਿੱਚ ਅਮਰੀਕੀ ਟਿਕਾਣਿਆਂ ਅਤੇ ਸਹਿਯੋਗੀ ਦੇਸ਼ਾਂ 'ਤੇ ਲਗਾਤਾਰ ਮਿਜ਼ਾਈਲ ਅਤੇ ਡਰੋਨ ਹਮਲੇ ਕੀਤੇ ਜਾ ਰਹੇ ਹਨ।
