ਗੈਜੇਟ ਡੈਸਕ - ਦੁਨੀਆ ਦੇ ਸਭ ਤੋਂ ਮਸ਼ਹੂਰ ਮੈਸੇਜਿੰਗ ਪਲੇਟਫਾਰਮ WhatsApp ਨੇ ਭਾਰਤ 'ਚ 'SIM binding' ਫੀਚਰ ਦੀ ਟੈਸਟਿੰਗ ਸ਼ੁਰੂ ਕਰ ਦਿੱਤੀ ਹੈ। ਹਾਲਾਂਕਿ ਭਾਰਤ ਸਰਕਾਰ ਨੇ ਇਸ ਨਿਯਮ ਨੂੰ ਲਾਗੂ ਕਰਨ ਦੀ ਸਮਾਂ ਸੀਮਾ ਵਧਾ ਕੇ ਇਸ ਸਾਲ ਦੇ ਅੰਤ ਤੱਕ ਕਰ ਦਿੱਤੀ ਹੈ, ਪਰ ਵਟਸਐਪ ਨੇ ਕਈ ਭਾਰਤੀ ਯੂਜ਼ਰਸ ਨੂੰ ਇਨ-ਐਪ ਨੋਟੀਫਿਕੇਸ਼ਨ ਭੇਜਣੇ ਸ਼ੁਰੂ ਕਰ ਦਿੱਤੇ ਹਨ। ਇਨ੍ਹਾਂ ਨੋਟੀਫਿਕੇਸ਼ਨਾਂ ਰਾਹੀਂ ਯੂਜ਼ਰਸ ਨੂੰ ਦੱਸਿਆ ਜਾ ਰਿਹਾ ਹੈ ਕਿ ਸਥਾਨਕ ਨਿਯਮਾਂ ਕਾਰਨ ਹੁਣ ਡਿਵਾਈਸ 'ਚ ਸਿਮ ਕਾਰਡ ਦੀ ਮੌਜੂਦਗੀ ਦੀ ਪੁਸ਼ਟੀ ਕਰਨੀ ਲਾਜ਼ਮੀ ਹੋਵੇਗੀ।

ਕੀ ਹੈ ਸਿਮ ਬਾਈਡਿੰਗ?

SIM binding ਦਾ ਸੌਖਾ ਅਰਥ ਇਹ ਹੈ ਕਿ WhatsApp ਅਕਾਊਂਟ ਹੁਣ ਸਿਰਫ਼ ਉਸੇ ਡਿਵਾਈਸ 'ਤੇ ਕੰਮ ਕਰੇਗਾ ਜਿਸ 'ਚ ਉਹ ਰਜਿਸਟਰਡ ਸਿਮ ਕਾਰਡ ਮੌਜੂਦ ਹੋਵੇਗਾ। ਜੇਕਰ ਤੁਸੀਂ ਡਿਵਾਈਸ 'ਚੋਂ ਸਿਮ ਕੱਢ ਦਿੰਦੇ ਹੋ, ਸਿਮ ਬੰਦ ਹੋ ਜਾਂਦੀ ਹੈ ਜਾਂ ਕੋਈ ਦੂਜੀ ਸਿਮ ਪਾ ਲੈਂਦੇ ਹੋ, ਤਾਂ ਵਟਸਐਪ ਤੁਹਾਨੂੰ ਆਪਣੇ ਆਪ ਲਾਗਆਊਟ ਕਰ ਦੇਵੇਗਾ। ਨਵੇਂ ਫੀਚਰ ਦੇ ਤਹਿਤ ਵਟਸਐਪ ਹਰ ਕੁਝ ਘੰਟਿਆਂ ਬਾਅਦ ਇਹ ਚੈੱਕ ਕਰੇਗਾ ਕਿ ਅਕਾਊਂਟ ਉਸੇ ਸਿਮ ਵਾਲੇ ਫੋਨ 'ਤੇ ਚੱਲ ਰਿਹਾ ਹੈ ਜਾਂ ਨਹੀਂ। ਇਸ ਕਦਮ ਦਾ ਮੁੱਖ ਉਦੇਸ਼ ਅਣਅਧਿਕਾਰਤ ਪਹੁੰਚ ਅਤੇ ਸਾਈਬਰ ਧੋਖਾਧੜੀ ਨੂੰ ਰੋਕਣਾ ਹੈ।

ਸਰਕਾਰ ਨੇ 31 ਦਸੰਬਰ ਤੱਕ ਵਧਾਈ ਡੈੱਡਲਾਈਨ

ਭਾਰਤ ਸਰਕਾਰ ਨੇ ਪਿਛਲੇ ਸਾਲ ਨਵੰਬਰ 'ਚ ਮੈਸੇਜਿੰਗ ਐਪਸ ਲਈ ਸਿਮ ਬਾਈਡਿੰਗ ਨਿਯਮਾਂ ਦਾ ਪਾਲਣ ਕਰਨਾ ਲਾਜ਼ਮੀ ਕਰਨ ਦੇ ਹੁਕਮ ਦਿੱਤੇ ਸਨ। ਪਹਿਲਾਂ ਇਸ ਲਈ 90 ਦਿਨਾਂ ਦਾ ਸਮਾਂ ਦਿੱਤਾ ਗਿਆ ਸੀ, ਪਰ ਐਪਲ ਅਤੇ ਗੂਗਲ ਵਰਗੀਆਂ ਵੱਡੀਆਂ ਕੰਪਨੀਆਂ ਨੇ ਕੁਝ ਤਕਨੀਕੀ ਮੁਸ਼ਕਲਾਂ ਦਾ ਹਵਾਲਾ ਦਿੰਦੇ ਹੋਏ ਸਮਾਂ ਵਧਾਉਣ ਦੀ ਮੰਗ ਕੀਤੀ ਸੀ। ਜਿਸ ਤੋਂ ਬਾਅਦ ਸਰਕਾਰ ਨੇ ਹੁਣ ਇਸ ਦੀ ਡੈੱਡਲਾਈਨ 31 ਦਸੰਬਰ, 2026 ਤੱਕ ਵਧਾ ਦਿੱਤੀ ਹੈ।

ਯੂਜ਼ਰਸ 'ਤੇ ਕੀ ਹੋਵੇਗਾ ਅਸਰ?

ਤੁਰੰਤ ਕੋਈ ਬਦਲਾਅ ਨਹੀਂ
- ਫਿਲਹਾਲ ਇਹ ਫੀਚਰ ਟੈਸਟਿੰਗ ਦੇ ਪੜਾਅ 'ਚ ਹੈ, ਇਸ ਲਈ ਆਮ ਯੂਜ਼ਰਸ ਪਹਿਲਾਂ ਵਾਂਗ ਹੀ ਐਪ ਦੀ ਵਰਤੋਂ ਕਰ ਸਕਦੇ ਹਨ।

ਰੋਲ ਆਊਟ ਹੋਣ ਤੋਂ ਬਾਅਦ ਮੁਸ਼ਕਲ
- ਇਕ ਵਾਰ ਜਦੋਂ ਇਹ ਫੀਚਰ ਪੂਰੀ ਤਰ੍ਹਾਂ ਲਾਗੂ ਹੋ ਗਿਆ, ਤਾਂ ਉਨ੍ਹਾਂ ਲੋਕਾਂ ਨੂੰ ਮੁਸ਼ਕਲ ਆ ਸਕਦੀ ਹੈ ਜੋ ਅਕਸਰ ਸਿਮ ਬਦਲਦੇ ਰਹਿੰਦੇ ਹਨ ਜਾਂ ਦੂਜੇ ਡਿਵਾਈਸਾਂ 'ਤੇ ਵਟਸਐਪ ਚਲਾਉਂਦੇ ਹਨ।

ਵਟਸਐਪ ਦਾ ਇਹ ਨਵਾਂ ਕਦਮ ਭਾਰਤੀ ਡਿਜੀਟਲ ਸੁਰੱਖਿਆ ਨਿਯਮਾਂ ਦੇ ਤਹਿਤ ਚੁੱਕਿਆ ਗਿਆ ਹੈ ਤਾਂ ਜੋ ਯੂਜ਼ਰਸ ਦੀ ਪ੍ਰਾਈਵੇਸੀ ਅਤੇ ਸੁਰੱਖਿਆ ਨੂੰ ਹੋਰ ਮਜ਼ਬੂਤ ਕੀਤਾ ਜਾ ਸਕੇ।