ਹੁਣ ਰੇਂਜ ਦੀ ਚਿੰਤਾ ਖ਼ਤਮ: 10 ਮਿੰਟ ਦੀ ਚਾਰਜਿੰਗ ''ਚ 300 ਕਿਲੋਮੀਟਰ ਚੱਲੇਗੀ ਇਹ ਇਲੈਕਟ੍ਰਿਕ ਬਾਈਕ

ਆਟੋ ਡੈਸਕ- ਇਲੈਕਟ੍ਰਿਕ ਵਾਹਨਾਂ ਦੇ ਖੇਤਰ ਵਿੱਚ ਇੱਕ ਵੱਡੀ ਕ੍ਰਾਂਤੀ ਆਉਣ ਵਾਲੀ ਹੈ। ਫਿਨਲੈਂਡ ਦੀ ਮਸ਼ਹੂਰ ਇਲੈਕਟ੍ਰਿਕ ਬਾਈਕ ਨਿਰਮਾਤਾ ਕੰਪਨੀ Verge Motorcycles ਨੇ ਦੁਨੀਆ ਦੀ ਪਹਿਲੀ ਅਜਿਹੀ ਪ੍ਰੋਡਕਸ਼ਨ ਇਲੈਕਟ੍ਰਿਕ ਬਾਈਕ ਪੇਸ਼ ਕਰਨ ਦੀ ਤਿਆਰੀ ਕਰ ਲਈ ਹੈ, ਜੋ ਰੇਂਜ ਅਤੇ ਚਾਰਜਿੰਗ ਦੇ ਸਾਰੇ ਪੁਰਾਣੇ ਰਿਕਾਰਡ ਤੋੜ ਦੇਵੇਗੀ। ਇਸ ਬਾਈਕ ਦੀ ਸਭ ਤੋਂ ਵੱਡੀ ਖਾਸੀਅਤ ਇਸ ਦੀ ਬੈਟਰੀ ਤਕਨੀਕ ਅਤੇ ਚਾਰਜਿੰਗ ਸਪੀਡ ਹੈ।

ਸਾਲਿਡ-ਸਟੇਟ ਬੈਟਰੀ 

ਜਾਣਕਾਰੀ ਅਨੁਸਾਰ, ਇਸ ਬਾਈਕ ਵਿੱਚ ਆਮ ਲਿਥੀਅਮ-ਆਇਨ ਬੈਟਰੀ ਦੀ ਬਜਾਏ ਸਾਲਿਡ-ਸਟੇਟ ਬੈਟਰੀ ਤਕਨੀਕ ਦੀ ਵਰਤੋਂ ਕੀਤੀ ਗਈ ਹੈ। ਇਸ ਬੈਟਰੀ ਸਿਸਟਮ ਨੂੰ Verge ਨੇ ਟੈਕਨਾਲੋਜੀ ਕੰਪਨੀ Donut Lab ਦੇ ਨਾਲ ਮਿਲ ਕੇ ਤਿਆਰ ਕੀਤਾ ਹੈ। ਸਾਲਿਡ-ਸਟੇਟ ਬੈਟਰੀ ਵਿੱਚ ਲਿਕਵਿਡ ਜਾਂ ਜੈੱਲ ਇਲੈਕਟ੍ਰੋਲਾਈਟ ਦੀ ਥਾਂ 'ਤੇ ਠੋਸ ਪਦਾਰਥ ਦੀ ਵਰਤੋਂ ਹੁੰਦੀ ਹੈ, ਜੋ ਇਸਨੂੰ ਪਹਿਲਾਂ ਨਾਲੋਂ ਕਿਤੇ ਵੱਧ ਸੁਰੱਖਿਅਤ ਅਤੇ ਪ੍ਰਭਾਵਸ਼ਾਲੀ ਬਣਾਉਂਦੀ ਹੈ।

ਬਾਕਮਾਲ ਰੇਂਜ ਅਤੇ ਸੁਪਰਫਾਸਟ ਚਾਰਜਿੰਗ 

ਇਸ ਬਾਈਕ 'ਚ ਹੈਰਾਨ ਕਰ ਦੇਣ ਵਾਲੇ ਫੀਚਰਜ਼ ਦਿੱਤੇ ਗਏ ਹਨ:

600 ਕਿਲੋਮੀਟਰ ਦੀ ਰੇਂਜ: ਕੰਪਨੀ ਮੁਤਾਬਕ ਖਰੀਦਦਾਰਾਂ ਨੂੰ ਐਕਸਟੈਂਡਡ ਰੇਂਜ ਬੈਟਰੀ ਦਾ ਵਿਕਲਪ ਮਿਲੇਗਾ, ਜਿਸ ਨਾਲ ਇਹ ਬਾਈਕ ਇੱਕ ਵਾਰ ਚਾਰਜ ਕਰਨ 'ਤੇ 370 ਮੀਲ (ਲਗਭਗ 600 ਕਿਲੋਮੀਟਰ) ਤੱਕ ਚੱਲ ਸਕੇਗੀ।

ਸਿਰਫ਼ 10 ਮਿੰਟ ਦੀ ਚਾਰਜਿੰਗ 'ਚ ਚੱਲੇਗੀ 300 ਕਿਲੋਮੀਟਰ: ਇਹ ਬੈਟਰੀ ਇੰਨੀ ਤੇਜ਼ ਚਾਰਜ ਹੁੰਦੀ ਹੈ ਕਿ ਸਿਰਫ਼ 10 ਮਿੰਟਾਂ ਦੀ ਚਾਰਜਿੰਗ ਨਾਲ ਇਹ ਲਗਭਗ 300 ਕਿਲੋਮੀਟਰ (186 ਮੀਲ) ਦੀ ਰੇਂਜ ਪ੍ਰਦਾਨ ਕਰ ਸਕਦੀ ਹੈ।

ਰਫਤਾਰ: ਇਹ ਬਾਈਕ ਮਹਿਜ਼ 3.5 ਸੈਕਿੰਡ ਵਿੱਚ 0 ਤੋਂ 100 ਕਿਲੋਮੀਟਰ/ਘੰਟਾ ਦੀ ਰਫ਼ਤਾਰ ਫੜ ਲੈਂਦੀ ਹੈ।

ਸੁਰੱਖਿਆ 'ਤੇ ਜ਼ੋਰ 

ਕੰਪਨੀ ਦਾ ਦਾਅਵਾ ਹੈ ਕਿ ਇਹ ਸਾਲਿਡ-ਸਟੇਟ ਬੈਟਰੀ ਬਾਈਕ ਦੀ ਪੂਰੀ ਉਮਰ ਤੱਕ ਚੱਲੇਗੀ, ਜਦੋਂ ਕਿ ਆਮ ਬੈਟਰੀਆਂ ਸਮੇਂ ਦੇ ਨਾਲ ਕਮਜ਼ੋਰ ਹੋ ਜਾਂਦੀਆਂ ਹਨ। ਸੁਰੱਖਿਆ ਦੇ ਲਿਹਾਜ਼ ਨਾਲ ਵੀ ਇਹ ਬਿਹਤਰ ਹੈ ਕਿਉਂਕਿ ਇਸ ਵਿੱਚ ਅੱਗ ਲੱਗਣ ਦਾ ਖ਼ਤਰਾ ਬਹੁਤ ਘੱਟ ਹੁੰਦਾ ਹੈ ਅਤੇ ਇਹ ਵੱਖ-ਵੱਖ ਤਾਪਮਾਨਾਂ ਵਿੱਚ ਵੀ ਸਹੀ ਤਰੀਕੇ ਨਾਲ ਕੰਮ ਕਰਦੀ ਹੈ। ਇਸ ਤੋਂ ਇਲਾਵਾ, ਇਸ ਵਿੱਚ ਵਰਤੇ ਜਾਣ ਵਾਲੇ ਮਟੀਰੀਅਲ ਦੁਨੀਆ ਭਰ ਵਿੱਚ ਆਸਾਨੀ ਨਾਲ ਉਪਲਬਧ ਹਨ।

ਕਦੋਂ ਹੋਵੇਗੀ ਡਿਲੀਵਰੀ? 

Verge Motorcycles ਆਉਣ ਵਾਲੇ ਕੁਝ ਮਹੀਨਿਆਂ ਵਿੱਚ ਗਾਹਕਾਂ ਨੂੰ ਇਸ ਬਾਈਕ ਦੀ ਡਿਲੀਵਰੀ ਸ਼ੁਰੂ ਕਰਨ ਵਾਲੀ ਹੈ। ਜਿੱਥੇ ਕਈ ਵੱਡੀਆਂ ਕਾਰ ਕੰਪਨੀਆਂ ਅਜੇ ਇਸ ਤਕਨੀਕ ਦਾ ਟੈਸਟ ਕਰ ਰਹੀਆਂ ਹਨ, ਉੱਥੇ Verge ਨੇ ਇਸਨੂੰ ਅਸਲੀਅਤ ਵਿੱਚ ਬਦਲ ਕੇ ਸਭ ਨੂੰ ਪਿੱਛੇ ਛੱਡ ਦਿੱਤਾ ਹੈ।