ਗੈਜੇਟ ਡੈਸਕ - ਜੇਕਰ ਤੁਸੀਂ ਵੀ ਆਪਣੇ ਫ਼ੋਨ 'ਚ ਬਿਨਾਂ ਸਿਮ ਕਾਰਡ ਪਾਏ WhatsApp, Telegram ਜਾਂ Signal ਵਰਗੀਆਂ ਮੈਸੇਜਿੰਗ ਐਪਸ ਚਲਾ ਰਹੇ ਹੋ, ਤਾਂ ਇਹ ਖ਼ਬਰ ਤੁਹਾਡੇ ਲਈ ਬਹੁਤ ਮਹੱਤਵਪੂਰਨ ਹੈ। ਭਾਰਤ ਸਰਕਾਰ ਦੇ ਦੂਰਸੰਚਾਰ ਵਿਭਾਗ (DoT) ਦੇ ਹੁਕਮਾਂ ਅਨੁਸਾਰ, 1 ਮਾਰਚ ਤੋਂ 'ਸਿਮ ਬਾਈਂਡਿੰਗ'  ਨਿਯਮ ਲਾਗੂ ਹੋਣ ਜਾ ਰਿਹਾ ਹੈ, ਜਿਸ ਤੋਂ ਬਾਅਦ ਬਿਨਾਂ ਸਿਮ ਕਾਰਡ ਦੇ ਇਹ ਐਪਸ ਕੰਮ ਨਹੀਂ ਕਰਨਗੀਆਂ।

ਕੀ ਹੈ ਸਿਮ ਬਾਈਂਡਿੰਗ?

ਸਿਮ ਬਾਈਂਡਿੰਗ ਦਾ ਮਤਲਬ ਹੈ ਕਿ ਜਿਸ ਨੰਬਰ 'ਤੇ ਤੁਹਾਡਾ WhatsApp ਅਕਾਊਂਟ ਬਣਿਆ ਹੋਇਆ ਹੈ, ਉਹ ਸਿਮ ਕਾਰਡ ਤੁਹਾਡੇ ਉਸੇ ਫ਼ੋਨ ਵਿੱਚ ਹੋਣਾ ਲਾਜ਼ਮੀ ਹੈ ਜਿਸ 'ਤੇ ਤੁਸੀਂ ਐਪ ਚਲਾ ਰਹੇ ਹੋ। ਸਰੋਤਾਂ ਅਨੁਸਾਰ, ਜੇਕਰ ਤੁਸੀਂ ਫ਼ੋਨ 'ਚੋਂ ਸਿਮ ਕਾਰਡ ਕੱਢ ਦਿੰਦੇ ਹੋ, ਤਾਂ ਤੁਹਾਡਾ WhatsApp ਅਕਾਊਂਟ ਆਪਣੇ ਆਪ ਲੌਗ-ਆਊਟ ਹੋ ਜਾਵੇਗਾ।

WhatsApp ਨੇ ਸ਼ੁਰੂ ਕੀਤੀ ਤਿਆਰੀ

ਰਿਪੋਰਟਾਂ ਮੁਤਾਬਕ WhatsApp ਨੇ ਇਸ ਨਵੇਂ ਫੀਚਰ 'ਤੇ ਕੰਮ ਸ਼ੁਰੂ ਕਰ ਦਿੱਤਾ ਹੈ। WhatsApp ਦੇ ਬੀਟਾ ਵਰਜ਼ਨ 2.26.8.6 'ਤੇ ਇਕ ਨਵਾਂ ਪੌਪ-ਅੱਪ ਦੇਖਿਆ ਗਿਆ ਹੈ, ਜਿਸ 'ਚ ਭਾਰਤ ਸਰਕਾਰ ਦੇ ਹੁਕਮਾਂ ਦਾ ਹਵਾਲਾ ਦਿੰਦੇ ਹੋਏ ਯੂਜ਼ਰਸ ਨੂੰ ਅਕਾਊਂਟ ਐਕਸੈਸ ਕਰਨ ਲਈ ਸਬੰਧਿਤ ਸਿਮ ਕਾਰਡ ਲਗਾਉਣ ਲਈ ਕਿਹਾ ਜਾ ਰਿਹਾ ਹੈ।

ਕੰਪਿਊਟਰ ਯੂਜ਼ਰਸ ਲਈ ਵੀ ਬਦਲਣਗੇ ਨਿਯਮ

ਨਵੇਂ ਨਿਯਮਾਂ ਮੁਤਾਬਕ, ਜਿਹੜੇ ਲੋਕ ਕੰਪਿਊਟਰ ਜਾਂ ਲੈਪਟਾਪ 'ਤੇ WhatsApp (Linked Devices) ਦੀ ਵਰਤੋਂ ਕਰਦੇ ਹਨ, ਉਨ੍ਹਾਂ ਦਾ ਸੈਸ਼ਨ ਹਰ 6 ਘੰਟੇ ਬਾਅਦ ਆਪਣੇ ਆਪ ਲੌਗ-ਆਊਟ ਹੋ ਜਾਵੇਗਾ। ਇਸ ਤੋਂ ਬਾਅਦ ਕੰਪਿਊਟਰ 'ਤੇ WhatsApp ਚਲਾਉਣ ਲਈ ਯੂਜ਼ਰਸ ਨੂੰ ਦੁਬਾਰਾ ਆਪਣੇ ਮੁੱਖ ਐਪ ਰਾਹੀਂ ਲਿੰਕ ਕਰਨਾ ਪਵੇਗਾ।

ਕਿਉਂ ਲਿਆ ਗਿਆ ਇਹ ਫੈਸਲਾ?

ਸਰਕਾਰ ਵੱਲੋਂ ਇਹ ਸਖ਼ਤ ਕਦਮ ਸਾਈਬਰ ਠੱਗੀ ਅਤੇ ਫਰੌਡ ਨੂੰ ਰੋਕਣ ਲਈ ਚੁੱਕਿਆ ਗਿਆ ਹੈ। ਮੌਜੂਦਾ ਸਮੇਂ 'ਚ ਬਹੁਤ ਸਾਰੇ ਲੋਕ ਬਿਨਾਂ ਸਿਮ ਕਾਰਡ ਦੇ ਵੀ ਦੂਜੇ ਨੰਬਰਾਂ ਦੇ ਅਕਾਊਂਟ ਚਲਾਉਂਦੇ ਹਨ, ਜੋ ਕਿ ਸੁਰੱਖਿਆ ਦੇ ਲਿਹਾਜ਼ ਨਾਲ ਖਤਰਨਾਕ ਹੋ ਸਕਦਾ ਹੈ। ਹਾਲਾਂਕਿ ਇਸ ਨਾਲ ਆਮ ਯੂਜ਼ਰਸ ਨੂੰ ਕੁਝ ਅਸੁਵਿਧਾ ਹੋ ਸਕਦੀ ਹੈ, ਪਰ ਸਾਈਬਰ ਸੁਰੱਖਿਆ ਨੂੰ ਮਜ਼ਬੂਤ ਕਰਨ ਲਈ ਇਹ ਜ਼ਰੂਰੀ ਮੰਨਿਆ ਜਾ ਰਿਹਾ ਹੈ।