Apple Pay ਭਾਰਤ 'ਚ ਜਲਦ ਹੋ ਸਕਦਾ ਹੈ ਲਾਂਚ,  ਜਾਣੋ ਕਦੋਂ ਸ਼ੁਰੂ ਹੋਵੇਗੀ ਸਰਵਿਸ

ਗੈਜੇਟ ਡੈਸਕ - iPhone ਬਣਾਉਣ ਵਾਲੀ ਵਿਸ਼ਵ ਪ੍ਰਸਿੱਧ ਕੰਪਨੀ ਐਪਲ ਹੁਣ ਭਾਰਤ ਦੇ ਤੇਜ਼ੀ ਨਾਲ ਵਧ ਰਹੇ ਡਿਜੀਟਲ ਪੇਮੈਂਟ ਬਾਜ਼ਾਰ 'ਚ ਧਮਾਕੇਦਾਰ ਐਂਟਰੀ ਕਰਨ ਦੀ ਤਿਆਰੀ ਕਰ ਰਹੀ ਹੈ। ਮੀਡੀਆ ਰਿਪੋਰਟਾਂ ਅਨੁਸਾਰ, ਕੰਪਨੀ ਭਾਰਤ ਵਿੱਚ ਆਪਣੀ 'ਐਪਲ ਪੇਅ' ਸੇਵਾ ਸ਼ੁਰੂ ਕਰਨ ਲਈ ਭਾਰਤੀ ਬੈਂਕਾਂ ਅਤੇ ਗਲੋਬਲ ਕਾਰਡ ਨੈੱਟਵਰਕਾਂ ਨਾਲ ਗੱਲਬਾਤ ਕਰ ਰਹੀ ਹੈ।

2026 ਦੇ ਮੱਧ ਤੱਕ ਸ਼ੁਰੂ ਹੋ ਸਕਦੀ ਹੈ ਸੇਵਾ
ਸੂਤਰਾਂ ਮੁਤਾਬਕ, ਐਪਲ ਪੇਅ ਸੇਵਾ ਨੂੰ 2026 ਦੇ ਅੱਧ ਤੱਕ ਭਾਰਤ 'ਚ ਲਾਂਚ ਕੀਤਾ ਜਾ ਸਕਦਾ ਹੈ। ਹਾਲਾਂਕਿ ਕੰਪਨੀ ਵੱਲੋਂ ਅਜੇ ਤੱਕ ਕੋਈ ਅਧਿਕਾਰਤ ਤਾਰੀਖ ਸਾਂਝੀ ਨਹੀਂ ਕੀਤੀ ਗਈ ਹੈ, ਪਰ ਬੈਂਕਾਂ ਨਾਲ ਚੱਲ ਰਹੀ ਪ੍ਰਾਈਵੇਟ ਗੱਲਬਾਤ ਇਸ ਦੇ ਜਲਦ ਲਾਂਚ ਹੋਣ ਦਾ ਸੰਕੇਤ ਦੇ ਰਹੀ ਹੈ।

ਇਨ੍ਹਾਂ ਦਿੱਗਜ ਬੈਂਕਾਂ ਨਾਲ ਚੱਲ ਰਹੀ ਹੈ ਚਰਚਾ
ਐਪਲ ਆਪਣੀ ਪੇਮੈਂਟ ਸੇਵਾ ਲਈ ਭਾਰਤ ਦੇ ਪ੍ਰਮੁੱਖ ਨਿੱਜੀ ਬੈਂਕਾਂ ਜਿਵੇਂ ਕਿ ICICI ਬੈਂਕ, HDFC ਬੈਂਕ ਅਤੇ ਐਕਸਿਸ (Axis) ਬੈਂਕ ਨਾਲ ਸੰਪਰਕ ਵਿੱਚ ਹੈ। ਇਸ ਤੋਂ ਇਲਾਵਾ, ਭੁਗਤਾਨ ਨੈੱਟਵਰਕ ਲਈ ਕੰਪਨੀ ਮਾਸਟਰਕਾਰਡ ਅਤੇ ਵੀਜ਼ਾ ਵਰਗੇ ਗਲੋਬਲ ਨੈੱਟਵਰਕਾਂ ਨਾਲ ਵੀ ਗੱਲਬਾਤ ਕਰ ਰਹੀ ਹੈ।

UPI ਅਤੇ ਕਾਰਡ ਪੇਮੈਂਟ ਦੋਵਾਂ ਦੀ ਮਿਲੇਗੀ ਸਹੂਲਤ
ਭਾਰਤ ਵਿੱਚ ਐਪਲ ਪੇਅ ਤੋਂ ਉਮੀਦ ਕੀਤੀ ਜਾ ਰਹੀ ਹੈ ਕਿ ਇਹ ਕਾਰਡ-ਆਧਾਰਿਤ ਭੁਗਤਾਨ ਦੇ ਨਾਲ-ਨਾਲ ਭਾਰਤ ਦੇ ਸਰਕਾਰੀ UPI ਨੂੰ ਵੀ ਸਪੋਰਟ ਕਰੇਗਾ। UPI ਭਾਰਤੀ ਗਾਹਕਾਂ ਵਿੱਚ ਬਹੁਤ ਪ੍ਰਸਿੱਧ ਹੈ ਅਤੇ ਇਸ ਰਾਹੀਂ ਤੁਰੰਤ ਪੈਸੇ ਟ੍ਰਾਂਸਫਰ ਅਤੇ ਬਿੱਲਾਂ ਦਾ ਭੁਗਤਾਨ ਕਰਨਾ ਸੰਭਵ ਹੋਵੇਗਾ।

ਗੂਗਲ ਪੇਅ ਅਤੇ ਫੋਨਪੇਅ ਨੂੰ ਮਿਲੇਗੀ ਸਖ਼ਤ ਟੱਕਰ
ਭਾਰਤ ਦੇ ਡਿਜੀਟਲ ਪੇਮੈਂਟ ਬਾਜ਼ਾਰ ਵਿੱਚ ਪਹਿਲਾਂ ਹੀ ਗੂਗਲ ਪੇਅ (Google Pay), ਫੋਨਪੇਅ (PhonePe) ਅਤੇ ਅਮੇਜ਼ਨ ਪੇਅ ਵਰਗੀਆਂ ਕੰਪਨੀਆਂ ਦਾ ਕਬਜ਼ਾ ਹੈ। ਐਪਲ ਦੇ ਆਉਣ ਨਾਲ ਇਨ੍ਹਾਂ ਸਾਰੀਆਂ ਕੰਪਨੀਆਂ ਨੂੰ ਕਾਟੇ ਦੀ ਟੱਕਰ ਮਿਲ ਸਕਦੀ ਹੈ। ਇਹ ਖਾਸ ਫੀਚਰ ਐਪਲ ਦੇ ਵੱਖ-ਵੱਖ ਡਿਵਾਈਸਾਂ ਜਿਵੇਂ ਕਿ ਐਪਲ ਵਾਚ, ਆਈਫੋਨ, ਆਈਪੈਡ ਅਤੇ ਮੈਕਬੁੱਕ ਵਿੱਚ ਉਪਲਬਧ ਕਰਵਾਇਆ ਜਾ ਸਕਦਾ ਹੈ।