ਗੈਜੇਟ ਡੈਸਕ - ਸਰਕਾਰੀ ਟੈਲੀਕਾਮ ਕੰਪਨੀ BSNL ਨੇ ਆਪਣੇ ਗਾਹਕਾਂ ਲਈ ਇੱਕ ਵਾਰ ਫਿਰ ਆਪਣਾ ਪ੍ਰਸਿੱਧ 'ਫ੍ਰੀਡਮ ਆਫਰ' ਵਾਪਸ ਲਿਆਂਦਾ ਹੈ। ਸਰੋਤਾਂ ਅਨੁਸਾਰ, ਇਸ ਪਲਾਨ ਦੀ ਕੀਮਤ ਪਹਿਲਾਂ ਸਿਰਫ਼ 1 ਰੁਪਏ ਸੀ, ਪਰ ਹੁਣ ਕੰਪਨੀ ਨੇ ਇਸ ਨੂੰ ਨਵੀਂ ਕੀਮਤ 51 ਰੁਪਏ 'ਚ ਪੇਸ਼ ਕੀਤਾ ਹੈ।

ਪਲਾਨ ਦੇ ਮੁੱਖ ਫਾਇਦੇ :-

ਡਾਟਾ
- ਇਸ ਪਲਾਨ 'ਚ ਗਾਹਕਾਂ ਨੂੰ ਰੋਜ਼ਾਨਾ 2GB 4G ਡਾਟਾ ਮਿਲੇਗਾ, ਜਿਸਦਾ ਮਤਲਬ ਹੈ ਕਿ 30 ਦਿਨਾਂ ਦੀ ਵੈਧਤਾ ਦੌਰਾਨ ਕੁੱਲ 60GB ਡਾਟਾ ਦਿੱਤਾ ਜਾਵੇਗਾ। ਜੇਕਰ ਰੋਜ਼ਾਨਾ ਦੀ 2GB ਦੀ ਸੀਮਾ ਖਤਮ ਹੋ ਜਾਂਦੀ ਹੈ, ਤਾਂ ਇੰਟਰਨੈੱਟ ਦੀ ਸਪੀਡ ਘਟ ਕੇ 40kbps ਰਹਿ ਜਾਵੇਗੀ।

ਕਾਲਿੰਗ ਅਤੇ SMS
- ਪਲਾਨ ਦੇ ਤਹਿਤ ਕਿਸੇ ਵੀ ਨੈੱਟਵਰਕ 'ਤੇ ਅਨਲਿਮਟਿਡ ਫ੍ਰੀ ਕਾਲਾਂ ਦੀ ਸਹੂਲਤ ਮਿਲੇਗੀ। ਇਸ ਤੋਂ ਇਲਾਵਾ, ਹਰ ਰੋਜ਼ 100 SMS ਮੁਫ਼ਤ ਮਿਲਣਗੇ, ਯਾਨੀ ਪੂਰੇ ਮਹੀਨੇ 'ਚ ਕੁੱਲ 3000 SMS ਦਿੱਤੇ ਜਾਣਗੇ।

ਰੋਜ਼ਾਨਾ ਖਰਚਾ
- ਵੈਲੀਡਿਟੀ ਅਤੇ ਕੀਮਤ ਦੇ ਹਿਸਾਬ ਨਾਲ ਇਸ ਪਲਾਨ ਦਾ ਰੋਜ਼ਾਨਾ ਦਾ ਖਰਚਾ ਲਗਭਗ 1.70 ਰੁਪਏ ਆਉਂਦਾ ਹੈ।

ਸਿਰਫ਼ ਨਵੇਂ ਯੂਜ਼ਰਸ ਲਈ ਖ਼ਾਸ ਤੋਹਫ਼ਾ :-
ਧਿਆਨ ਦੇਣ ਯੋਗ ਹੈ ਕਿ ਇਹ ਆਫਰ ਸਿਰਫ਼ ਨਵੇਂ ਗਾਹਕਾਂ ਲਈ ਉਪਲਬਧ ਹੈ; ਮੌਜੂਦਾ ਗਾਹਕ ਇਸ ਦਾ ਲਾਭ ਨਹੀਂ ਲੈ ਸਕਦੇ। ਕੰਪਨੀ ਇਸ ਪਲਾਨ ਦੇ ਨਾਲ ਮੁਫ਼ਤ 4G ਸਿਮ ਵੀ ਮੁਹੱਈਆ ਕਰਵਾ ਰਹੀ ਹੈ।

ਆਖਰੀ ਤਾਰੀਖ ਅਤੇ ਕਿਵੇਂ ਪ੍ਰਾਪਤ ਕਰੀਏ :-
ਕੰਪਨੀ ਵੱਲੋਂ ਇਹ ਆਫਰ 22 ਮਈ ਤੋਂ 30 ਜੂਨ ਤੱਕ ਜਾਰੀ ਰੱਖਿਆ ਗਿਆ ਹੈ। ਜੇਕਰ ਤੁਸੀਂ ਇਸ ਦਾ ਲਾਭ ਲੈਣਾ ਚਾਹੁੰਦੇ ਹੋ, ਤਾਂ ਆਪਣੇ ਨੇੜਲੇ ਬੀ.ਐੱਸ.ਐੱਨ.ਐੱਲ. ਰਿਟੇਲਰ ਜਾਂ ਕਾਮਨ ਸਰਵਿਸਿਜ਼ ਸੈਂਟਰ (CSC) 'ਤੇ ਜਾ ਸਕਦੇ ਹੋ। ਇਸ ਤੋਂ ਇਲਾਵਾ, ਬੀ.ਐੱਸ.ਐੱਨ.ਐੱਲ. ਦੀ ਵੈੱਬਸਾਈਟ ਜਾਂ ਸੈਲਫਕੇਅਰ ਐਪ ਰਾਹੀਂ ਵੀ ਜਾਣਕਾਰੀ ਲਈ ਜਾ ਸਕਦੀ ਹੈ।