"ਕਿਸ ਕਿਸਕੋ ਪਿਆਰ ਕਰੂੰ 2" ਦੇ ਗਾਣੇ "ਰਾਂਝੇ ਨੂ ਹੀਰ" ਦਾ ਅਨਪਲੱਗਡ ਵਰਜ਼ਨ ਰਿਲੀਜ਼

ਮੁੰਬਈ (ਏਜੰਸੀ) - ਮਸ਼ਹੂਰ ਕਾਮੇਡੀਅਨ ਅਤੇ ਅਦਾਕਾਰ ਕਪਿਲ ਸ਼ਰਮਾ ਦੇ ਪ੍ਰਸ਼ੰਸਕਾਂ ਲਈ ਇੱਕ ਵੱਡੀ ਖੁਸ਼ਖਬਰੀ ਹੈ। ਫਿਲਮ 'ਕਿਸ ਕਿਸਕੋ ਪਿਆਰ ਕਰੂੰ 2' ਦੇ ਨਿਰਮਾਤਾਵਾਂ ਨੇ ਐਲਬਮ ਦਾ ਪੰਜਵਾਂ ਅਤੇ ਆਖਰੀ ਗਾਣਾ 'ਰਾਂਝੇ ਨੂ ਹੀਰ' ਦਾ ਅਨਪਲੱਗਡ ਵਰਜ਼ਨ ਰਿਲੀਜ਼ ਕਰ ਦਿੱਤਾ ਹੈ। ਇਸ ਗਾਣੇ ਦੀ ਖਾਸ ਗੱਲ ਇਹ ਹੈ ਕਿ ਇਸ ਨੂੰ ਖੁਦ ਕਪਿਲ ਸ਼ਰਮਾ ਨੇ ਆਪਣੀ ਆਵਾਜ਼ ਦਿੱਤੀ ਹੈ, ਜੋ ਸਰੋਤਿਆਂ ਲਈ ਇੱਕ ਖਾਸ ਸਰਪ੍ਰਾਈਜ਼ ਵਜੋਂ ਸਾਹਮਣੇ ਆਇਆ ਹੈ।

ਇਮੋਸ਼ਨਸ ਨਾਲ ਭਰਪੂਰ ਹੈ ਨਵਾਂ ਅੰਦਾਜ਼ 

ਇਹ ਗਾਣਾ ਪਹਿਲਾਂ ਹੀ ਪ੍ਰਸ਼ੰਸਕਾਂ ਦੀ ਪਸੰਦ ਬਣਿਆ ਹੋਇਆ ਸੀ, ਪਰ ਕਪਿਲ ਸ਼ਰਮਾ ਦੇ ਇਸ ਨਵੇਂ ਅੰਦਾਜ਼ ਨੇ ਗਾਣੇ ਵਿੱਚ ਜਜ਼ਬਾਤਾਂ ਦੀ ਇੱਕ ਹੋਰ ਡੂੰਘਾਈ ਜੋੜ ਦਿੱਤੀ ਹੈ। ਸਰੋਤਾਂ ਅਨੁਸਾਰ, ਇਹ ਅਨਪਲੱਗਡ ਵਰਜ਼ਨ ਗਾਣੇ ਨੂੰ ਵਧੇਰੇ ਨਿੱਜੀ, ਸਾਦਾ ਅਤੇ ਦਿਲ ਨੂੰ ਛੂਹ ਲੈਣ ਵਾਲਾ ਅਹਿਸਾਸ ਦਿੰਦਾ ਹੈ, ਜੋ ਐਲਬਮ ਦੇ ਫਿਨਾਲੇ ਨੂੰ ਯਾਦਗਾਰ ਬਣਾਉਂਦਾ ਹੈ। ਦੱਸ ਦੇਈਏ ਕਿ ਇਸ ਗਾਣੇ ਨੂੰ ਪਹਿਲਾਂ ਜੁਬਿਨ ਨੌਟਿਆਲ ਨੇ ਗਾਇਆ ਸੀ ਅਤੇ ਇਸ ਦੇ ਬੋਲ ਲਵਰਾਜ ਵੱਲੋਂ ਲਿਖੇ ਗਏ ਹਨ।

ਫਿਲਮ ਦੀ ਸਟਾਰ ਕਾਸਟ ਅਤੇ ਨਿਰਦੇਸ਼ਨ 

ਅਨੁਕਲਪ ਗੋਸਵਾਮੀ ਦੇ ਨਿਰਦੇਸ਼ਨ ਹੇਠ ਬਣੀ ਇਹ ਫਿਲਮ ਵੀਨਸ ਵਰਲਡਵਾਈਡ ਐਂਟਰਟੇਨਮੈਂਟ ਦੇ ਬੈਨਰ ਹੇਠ ਤਿਆਰ ਕੀਤੀ ਗਈ ਹੈ। ਫਿਲਮ ਵਿੱਚ ਕਪਿਲ ਸ਼ਰਮਾ ਦੇ ਨਾਲ ਮੰਜੋਤ ਸਿੰਘ, ਹੀਰਾ ਵਾਰੀਨਾ, ਤ੍ਰਿਧਾ ਚੌਧਰੀ, ਪਾਰੁਲ ਗੁਲਾਟੀ, ਆਇਸ਼ਾ ਖਾਨ, ਅਖਿਲਿੰਦਰ ਮਿਸ਼ਰਾ ਅਤੇ ਜੈਮੀ ਲੀਵਰ ਵਰਗੇ ਦਿੱਗਜ ਕਲਾਕਾਰ ਨਜ਼ਰ ਆਉਣਗੇ। ਇਹ ਫਿਲਮ ਰਤਨ ਜੈਨ, ਗਣੇਸ਼ ਜੈਨ ਅਤੇ ਅੱਬਾਸ-ਮਸਤਾਨ ਦੇ ਸਹਿਯੋਗ ਨਾਲ ਬਣਾਈ ਗਈ ਹੈ।