ਸ਼ਵੇਤਾ ਦੇ ਜਨਮਦਿਨ ਮੌਕੇ ਅਮਿਤਾਭ ਨੇ ਸਾਂਝੀਆਂ ਕੀਤੀਆਂ ਥ੍ਰੋ-ਬੈਕ ਤਸਵੀਰਾਂ, ਕਿਹਾ-‘ਧੀਆਂ ਚੰਗੀਆਂ ਹੁੰਦੀਆਂ ਹਨ’

ਮੁੰਬਈ: ਬਾਲੀਵੁੱਡ ਦੇ ਮਹਾਨਾਇਕ ਅਮਿਤਾਭ ਬੱਚਨ ਦੀ ਲਾਡਲੀ ਧੀ ਸ਼ਵੇਤਾ ਬੱਚਨ ਨੰਦਾ 17 ਮਾਰਚ ਨੂੰ ਆਪਣਾ 47ਵਾਂ ਜਨਮਦਿਨ ਮਨ੍ਹਾ ਰਹੀ ਹੈ। ਇਸ ਮੌਕੇ ’ਤੇ ਬਿਗ ਬੀ ਨੇ ਕੁਝ ਥੋ੍ਰ-ਬੈਕ ਤਸਵੀਰਾਂ ਸਾਂਝੀਆਂ ਕੀਤੀਆਂ ਹਨ। ਬਲੈਕ ਐਂਡ ਵ੍ਹਾਈਟ ਤਸਵੀਰ ਸ਼ਵੇਤਾ ਦੇ ਬਚਪਨ ਦੀ ਹੈ ਜਿਸ ’ਚ ਉਹ ਆਪਣੇ ਪਿਤਾ ਦੀ ਗੋਦ ’ਚ ਹੈ। 

ਉੱਧਰ ਦੂਜੀ ਤਸਵੀਰ ਕੁਝ ਸਮਾਂ ਪਹਿਲਾਂ ਦੀ ਹੈ ਜੋ ਕਿ ਇਕ ਫੋਟੋਸ਼ੂਟ ਦੀ ਹੈ। ਦੋਵੇਂ ਕੈਮਰੇ ਦੇ ਸਾਹਮਣੇ ਪੋਜ ਦੇ ਰਹੇ ਹਨ। ਇਸ ਤਸਵੀਰ ਦੇ ਨਾਲ ਅਮਿਤਾਭ ਨੇ ਲਿਖਿਆ- ‘ਧੀਆਂ ਚੰਗੀਆਂ ਹੁੰਦੀਆਂ ਹਨ’। ਸ਼ਵੇਤਾ ਲਈ ਤੁਹਾਡੀਆਂ ਸ਼ੁੱਭਕਾਮਨਾਵਾਂ ਦਾ ਸ਼ੁੱਕਰੀਆਂ। ਇਨ੍ਹਾਂ ਤਸਵੀਰਾਂ ਨਾਲ ਬਿਗ ਬੀ ਨੇ ਹਾਰਟ ਇਮੋਟੀਕਾਨ ਪੋਸਟ ਕੀਤਾ। 

ਫ਼ਿਲਮਾਂ ਤੋਂ ਦੂਰ ਹੈ ਸ਼ਵੇਤਾ
ਬਿਗ ਬੀ ਦੀ ਧੀ ਨੇ ਫ਼ਿਲਮਾਂ ਤੋਂ ਦੂਰ ਆਪਣੀ ਇਕ ਵੱਖਰੀ ਪਛਾਣ ਬਣਾਈ ਹੋਈ ਹੈ। ਸ਼ਵੇਤਾ ਬੱਚਨ ਦਾ ਆਪਣਾ ਕਲੋਦਿੰਗ ਬ੍ਰਾਂਡ ਵੀ ਹੈ। ਹਾਲਾਂਕਿ ਸਾਲ 2006 ’ਚ ਸ਼ਵੇਤਾ ਨੇ ਲਾਰੀਅਲ ਆਫੀਸ਼ੀਅਲ ਲਈ ਪਹਿਲੀ ਵਾਰ ਮਾਡਲਿੰਗ ਕੀਤੀ ਸੀ। ਇਸ ਤੋਂ ਬਾਅਦ ਸਾਲ 2009 ’ਚ ਉਹ ਫਿਰ ਤੋਂ ਰੈਂਪ ’ਤੇ ਆਪਣੇ ਭਰਾ ਅਭਿਸ਼ੇਕ ਬੱਚਨ ਦੇ ਨਾਲ ਉਤਰੀ। ਕੁਝ ਸਮਾਂ ਪਹਿਲਾਂ ਸ਼ਵੇਤਾ ਡਿਜ਼ਾਈਨਰ ਅਬੁ ਜਾਨੀ ਅਤੇ ਸੰਦੀਪ ਖੋਸਲਾ ਦੀ ਸ਼ੋਅ ਸਟਾਪਰ ਵੀ ਬਣੀ ਸੀ। ਇਸ ਸ਼ੋਅ ’ਚ ਅਮਿਤਾਭ ਬੱਚਨ ਵੀ ਨਜ਼ਰ ਆਏ ਸਨ। 

ਰਣਬੀਰ ਕਪੂਰ ਦੇ ਚਚੇਰੇ ਭਰਾ ਨਾਲ ਹੋਇਆ ਸ਼ਵੇਤਾ ਦਾ ਵਿਆਹ
ਅਮਿਤਾਭ ਬੱਚਨ ਦੀ ਧੀ ਸ਼ਵੇਤਾ ਦਾ ਵਿਆਹ 1997 ’ਚ ਰਣਬੀਰ ਕਪੂਰ ਦੇ ਚਚੇਰੇ ਭਰਾ (ਭੂਆ ਦੇ ਮੁੰਡੇ) ਨਿਖਿਲ ਨੰਦਾ ਨਾਲ ਹੋਇਆ ਸੀ। ਇਸ ਨਾਤੇ ਉਹ ਰਣਬੀਰ ਦੇ ਰਿਸ਼ਤੇ ’ਚ ਭਾਬੀ ਲੱਗਦੀ ਹੈ। ਸ਼ਵੇਤਾ ਅਤੇ ਨਿਖਿਲ ਦੇ ਦੋ ਬੱਚੇ ਹਨ। ਬੇਟੀ ਨਵਿਆ ਅਤੇ ਬੇਟਾ ਅਗਸਤਯ।