ਧੀਆਂ ਨੇ ਕਾਮਯਾਬ ਹੋ ਕੇ ਕਰਵਾਇਆ ਮਾਪਿਆਂ ਦਾ ਤਲਾਕ, ਮਾਂ ਨੂੰ 29 ਸਾਲਾਂ ਦੇ ਜ਼ੁਲਮਾਂ ਮਗਰੋਂ ਮਿਲੀ ਆਜ਼ਾਦੀ

ਜਲੰਧਰ: ਜਲੰਧਰ ਤੋਂ ਇਕ ਬਹੁਤ ਹੀ ਭਾਵੁਕ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਦੋ ਧੀਆਂ ਨੇ ਆਪਣੀ ਮਾਂ ਨੂੰ 29 ਸਾਲਾਂ ਦੇ ਜ਼ੁਲਮਾਂ ਤੋਂ ਆਜ਼ਾਦ ਕਰਵਾਇਆ ਹੈ। ਬੇਟੇ ਦੀ ਚਾਹਤ ਵਿਚ ਇਕ ਵਿਅਕਤੀ ਨੇ ਆਪਣੀ ਪਤਨੀ ਨੂੰ ਲਗਭਗ ਤਿੰਨ ਦਹਾਕਿਆਂ ਤੱਕ ਮਾਨਸਿਕ ਅਤੇ ਸਰੀਰਕ ਤੌਰ 'ਤੇ ਤਸੀਹੇ ਦਿੱਤੇ, ਪਰ ਅੱਜ ਉਸੇ ਦੀਆਂ ਧੀਆਂ ਨੇ ਕਾਮਯਾਬ ਹੋ ਕੇ ਆਪਣੀ ਮਾਂ ਨੂੰ ਨਵੀਂ ਜ਼ਿੰਦਗੀ ਦਿੱਤੀ ਹੈ।

ਘਰ ਦੇ ਬੇਹੱਦ ਤਣਾਅਪੂਰਨ ਮਾਹੌਲ ਅਤੇ ਪਿਤਾ ਦੇ ਡਰ ਦੇ ਬਾਵਜੂਦ, ਦੋਵਾਂ ਧੀਆਂ ਨੇ ਆਪਣੀ ਪੜ੍ਹਾਈ ਜਾਰੀ ਰੱਖੀ। ਅੱਜ ਉਨ੍ਹਾਂ ਵਿਚੋਂ ਇਕ ਧੀ ਡਾਕਟਰ ਹੈ ਅਤੇ ਦੂਜੀ ਆਰਕੀਟੈਕਟ ਬਣ ਕੇ ਆਰਥਿਕ ਤੌਰ 'ਤੇ ਆਜ਼ਾਦ ਹੋ ਗਈ ਹੈ। ਧੀਆਂ ਨੇ ਦੱਸਿਆ ਕਿ ਜਦੋਂ ਉਨ੍ਹਾਂ ਦਾ ਪਿਤਾ ਮਾਂ ਨਾਲ ਕੁੱਟਮਾਰ ਕਰਦਾ ਸੀ, ਤਾਂ ਉਹ ਡਰ ਦੇ ਮਾਰੇ ਕਮਰੇ ਵਿਚ ਛਿਪ ਜਾਂਦੀਆਂ ਸਨ।

ਜਦੋਂ ਧੀਆਂ ਆਪਣੇ ਪੈਰਾਂ 'ਤੇ ਖੜ੍ਹੀਆਂ ਹੋ ਗਈਆਂ, ਤਾਂ ਉਨ੍ਹਾਂ ਨੇ 'ਦਿਵਿਆ ਦ੍ਰਿਸ਼ਟੀ ਫ੍ਰੀ ਫੈਮਿਲੀ ਕਾਉਂਸਲਿੰਗ ਸੈਂਟਰ' ਦੀ ਮਦਦ ਲਈ। ਸੈਂਟਰ ਦੀ ਪ੍ਰਧਾਨ ਪ੍ਰਵੀਣ ਅਬਰੋਲ ਨੇ ਦੱਸਿਆ ਕਿ ਧੀਆਂ ਦੀਆਂ ਗੱਲਾਂ ਸੁਣ ਕੇ ਉੱਥੇ ਮੌਜੂਦ ਹਰ ਕੋਈ ਭਾਵੁਕ ਹੋ ਗਿਆ। ਉਨ੍ਹਾਂ ਨੇ ਕਾਨੂੰਨੀ ਰਸਤਾ ਅਪਣਾ ਕੇ ਆਪਣੀ ਮਾਂ ਦਾ ਪਿਤਾ ਤੋਂ ਤਲਾਕ ਕਰਵਾ ਦਿੱਤਾ। ਤਲਾਕ ਤੋਂ ਬਾਅਦ ਧੀਆਂ ਨੇ ਪਹਿਲਾਂ ਆਪਣੀ ਮਾਂ ਲਈ ਇਕ ਵੱਖਰਾ ਫਲੈਟ ਖਰੀਦਿਆ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਪਹਿਲਾਂ ਮਾਂ ਦਾ ਸੁਰੱਖਿਅਤ ਅਤੇ ਆਤਮ-ਨਿਰਭਰ ਹੋਣਾ ਜ਼ਰੂਰੀ ਹੈ, ਉਸ ਤੋਂ ਬਾਅਦ ਹੀ ਉਹ ਆਪਣੇ ਵਿਆਹ ਬਾਰੇ ਸੋਚਣਗੀਆਂ।