AP ਢਿੱਲੋਂ ਨਾਲ ''ਕਿੱਸ'' ਵੀਡੀਓ ''ਤੇ ਤਾਰਾ ਸੁਤਾਰੀਆ ਨੇ ਤੋੜੀ ਚੁੱਪੀ; ਪ੍ਰੇਮੀ ਵੀਰ ਪਹਾੜੀਆ ਨੇ ਦੱਸੀ ਵਾਇਰਲ ਵੀਡੀਓ ਦੀ ਸੱਚਾਈ

ਮੁੰਬਈ- ਮਸ਼ਹੂਰ ਪੰਜਾਬੀ ਗਾਇਕ ਏਪੀ ਢਿੱਲੋਂ ਦੇ ਮੁੰਬਈ ਕੰਸਰਟ ਦੀ ਇੱਕ ਵੀਡੀਓ ਸੋਸ਼ਲ ਮੀਡੀਆ 'ਤੇ ਤੇਜ਼ੀ ਨਾਲ ਵਾਇਰਲ ਹੋ ਰਹੀ ਹੈ, ਜਿਸ ਨੇ ਫਿਲਮੀ ਗਲਿਆਰਿਆਂ ਵਿੱਚ ਹਲਚਲ ਮਚਾ ਦਿੱਤੀ ਹੈ। ਇਸ ਵੀਡੀਓ ਵਿੱਚ ਅਦਾਕਾਰਾ ਤਾਰਾ ਸੁਤਾਰੀਆ ਸਟੇਜ 'ਤੇ ਏਪੀ ਢਿੱਲੋਂ ਨਾਲ ਉਨ੍ਹਾਂ ਦੇ ਗਾਣੇ 'ਥੋੜੀ ਸੀ ਦਾਰੂ' 'ਤੇ ਪਰਫਾਰਮ ਕਰਦੀ ਨਜ਼ਰ ਆ ਰਹੀ ਹੈ। ਇਸੇ ਦੌਰਾਨ ਗਾਇਕ ਵੱਲੋਂ ਅਦਾਕਾਰਾ ਦੇ ਗੱਲ 'ਤੇ 'ਕਿੱਸ' ਕਰਨ ਦੀ ਵੀਡੀਓ ਸਾਹਮਣੇ ਆਉਣ ਤੋਂ ਬਾਅਦ ਪ੍ਰਸ਼ੰਸਕਾਂ ਵਿੱਚ ਕਾਫੀ ਚਰਚਾ ਛਿੜ ਗਈ ਸੀ।
"ਚਾਲਾਕੀ ਭਰੀ ਐਡੀਟਿੰਗ ਤੇ ਝੂਠੇ ਦਾਅਵੇ"
ਇਸ ਵਾਇਰਲ ਵੀਡੀਓ 'ਤੇ ਹੁਣ ਤਾਰਾ ਸੁਤਾਰੀਆ ਨੇ ਆਪਣੀ ਚੁੱਪੀ ਤੋੜੀ ਹੈ। ਅਦਾਕਾਰਾ ਨੇ ਇੰਸਟਾਗ੍ਰਾਮ 'ਤੇ ਕੰਸਰਟ ਦੀ ਅਸਲ ਵੀਡੀਓ ਸਾਂਝੀ ਕਰਦਿਆਂ ਵਾਇਰਲ ਹੋ ਰਹੀ ਵੀਡੀਓ ਨੂੰ 'ਚਾਲਾਕੀ ਭਰੀ ਐਡੀਟਿੰਗ' ਅਤੇ 'ਝੂਠੇ ਦਾਅਵੇ' ਕਰਾਰ ਦਿੱਤਾ ਹੈ। ਤਾਰਾ ਨੇ ਸਪੱਸ਼ਟ ਕੀਤਾ ਕਿ ਅਜਿਹੇ 'ਪੇਡ ਪੀ.ਆਰ. ਕੈਂਪੇਨ' ਉਸ ਨੂੰ ਪ੍ਰਭਾਵਿਤ ਨਹੀਂ ਕਰ ਸਕਦੇ ਅਤੇ ਅੰਤ ਵਿੱਚ ਸੱਚ ਦੀ ਹੀ ਜਿੱਤ ਹੁੰਦੀ ਹੈ। ਉਨ੍ਹਾਂ ਨੇ ਏਪੀ ਢਿੱਲੋਂ ਨੂੰ ਆਪਣਾ 'ਫੇਵਰੇਟ' ਦੱਸਦਿਆਂ ਇਸ ਰਾਤ ਨੂੰ ਸ਼ਾਨਦਾਰ ਦੱਸਿਆ।
ਵੀਰ ਪਹਾੜੀਆ ਨੇ ਦਿੱਤਾ ਕਰਾਰਾ ਜਵਾਬ
ਵੀਡੀਓ ਵਿੱਚ ਤਾਰਾ ਸੁਤਾਰੀਆ ਦੇ ਬੁਆਏਫ੍ਰੈਂਡ ਅਤੇ ਅਦਾਕਾਰ ਵੀਰ ਪਹਾੜੀਆ ਦੀ ਪ੍ਰਤੀਕਿਰਿਆ ਵੀ ਦਿਖਾਈ ਗਈ ਸੀ, ਜਿਸ ਬਾਰੇ ਦਾਅਵਾ ਕੀਤਾ ਜਾ ਰਿਹਾ ਸੀ ਕਿ ਉਹ ਆਪਣੀ ਗਰਲਫ੍ਰੈਂਡ ਦੀ ਪਰਫਾਰਮੈਂਸ ਦੇਖ ਕੇ ਨਾਖੁਸ਼ ਅਤੇ ਅਸਹਿਜ ਹਨ। ਇਸ 'ਤੇ ਵੀਰ ਪਹਾੜੀਆ ਨੇ ਸੱਚਾਈ ਦੱਸਦਿਆਂ ਕਿਹਾ ਕਿ ਉਨ੍ਹਾਂ ਦੇ ਰਿਐਕਸ਼ਨ ਦੀ ਫੁਟੇਜ ਕਿਸੇ ਹੋਰ ਗਾਣੇ ਦੌਰਾਨ ਲਈ ਗਈ ਸੀ, ਨਾ ਕਿ ਤਾਰਾ ਦੀ ਪਰਫਾਰਮੈਂਸ ਵੇਲੇ। ਉਨ੍ਹਾਂ ਨੇ ਅਜਿਹੀ ਐਡੀਟਿੰਗ ਕਰਨ ਵਾਲਿਆਂ ਨੂੰ 'ਜੋਕਰ' ਕਹਿ ਕੇ ਸੰਬੋਧਨ ਕੀਤਾ।
ਰਿਸ਼ਤੇ ਦੀ ਸੱਚਾਈ
ਦੱਸ ਦੇਈਏ ਕਿ ਤਾਰਾ ਸੁਤਾਰੀਆ ਅਤੇ ਵੀਰ ਪਹਾੜੀਆ ਨੇ ਇਸੇ ਸਾਲ ਅਗਸਤ ਵਿੱਚ ਆਪਣੇ ਰਿਸ਼ਤੇ ਨੂੰ ਅਧਿਕਾਰਤ ਕੀਤਾ ਸੀ। ਵੀਰ ਨੇ ਹਾਲ ਹੀ ਵਿੱਚ ਇੱਕ ਇੰਟਰਵਿਊ ਦੌਰਾਨ ਕਿਹਾ ਸੀ ਕਿ ਉਹ ਆਪਣੇ ਪਿਆਰ ਨੂੰ ਖੁੱਲ੍ਹ ਕੇ ਅਪਣਾਉਣ ਅਤੇ ਆਪਣੀਆਂ ਭਾਵਨਾਵਾਂ ਨੂੰ ਪ੍ਰਗਟ ਕਰਨ ਵਿੱਚ ਕਦੇ ਨਹੀਂ ਹਿਚਕਿਚਾਉਂਦੇ।