"ਜੇਕਰ ਉਹ ਸੁਧਰ ਜਾਣ ਅਤੇ...।" ਸੁਨੀਤਾ ਅਹੁਜਾ ਨੇ ਪਤੀ ਗੋਵਿੰਦਾ ਨਾਲ ਰਹਿਣ ਲਈ ਰੱਖੀ ਵੱਡੀ ਸ਼ਰਤ

ਮੁੰਬਈ - ਬਾਲੀਵੁੱਡ ਦੇ 'ਹੀਰੋ ਨੰਬਰ 1' ਗੋਵਿੰਦਾ ਅਤੇ ਉਨ੍ਹਾਂ ਦੀ ਪਤਨੀ ਸੁਨੀਤਾ ਆਹੂਜਾ ਦੇ ਰਿਸ਼ਤੇ 'ਚ ਚੱਲ ਰਹੀ ਕੜਵਾਹਟ ਹੁਣ ਇਕ ਨਵੇਂ ਮੋੜ 'ਤੇ ਪਹੁੰਚ ਗਈ ਹੈ। ਪਿਛਲੇ ਕਈ ਮਹੀਨਿਆਂ ਤੋਂ ਅਫੇਅਰ ਅਤੇ ਤਲਾਕ ਦੀਆਂ ਅਫ਼ਵਾਹਾਂ ਦੇ ਵਿਚਕਾਰ, ਸੁਨੀਤਾ ਆਹੂਜਾ ਨੇ ਆਪਣੇ ਤਾਜ਼ਾ ਵਲੌਗ 'ਚ ਖੁਲਾਸਾ ਕੀਤਾ ਹੈ ਕਿ ਉਹ ਗੋਵਿੰਦਾ ਨੂੰ ਮਾਫ਼ ਕਰਨ ਲਈ ਤਿਆਰ ਹੈ, ਪਰ ਇਸ ਲਈ ਉਸ ਨੇ ਇੱਕ ਖ਼ਾਸ ਸ਼ਰਤ ਰੱਖੀ ਹੈ।

ਸੁਧਰਨ ਦੀ ਰੱਖੀ ਸ਼ਰਤ
ਸੁਨੀਤਾ ਨੇ ਆਪਣੇ ਵਲੌਗ 'ਚ ਇਕ ਸਵਾਲ-ਜਵਾਬ ਸੈਸ਼ਨ ਦੌਰਾਨ ਕਿਹਾ ਕਿ ਗੋਵਿੰਦਾ ਉਨ੍ਹਾਂ ਦਾ 'ਬਚਪਨ ਦਾ ਪਿਆਰ' ਹੈ। ਉਨ੍ਹਾਂ ਕਿਹਾ, "ਜੇਕਰ ਉਹ ਸੁਧਰ ਜਾਣ ਅਤੇ ਸਾਡੇ ਹਿਸਾਬ ਨਾਲ ਰਹਿਣ, ਤਾਂ ਮੈਂ ਉਨ੍ਹਾਂ ਨੂੰ ਮਾਫ਼ ਕਰ ਦਵਾਂਗੀ।" ਸੁਨੀਤਾ ਨੇ ਸਪੱਸ਼ਟ ਕੀਤਾ ਕਿ ਉਹ ਹੁਣ ਖ਼ਬਰਾਂ ਵਿਚ ਚੱਲ ਰਹੀਆਂ ਗੱਲਾਂ ਨੂੰ ਹੋਰ ਨਹੀਂ ਸੁਣਨਾ ਚਾਹੁੰਦੀ।

'ਸੰਗਤ ਖ਼ਰਾਬ ਹੈ' - ਸੁਨੀਤਾ ਦਾ ਤਿੱਖਾ ਤੰਜ
ਗੋਵਿੰਦਾ ਦੀ ਮੌਜੂਦਾ ਸਥਿਤੀ 'ਤੇ ਟਿੱਪਣੀ ਕਰਦਿਆਂ ਸੁਨੀਤਾ ਨੇ ਕਿਹਾ ਕਿ ਗੋਵਿੰਦਾ ਦੀ ਸੰਗਤ ਖ਼ਰਾਬ ਹੋ ਚੁੱਕੀ ਹੈ। ਉਨ੍ਹਾਂ ਮੁਤਾਬਕ ਜਦੋਂ ਤੱਕ ਉਹ ਗੋਵਿੰਦਾ ਨੂੰ ਮੈਨੇਜ ਕਰਦੀ ਸੀ, ਉਨ੍ਹਾਂ ਨੂੰ ਫੁੱਲ ਵਾਂਗ ਰੱਖਦੀ ਸੀ। ਸੁਨੀਤਾ ਨੇ ਦੋਸ਼ ਲਾਇਆ ਕਿ ਹੁਣ ਨਵੇਂ ਮੈਨੇਜਰ ਆ ਗਏ ਹਨ ਜੋ ਇਹ ਨਹੀਂ ਸਮਝ ਰਹੇ ਕਿ ਗੋਵਿੰਦਾ ਦਾ ਸਟਾਰਡਮ ਖ਼ਤਮ ਹੋ ਚੁੱਕਾ ਹੈ। ਉਨ੍ਹਾਂ ਇਹ ਵੀ ਕਿਹਾ ਕਿ ਪਹਿਲਾਂ ਗੋਵਿੰਦਾ ਆਪਣੀ ਮਾਂ ਤੋਂ ਡਰਦੇ ਸਨ ਪਰ ਉਨ੍ਹਾਂ ਦੀ ਮੌਤ ਤੋਂ ਬਾਅਦ ਉਹ ਕਾਫੀ ਬੇਪਰਵਾਹ ਹੋ ਗਏ ਹਨ।

ਮੁਸ਼ਕਿਲ ਦੌਰ 'ਚੋਂ ਗੁਜ਼ਰ ਰਹੀ ਹੈ ਸੁਨੀਤਾ
ਆਪਣੀ ਨਿੱਜੀ ਸਿਹਤ ਬਾਰੇ ਗੱਲ ਕਰਦਿਆਂ ਸੁਨੀਤਾ ਨੇ ਦੱਸਿਆ ਕਿ ਉਹ ਇਸ ਸਮੇਂ ਮੇਨੋਪੌਜ਼ ਦੇ ਦੌਰ 'ਚੋਂ ਗੁਜ਼ਰ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਇਸ ਉਮਰ 'ਚ ਇਕ ਔਰਤ ਨੂੰ ਪਤੀ ਅਤੇ ਬੱਚਿਆਂ ਦੇ ਸਹਿਯੋਗ ਅਤੇ ਪਿਆਰ ਦੀ ਲੋੜ ਹੁੰਦੀ ਹੈ, ਨਾ ਕਿ ਮਾਨਸਿਕ ਤਣਾਅ ਦੀ।

ਗੋਵਿੰਦਾ ਨੇ ਇਲਜ਼ਾਮਾਂ ਨੂੰ ਨਕਾਰਿਆ
ਦੂਜੇ ਪਾਸੇ, ਗੋਵਿੰਦਾ ਨੇ ਹਾਲ ਹੀ 'ਚ ਇਕ ਇੰਟਰਵਿਊ ਦੌਰਾਨ ਆਪਣੀ ਚੁੱਪ ਤੋੜਦਿਆਂ ਸਾਰੇ ਇਲਜ਼ਾਮਾਂ ਨੂੰ ਖਾਰਜ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਉਹ ਇਕ ਸਾਜ਼ਿਸ਼ ਦਾ ਸ਼ਿਕਾਰ ਹਨ ਅਤੇ ਉਨ੍ਹਾਂ ਨੇ ਕਦੇ ਵੀ ਕਿਸੇ ਕੋ-ਐਕਟਰੈਸ ਨੂੰ ਗਲਤ ਨਜ਼ਰ ਨਾਲ ਨਹੀਂ ਦੇਖਿਆ।

39 ਸਾਲ ਪੁਰਾਣਾ ਰਿਸ਼ਤਾ
ਜ਼ਿਕਰਯੋਗ ਹੈ ਕਿ ਗੋਵਿੰਦਾ ਅਤੇ ਸੁਨੀਤਾ ਦਾ ਵਿਆਹ 1987 'ਚ ਹੋਇਆ ਸੀ ਅਤੇ ਉਨ੍ਹਾਂ ਦੇ ਦੋ ਬੱਚੇ ਹਨ। ਸਾਲ 2025 ਤੋਂ ਦੋਵਾਂ ਦੇ ਰਿਸ਼ਤੇ 'ਚ ਤਣਾਅ ਦੀਆਂ ਖ਼ਬਰਾਂ ਲਗਾਤਾਰ ਸੁਰਖੀਆਂ ਬਟੋਰ ਰਹੀਆਂ ਹਨ। ਸੁਨੀਤਾ ਨੇ ਪਹਿਲਾਂ ਇਹ ਵੀ ਦਾਅਵਾ ਕੀਤਾ ਸੀ ਕਿ ਇਕ ਔਰਤ ਗੋਵਿੰਦਾ ਨੂੰ ਪਿਆਰ ਨਹੀਂ ਕਰਦੀ, ਸਗੋਂ ਸਿਰਫ ਉਸ ਦੇ ਪੈਸੇ ਪਿੱਛੇ ਹੈ।