ਸੁਨੀਲ ਸ਼ੈੱਟੀ ਨੇ ਬੇਟੇ ਦੇ ਬ੍ਰੇਕਅੱਪ ’ਤੇ ਤੋੜੀ ਚੁੱਪ; ਦੱਸਿਆ ਕਿਉਂ ਸਿੰਗਲ ਹੈ ਅਹਾਨ

ਮੁੰਬਈ- ਬਾਲੀਵੁੱਡ ਦੇ ਦਿੱਗਜ ਅਦਾਕਾਰ ਸੁਨੀਲ ਸ਼ੈੱਟੀ ਦੇ ਬੇਟੇ ਅਹਾਨ ਸ਼ੈੱਟੀ ਦੀ ਨਿੱਜੀ ਜ਼ਿੰਦਗੀ ਨੂੰ ਲੈ ਕੇ ਪਿਛਲੇ ਕਾਫੀ ਸਮੇਂ ਤੋਂ ਚੱਲ ਰਹੀਆਂ ਅਟਕਲਾਂ 'ਤੇ ਹੁਣ ਵਿਰਾਮ ਲੱਗ ਗਿਆ ਹੈ। ਆਪਣੀ ਬਹੁ-ਚਰਚਿਤ ਫਿਲਮ ‘ਬਾਰਡਰ 2’ ਦੀ ਰਿਲੀਜ਼ ਤੋਂ ਮਹਿਜ਼ ਕੁਝ ਘੰਟੇ ਪਹਿਲਾਂ ਸੁਨੀਲ ਸ਼ੈੱਟੀ ਨੇ ਕਨਫਰਮ ਕਰ ਦਿੱਤਾ ਹੈ ਕਿ ਅਹਾਨ ਸ਼ੈੱਟੀ ਹੁਣ ਸਿੰਗਲ ਹੈ।
11 ਸਾਲ ਪੁਰਾਣਾ ਰਿਸ਼ਤਾ ਹੋਇਆ ਖਤਮ
ਸਰੋਤਾਂ ਅਨੁਸਾਰ ਅਹਾਨ ਸ਼ੈੱਟੀ ਲੰਬੇ ਸਮੇਂ ਤੋਂ ਫੈਸ਼ਨ ਡਿਜ਼ਾਈਨਰ ਤਾਨਿਆ ਸ਼ਰਾਫ ਨੂੰ ਡੇਟ ਕਰ ਰਹੇ ਸਨ। ਇਹ ਦੋਵੇਂ ਬਚਪਨ ਦੇ ਦੋਸਤ ਸਨ ਅਤੇ ਇੱਕੋ ਸਕੂਲ ਵਿੱਚ ਪੜ੍ਹੇ ਸਨ। ਸੁਨੀਲ ਸ਼ੈੱਟੀ ਨੇ ਖੁਲਾਸਾ ਕੀਤਾ ਕਿ ਉਨ੍ਹਾਂ ਦਾ ਲਗਭਗ 11 ਸਾਲ ਪੁਰਾਣਾ ਰਿਸ਼ਤਾ ਨਵੰਬਰ 2023 ਦੇ ਆਲੇ-ਦੁਆਲੇ ਟੁੱਟ ਗਿਆ ਸੀ। ਹਾਲਾਂਕਿ ਅਹਾਨ ਜਾਂ ਤਾਨਿਆ ਨੇ ਕਦੇ ਵੀ ਆਪਣੇ ਬ੍ਰੇਕਅੱਪ ਬਾਰੇ ਖੁੱਲ੍ਹ ਕੇ ਗੱਲ ਨਹੀਂ ਕੀਤੀ ਸੀ।
ਘਰ ਵਿੱਚ ‘ਜੈਨ ਬੁਆਏ’ ਦੇ ਨਾਮ ਨਾਲ ਮਸ਼ਹੂਰ ਹੈ ਅਹਾਨ
ਬੇਟੇ ਦੇ ਸੁਭਾਅ ਬਾਰੇ ਗੱਲ ਕਰਦਿਆਂ ਸੁਨੀਲ ਸ਼ੈੱਟੀ ਨੇ ਦੱਸਿਆ ਕਿ ਅਹਾਨ ਬਹੁਤ ਹੀ ਸ਼ਾਂਤ ਅਤੇ ਨਿਮਰ ਸੁਭਾਅ ਦਾ ਮਾਲਕ ਹੈ। ਸੁਨੀਲ ਸ਼ੈੱਟੀ ਨੇ ਕਿਹਾ ਕਿ ਅਹਾਨ ਬਹੁਤ ‘ਰੀਅਲ’ ਹੈ ਅਤੇ ਉਸ ਦੀ ਸ਼ਖਸੀਅਤ ਕਮਾਲ ਦੀ ਹੈ। ਸ਼ਾਂਤ ਮਾਨਸਿਕਤਾ ਕਾਰਨ ਘਰ ਵਿੱਚ ਸਾਰੇ ਉਸ ਨੂੰ ‘ਜੈਨ ਬੁਆਏ’ ਕਹਿ ਕੇ ਬੁਲਾਉਂਦੇ ਹਨ। ਸੁਨੀਲ ਨੇ ਮਜ਼ਾਕ ਵਿੱਚ ਕਿਹਾ ਕਿ ਉਹ ਹੁਣ ਸ਼ਾਂਤ ਹੈ ਕਿਉਂਕਿ ਉਹ ਸਿੰਗਲ ਹੈ, ਪਰ ਜਦੋਂ ਉਹ ਵਿਆਹ ਕਰਵਾ ਕੇ ਪਿਤਾ ਬਣ ਜਾਵੇਗਾ, ਤਾਂ ਚੀਜ਼ਾਂ ਬਦਲ ਜਾਣਗੀਆਂ।
‘ਬਾਰਡਰ 2’ ਲਈ ਕੀਤਾ ਵੱਡਾ ਸੰਘਰਸ਼
ਸੁਨੀਲ ਸ਼ੈੱਟੀ ਇਸ ਸਮੇਂ ਕਾਫੀ ਨਰਵਸ ਅਤੇ ਭਾਵੁਕ ਨਜ਼ਰ ਆ ਰਹੇ ਹਨ, ਕਿਉਂਕਿ 23 ਜਨਵਰੀ ਨੂੰ ਰਿਲੀਜ਼ ਹੋ ਰਹੀ ‘ਬਾਰਡਰ 2’ ਵਿੱਚ ਅਹਾਨ ਮੁੱਖ ਭੂਮਿਕਾ ਨਿਭਾ ਰਿਹਾ ਹੈ। ਸਰੋਤਾਂ ਅਨੁਸਾਰ ਅਹਾਨ ਨੂੰ ਇਸ ਫਿਲਮ ਲਈ ਕਈ ਦੂਜੇ ਮੌਕੇ ਗਵਾਉਣੇ ਪਏ। ਸੁਨੀਲ ਨੇ ਦੱਸਿਆ ਕਿ ਅਹਾਨ ਬਾਰੇ ਕਈ ਅਫਵਾਹਾਂ ਫੈਲਾਈਆਂ ਗਈਆਂ ਅਤੇ ਉਸ ਦੇ ਕਰੀਅਰ ਨੂੰ ਨੁਕਸਾਨ ਪਹੁੰਚਾਉਣ ਦੀ ਕੋਸ਼ਿਸ਼ ਕੀਤੀ ਗਈ, ਪਰ ਉਸ ਨੇ ਆਪਣੀ ਸਮਝਦਾਰੀ ਨਾਲ ਫਿਲਮਾਂ ਦੀ ਚੋਣ ਕੀਤੀ ਹੈ।
ਸਿਨੇਮਾਘਰਾਂ ਵਿੱਚ ਗੂੰਜੇਗੀ ‘ਬਾਰਡਰ 2’
ਦੱਸਣਯੋਗ ਹੈ ਕਿ ‘ਬਾਰਡਰ 2’ ਦਾ ਟ੍ਰੇਲਰ ਪਹਿਲਾਂ ਹੀ ਦਰਸ਼ਕਾਂ ਦੇ ਰੌਂਗਟੇ ਖੜ੍ਹੇ ਕਰ ਚੁੱਕਾ ਹੈ, ਜਿਸ ਵਿੱਚ ਸੰਨੀ ਦਿਓਲ ਦੀ ਦਮਦਾਰ ਆਵਾਜ਼ ਸੁਣਾਈ ਦੇ ਰਹੀ ਹੈ। ਹੁਣ ਇਹ ਦੇਖਣਾ ਦਿਲਚਸਪ ਹੋਵੇਗਾ ਕਿ ਅਹਾਨ ਸ਼ੈੱਟੀ ਆਪਣੇ ਪਿਤਾ ਦੀ ਵਿਰਾਸਤ ਨੂੰ ਕਿੰਨੀ ਅੱਗੇ ਲੈ ਕੇ ਜਾਂਦਾ ਹੈ।