ਕਾਨੂੰਨੀ ਸ਼ਿਕੰਜੇ ''ਚ ਫਸੇ ਮਹੇਸ਼ ਬਾਬੂ, ਜਾਣੋ ਕੀ ਹੈ ਪੂਰਾ ਮਾਮਲਾ

ਐਂਟਰਟੇਨਮੈਂਟ ਡੈਸਕ- ਤੇਲਗੂ ਸੁਪਰਸਟਾਰ ਮਹੇਸ਼ ਬਾਬੂ ਇੱਕ ਵਾਰ ਫਿਰ ਖ਼ਬਰਾਂ ਵਿੱਚ ਹਨ, ਪਰ ਇਸ ਵਾਰ ਉਹ ਆਪਣੀਆਂ ਕਿਸੇ ਫ਼ਿਲਮਾਂ ਲਈ ਨਹੀਂ ਸਗੋਂ ਇੱਕ ਕਾਨੂੰਨੀ ਕੇਸ ਲਈ ਖ਼ਬਰਾਂ ਵਿੱਚ ਆਏ ਹਨ। ਮਹੇਸ਼ ਬਾਬੂ ਹੈਦਰਾਬਾਦ ਸਥਿਤ ਇੱਕ ਰੀਅਲ ਅਸਟੇਟ ਕੰਪਨੀ ਨਾਲ ਆਪਣੇ ਸਬੰਧਾਂ ਕਾਰਨ ਵਿਵਾਦਾਂ ਵਿੱਚ ਘਿਰੇ ਹੋਏ ਹਨ। ਰੰਗਾ ਰੈਡੀ ਜ਼ਿਲ੍ਹਾ ਖਪਤਕਾਰ ਕਮਿਸ਼ਨ ਨੇ ਸਾਈ ਸੂਰਿਆ ਡਿਵੈਲਪਰਾਂ ਨਾਲ ਸਬੰਧਤ ਇੱਕ ਧੋਖਾਧੜੀ ਦੇ ਮਾਮਲੇ ਵਿੱਚ ਅਦਾਕਾਰ ਨੂੰ ਨੋਟਿਸ ਜਾਰੀ ਕੀਤਾ ਹੈ। ਮਹੇਸ਼ ਬਾਬੂ ਸਾਈ ਸੂਰਿਆ ਡਿਵੈਲਪਰਾਂ ਦੇ ਬ੍ਰਾਂਡ ਅੰਬੈਸਡਰ ਸਨ। ਹੈਦਰਾਬਾਦ ਸਥਿਤ ਇੱਕ ਡਾਕਟਰ ਨੇ ਸ਼ਿਕਾਇਤ ਦਰਜ ਕਰਵਾਈ ਹੈ, ਜਿਸ ਵਿੱਚ ਦਾਅਵਾ ਕੀਤਾ ਗਿਆ ਹੈ ਕਿ ਕੰਪਨੀ ਦੁਆਰਾ ਪ੍ਰਮੋਟ ਕੀਤੇ ਗਏ ਇੱਕ ਗੈਰ-ਮੌਜੂਦ ਲੇਆਉਟ ਵਿੱਚ ਨਿਵੇਸ਼ ਕਰਨ ਤੋਂ ਬਾਅਦ ਉਨ੍ਹਾਂ ਨੇ 34.8 ਲੱਖ ਰੁਪਏ ਗੁਆ ਦਿੱਤੇ। ਉਨ੍ਹਾਂ ਨੇ ਕਿਹਾ ਕਿ ਮਹੇਸ਼ ਬਾਬੂ ਦੇ ਸਮਰਥਨ ਨੇ ਯੋਜਨਾ ਨੂੰ ਭਰੋਸੇਯੋਗ ਬਣਾ ਦਿੱਤਾ ਸੀ।
ਇਸ ਤੋਂ ਪਹਿਲਾਂ ਅਪ੍ਰੈਲ 2025 ਵਿੱਚ ਇਨਫੋਰਸਮੈਂਟ ਡਾਇਰੈਕਟੋਰੇਟ (ਈਡੀ) ਨੇ ਸਾਈ ਸੂਰਿਆ ਡਿਵੈਲਪਰਾਂ ਅਤੇ ਸੁਰਾਨਾ ਸਮੂਹ ਨਾਲ ਸਬੰਧਤ ਇੱਕ ਮਨੀ ਲਾਂਡਰਿੰਗ ਮਾਮਲੇ ਵਿੱਚ ਉਨ੍ਹਾਂ ਦੇ ਵਿਰੁੱਧ ਕੇਸ ਦਰਜ ਕੀਤਾ ਸੀ। ਰਿਪੋਰਟਾਂ ਵਿੱਚ ਦਾਅਵਾ ਕੀਤਾ ਗਿਆ ਹੈ ਕਿ ਉਸਨੂੰ ਪ੍ਰੋਜੈਕਟਾਂ ਲਈ ਲਗਭਗ 5.9 ਕਰੋੜ ਰੁਪਏ ਦਾ ਭੁਗਤਾਨ ਕੀਤਾ ਗਿਆ ਸੀ, ਜਿਸ ਵਿੱਚੋਂ ਕੁਝ ਨਕਦ ਵਿੱਚ ਸਨ। ਹਾਲਾਂਕਿ ਅਦਾਕਾਰ ਨੂੰ ਅਧਿਕਾਰਤ ਤੌਰ 'ਤੇ ਦੋਸ਼ੀ ਵਜੋਂ ਨਾਮਜ਼ਦ ਨਹੀਂ ਕੀਤਾ ਗਿਆ ਹੈ, ਪਰ ਉਨ੍ਹਾਂਦੀ ਹਾਈ-ਪ੍ਰੋਫਾਈਲ ਸ਼ਮੂਲੀਅਤ ਹੁਣ ਸਖ਼ਤ ਜਾਂਚ ਅਧੀਨ ਹੈ।
ਖਪਤਕਾਰ ਕਮਿਸ਼ਨ ਨੇ ਮਹੇਸ਼ ਬਾਬੂ ਦੇ ਨਾਲ-ਨਾਲ ਰੀਅਲ ਅਸਟੇਟ ਫਰਮ ਅਤੇ ਇਸਦੇ ਮਾਲਕ ਕੰਚਰਲਾ ਸਤੀਸ਼ ਚੰਦਰ ਗੁਪਤਾ ਨੂੰ ਸੁਣਵਾਈ ਲਈ ਪੇਸ਼ ਹੋਣ ਲਈ ਕਿਹਾ ਹੈ। ਕੇਸ ਨੂੰ ਅਗਲੇ ਮਹੀਨੇ ਦੀ ਸੱਤਵੀਂ ਤਰੀਕ ਲਈ ਮੁਲਤਵੀ ਕਰ ਦਿੱਤਾ ਗਿਆ ਹੈ। ਹੁਣ ਤੱਕ ਮਹੇਸ਼ ਬਾਬੂ ਜਾਂ ਉਨ੍ਹਾਂ ਦੀ ਟੀਮ ਨੇ ਇਸ ਮਾਮਲੇ ਵਿੱਚ ਕੋਈ ਬਿਆਨ ਜਾਰੀ ਨਹੀਂ ਕੀਤਾ ਹੈ।