"ਨਵਾਂ ਫੋਨ, ਨਵੀਂ EMI... ਬਿੱਲ ਉਹੀ ਪੁਰਾਣਾ!" iPhone 18 ਦੀ ਦੀਵਾਨਗੀ ''ਤੇ ਸੋਨੂ ਸੂਦ ਨੇ ਕੱਸਿਆ ਤੰਜ

ਮੁੰਬਈ - ਜਿਵੇਂ ਹੀ ਭਾਰਤ 'ਚ ਐਪਲ ਦੇ ਨਵੇਂ ਸਮਾਰਟਫੋਨ, ਆਈਫੋਨ 18 ਪ੍ਰੋ ਅਤੇ ਆਈਫੋਨ 18 ਪ੍ਰੋ ਮੈਕਸ ਦੀ ਵਿਕਰੀ ਸ਼ੁਰੂ ਹੋਈ, ਦੇਸ਼ ਭਰ 'ਚ ਐਪਲ ਸਟੋਰਾਂ ਦੇ ਬਾਹਰ ਗਾਹਕਾਂ ਦੀ ਭਾਰੀ ਭੀੜ ਇਕੱਠੀ ਹੋ ਗਈ। ਲੋਕ ਸਵੇਰ ਤੋਂ ਹੀ ਲੰਬੀਆਂ ਕਤਾਰਾਂ 'ਚ ਖੜ੍ਹੇ ਦੇਖੇ ਗਏ। ਨਵੇਂ ਆਈਫੋਨ ਖਰੀਦਣ ਦੀ ਤਿੱਖੀ ਮੁਕਾਬਲੇਬਾਜ਼ੀ ਦੇ ਵਿਚਕਾਰ, ਬਾਲੀਵੁੱਡ ਅਦਾਕਾਰ ਅਤੇ ਸਮਾਜਿਕ ਕਾਰਕੁਨ ਸੋਨੂੰ ਸੂਦ ਨੇ ਆਪਣੇ ਖਾਸ ਹਾਸੇ-ਮਜ਼ਾਕ ਅਤੇ ਗੰਭੀਰ ਅੰਦਾਜ਼ 'ਚ ਇਸ ਕ੍ਰੇਜ਼ 'ਤੇ ਚੁਟਕੀ ਲਈ, ਇਕ ਐਪਲ ਸਟੋਰ ਦੇ ਬਾਹਰ ਇਕੱਠੀ ਹੋਈ ਭੀੜ ਦੀ ਇਕ ਫੋਟੋ ਸੋਸ਼ਲ ਮੀਡੀਆ 'ਤੇ ਸਾਂਝੀ ਕੀਤੀ।

ਸੋਨੂੰ ਸੂਦ ਨੇ ਪੋਸਟ ਸਾਂਝੀ ਕਰਦੇ ਹੋਏ ਲਿਖਿਆ, "ਨਵਾਂ ਫੋਨ, ਨਵਾਂ EMI... ਉਹੀ ਪੁਰਾਣਾ ਬਿੱਲ! ਸ਼ਾਇਦ ਹੁਣ ਸਮਾਂ ਆ ਗਿਆ ਹੈ ਕਿ ਅਸੀਂ ਸਿਰਫ਼ ਆਪਣੇ ਫੋਨਾਂ ਨੂੰ ਅਪਗ੍ਰੇਡ ਕਰਨ ਲਈ ਹੀ ਨਹੀਂ, ਸਗੋਂ ਸਮਾਜਿਕ ਬਦਲਾਅ ਲਿਆਉਣ ਲਈ ਵੀ ਲਾਈਨਾਂ 'ਚ ਖੜ੍ਹੇ ਹੋਈਏ। ਅਸਲ ਅਪਗ੍ਰੇਡ ਇਕ ਬਿਹਤਰ ਸਮਾਜ ਦਾ ਨਿਰਮਾਣ ਹੈ।" ਉਨ੍ਹਾਂ ਦਾ ਇਹ ਮੈਸੇਜ ਸੋਸ਼ਲ ਮੀਡੀਆ 'ਤੇ ਵਾਇਰਲ ਹੋ ਰਿਹਾ ਹੈ, ਅਤੇ ਲੋਕ ਉਸਦੇ ਵਿਚਾਰ ਦੀ ਪ੍ਰਸ਼ੰਸਾ ਕਰ ਰਹੇ ਹਨ।

ਇਸ ਦੌਰਾਨ, ਬੀ-ਟਾਊਨ ਸਿਤਾਰਿਆਂ ਨੇ ਵੀ ਨਵੇਂ ਮਾਡਲ ਬਾਰੇ ਕਾਫ਼ੀ ਉਤਸ਼ਾਹ ਪ੍ਰਗਟ ਕੀਤਾ। ਬਾਲੀਵੁੱਡ ਅਦਾਕਾਰ ਵਿੱਕੀ ਕੌਸ਼ਲ ਸ਼ੁੱਕਰਵਾਰ ਨੂੰ ਮੁੰਬਈ ਦੇ ਬੀਕੇਸੀ 'ਚ ਐਪਲ ਸਟੋਰ ਦਾ ਦੌਰਾ ਕੀਤਾ, ਨਵਾਂ ਆਈਫੋਨ 18 ਪ੍ਰੋ ਖਰੀਦਣ ਵਾਲੇ ਪਹਿਲੇ ਬਾਲੀਵੁੱਡ ਸੈਲੀਬ੍ਰਿਟੀਜ਼ 'ਚ ਸ਼ਾਮਲ ਹੋਏ। ਵਿੱਕੀ ਕੌਸ਼ਲ ਨੂੰ ਉੱਥੇ ਮੌਜੂਦ ਪਾਪਰਾਜ਼ੀ ਕੈਮਰਿਆਂ ਦੇ ਸਾਹਮਣੇ ਆਪਣੇ ਹੱਥ 'ਚ ਨਵਾਂ ਫ਼ੋਨ ਫੜ ਕੇ ਮੁਸਕਰਾਉਂਦੇ ਅਤੇ ਸੈਲਫ਼ੀ ਲੈਂਦੇ ਦੇਖਿਆ ਗਿਆ।ਇਸ ਤੋਂ ਇਲਾਵਾ, ਫੋਨ ਲਈ ਵਿਆਪਕ ਖਪਤਕਾਰ ਉਤਸ਼ਾਹ ਵੀ ਸਪੱਸ਼ਟ ਸੀ। ਇਸ ਦੌਰਾਨ ਬੈਂਗਲੁਰੂ ਦੇ ਇਕ ਗਾਹਕ ਰਾਹੁਲ, ਜੋ ਸਵੇਰੇ 5 ਵਜੇ ਐਪਲ ਸਟੋਰ ਦੇ ਬਾਹਰ ਲਾਈਨ 'ਚ ਖੜ੍ਹਾ ਸੀ, ਨੇ ਕਿਹਾ, "ਮੈਂ ਆਈਫੋਨ 7 ਤੋਂ ਬਾਅਦ ਹਰ ਸਾਲ ਇਕ ਨਵਾਂ ਮਾਡਲ ਖਰੀਦ ਰਿਹਾ ਹਾਂ। ਮੇਰੇ ਲਈ, ਆਈਫੋਨ ਦੀ ਲਾਂਚਿੰਗ ਕਿਸੇ ਤਿਉਹਾਰ ਤੋਂ ਘੱਟ ਨਹੀਂ ਹੈ, ਅਤੇ ਦੇਸ਼ ਦੇ ਹਰ ਕੋਨੇ ਤੋਂ ਲੋਕ ਇਸਨੂੰ ਖਰੀਦਣ ਲਈ ਆਏ ਹਨ।"

ਤੁਹਾਨੂੰ ਇਹ ਦੱਸਣਾ ਜ਼ਰੂਰੀ ਹੈ ਕਿ ਨਵੀਂ ਆਈਫੋਨ 18 ਸੀਰੀਜ਼, ਜੋ ਕਿ 18 ਸਤੰਬਰ ਨੂੰ ਭਾਰਤ 'ਚ ਉਪਲਬਧ ਹੋਈ ਸੀ, ਕਾਲੇ, ਚਾਂਦੀ, ਗਲੇਸ਼ੀਅਰ ਅਤੇ ਇਕ ਨਵੇਂ ਬਰਗੰਡੀ ਰੰਗ ਵਿਕਲਪ 'ਚ ਆਉਂਦੀ ਹੈ। ਇਹ ਸੀਰੀਜ਼ ਐਪਲ ਦੇ ਸ਼ਕਤੀਸ਼ਾਲੀ A20 ਪ੍ਰੋ ਚਿੱਪਸੈੱਟ, ਵੈਪਰ ਚੈਂਬਰ ਕੂਲਿੰਗ ਅਤੇ ਇਕ 48MP ਫਿਊਜ਼ਨ ਮੁੱਖ ਕੈਮਰਾ (ਵੇਰੀਏਬਲ ਅਪਰਚਰ ਤਕਨਾਲੋਜੀ) ਨਾਲ ਲੈਸ ਹੈ। ਭਾਰਤੀ ਬਾਜ਼ਾਰ 'ਚ, ਆਈਫੋਨ 18 ਪ੍ਰੋ ਦੀ ਕੀਮਤ 256GB ਦੇ ਬੇਸ ਵੇਰੀਐਂਟ ਲਈ 1,64,900 ਰੁਪਏ ਤੋਂ ਸ਼ੁਰੂ ਹੁੰਦੀ ਹੈ, ਜੋ ਕਿ ਚੋਟੀ ਦੇ 2TB ਮਾਡਲ ਲਈ 3,14,900 ਰੁਪਏ ਤੱਕ ਜਾਂਦੀ ਹੈ। ਇਸ ਦੇ ਨਾਲ ਹੀ, ਆਈਫੋਨ 18 ਪ੍ਰੋ ਮੈਕਸ ਦੀ ਸ਼ੁਰੂਆਤੀ ਕੀਮਤ 1,79,900 ਰੁਪਏ ਹੈ, ਜਦੋਂ ਕਿ ਇਸਦਾ 2TB ਵੇਰੀਐਂਟ 3,29,900 ਰੁਪਏ 'ਚ ਉਪਲਬਧ ਕਰਵਾਇਆ ਗਿਆ ਹੈ।