ਨਵੀਂ ਦਿੱਲੀ ਪੈਰਾ ਐਥਲੈਟਿਕਸ ਚੈਂਪੀਅਨਸ਼ਿਪ 2025 ਦੀ ਬ੍ਰਾਂਡ ਅੰਬੈਸਡਰ ਬਣੀ ਕੰਗਨਾ ਰਣੌਤ

ਨਵੀਂ ਦਿੱਲੀ (ਏਜੰਸੀ)- ਭਾਰਤ ਦੀ ਪ੍ਰਸਿੱਧ ਅਦਾਕਾਰਾ ਤੇ ਸੰਸਦ ਮੈਂਬਰ ਕੰਗਨਾ ਰਣੌਤ ਨੂੰ ਨਵੀਂ ਦਿੱਲੀ ਵਿਸ਼ਵ ਪੈਰਾ ਐਥਲੈਟਿਕਸ ਚੈਂਪੀਅਨਸ਼ਿਪ 2025 ਲਈ ਬ੍ਰਾਂਡ ਅੰਬੈਸਡਰ ਨਿਯੁਕਤ ਕੀਤਾ ਗਿਆ ਹੈ। ਇਹ ਐਲਾਨ ਪੈਰਾਲੰਪਿਕ ਕਮੇਟੀ ਆਫ ਇੰਡੀਆ (PCI) ਵੱਲੋਂ ਕੀਤਾ ਗਿਆ ਹੈ। PCI ਵੱਲੋਂ ਜਾਰੀ ਬਿਆਨ ਅਨੁਸਾਰ, ਕੰਗਨਾ ਦੀ ਸ਼ਮੂਲੀਅਤ ਨਾਲ ਪੈਰਾ ਐਥਲੈਟਿਕਸ ਖੇਡਾਂ ਨੂੰ ਨਵੀਂ ਊਰਜਾ, ਚਰਚਾ ਅਤੇ ਨਵੇਂ ਸਿਰੇ ਤੋਂ ਫੋਕਸ ਮਿਲੇਗਾ।

ਕੰਗਨਾ ਰਣੌਤ ਨੇ ਆਪਣੀ ਇਸ ਨਵੀਂ ਭੂਮਿਕਾ 'ਤੇ ਕਿਹਾ: "ਭਾਰਤ ਦੇ ਪੈਰਾ ਖਿਡਾਰੀ ਹਰ ਰੋਜ਼ ਸੰਭਾਵਨਾਵਾਂ ਦੀ ਨਵੀਂ ਪਰਿਭਾਸ਼ਾ ਲਿਖ ਰਹੇ ਹਨ। ਮੈਂ ਉਨ੍ਹਾਂ ਦਾ ਸਮਰਥਨ ਕਰਨ ਅਤੇ ਉਨ੍ਹਾਂ ਦੀਆਂ ਸ਼ਾਨਦਾਰ ਉਪਲਬਧੀਆਂ ਬਾਰੇ ਜਾਗਰੂਕਤਾ ਵਧਾਉਣ ਵਿਚ ਮਦਦ ਕਰਨ ਲਈ ਬਹੁਤ ਸਨਮਾਨਿਤ ਮਹਿਸੂਸ ਕਰ ਰਹੀ ਹਾਂ। ਪੈਰਾ ਖੇਡ ਸਿਰਫ਼ ਮੁਕਾਬਲਾ ਨਹੀਂ, ਇਹ ਹਿੰਮਤ ਬਾਰੇ ਹੈ ਅਤੇ ਮੈਨੂੰ ਆਪਣੇ ਚੈਂਪੀਅਨਾਂ ਪਿੱਛੇ ਖੜ੍ਹੇ ਹੋਣ 'ਤੇ ਮਾਣ ਹੈ।"

PCI ਦੇ ਪ੍ਰਧਾਨ ਤੇ ਦੋ ਵਾਰ ਦੇ ਪੈਰਾਲੰਪਿਕ ਸੋਨ ਤਮਗਾ ਜੇਤੂ ਦੇਵੇਂਦਰ ਝਾਝਰੀਆ ਨੇ ਕਿਹਾ: "ਸਾਨੂੰ ਖੁਸ਼ੀ ਹੈ ਕਿ ਕੰਗਨਾ ਰਣੌਤ ਵਰਗੀ ਪ੍ਰਭਾਵਸ਼ਾਲੀ ਸ਼ਖ਼ਸੀਅਤ ਸਾਡੇ ਨਾਲ ਜੁੜੀ ਹੈ। ਉਨ੍ਹਾਂ ਦਾ ਜਨੂੰਨ ਅਤੇ ਖਿਡਾਰੀਆਂ ਪ੍ਰਤੀ ਸਮਰਪਣ ਉਨ੍ਹਾਂ ਨੂੰ ਬਹੁਤ ਹੀ ਯੋਗ ਬ੍ਰਾਂਡ ਅੰਬੈਸਡਰ ਬਣਾਉਂਦਾ ਹੈ।" ਚੈਂਪੀਅਨਸ਼ਿਪ 27 ਸਤੰਬਰ ਤੋਂ 5 ਅਕਤੂਬਰ 2025 ਤੱਕ ਨਵੀਂ ਦਿੱਲੀ ਦੇ ਜਵਾਹਰਲਾਲ ਨੇਹਰੂ ਸਟੇਡੀਅਮ ਵਿੱਚ ਆਯੋਜਿਤ ਹੋਵੇਗੀ। ਇਸ ਦੌਰਾਨ 100 ਤੋਂ ਵੱਧ ਦੇਸ਼ਾਂ ਦੇ 1,000 ਤੋਂ ਵੱਧ ਪੈਰਾ ਐਥਲੀਟਸ ਹਿੱਸਾ ਲੈਣਗੇ। ਇਹ ਮੁਕਾਬਲੇ ਦਾ 12ਵਾਂ ਐਡੀਸ਼ਨ ਹੋਵੇਗਾ ਅਤੇ ਭਾਰਤ ਵੱਲੋਂ ਹੋਸਟ ਕੀਤਾ ਗਿਆ ਸਭ ਤੋਂ ਵੱਡਾ ਪੈਰਾ-ਸਪੋਰਟ ਇਵੈਂਟ ਹੋਵੇਗਾ। PCI ਦਾ ਟੀਚਾ ਇਹ ਯਕੀਨੀ ਬਣਾਉਣਾ ਹੈ ਕਿ ਪੈਰਾ ਖੇਡਾਂ ਨੂੰ ਹਰ ਭਾਰਤੀ ਘਰ, ਸਕੂਲ ਅਤੇ ਦਿਲ ਤੱਕ ਪਹੁੰਚਾਇਆ ਜਾਵੇ।