ਚੰਗਾ ਦਿਖਣ ਤੋਂ ਜ਼ਿਆਦਾ ਜ਼ਰੂਰੀ ਹੈ ਚੰਗਾ ਮਹਿਸੂਸ ਕਰਨਾ : ਕੁਬਰਾ ਸੈਤ

ਮੁੰਬਈ- ਮਸ਼ਹੂਰ ਅਦਾਕਾਰਾ ਅਤੇ ਟੀਵੀ ਹੋਸਟ ਕੁਬਰਾ ਸੈਤ, ਜੋ ਆਪਣੀ ਬੇਬਾਕ ਰਾਏ ਲਈ ਜਾਣੀ ਜਾਂਦੀ ਹੈ, ਨੇ ਫਿਟਨੈੱਸ ਦੀ ਇੱਕ ਨਵੀਂ ਅਤੇ ਪ੍ਰਭਾਵਸ਼ਾਲੀ ਪਰਿਭਾਸ਼ਾ ਪੇਸ਼ ਕੀਤੀ ਹੈ। ਕੁਬਰਾ ਦਾ ਮੰਨਣਾ ਹੈ ਕਿ ਅੱਜ ਦੇ ਦੌਰ ਵਿੱਚ ਸਰੀਰਕ ਭਾਰ ਨਾਲੋਂ ਜ਼ਿਆਦਾ ਮਹੱਤਵ ਮਾਨਸਿਕ ਮਜ਼ਬੂਤੀ ਅਤੇ ਆਤਮ-ਜਾਗਰੂਕਤਾ ਦਾ ਹੈ। ਕੁਬਰਾ ਨੇ ਸਾਂਝਾ ਕੀਤਾ ਕਿ ਉਸ ਲਈ ਚੰਗਾ ਦਿਖਣ ਨਾਲੋਂ ਕਿਤੇ ਜ਼ਿਆਦਾ ਜ਼ਰੂਰੀ ਚੰਗਾ ਮਹਿਸੂਸ ਕਰਨਾ ਹੈ। ਉਨ੍ਹਾਂ ਅਨੁਸਾਰ, ਅਸਲ ਵੈਲਨੈੱਸ ਦੀ ਸ਼ੁਰੂਆਤ ਮਨ ਤੋਂ ਹੁੰਦੀ ਹੈ ਅਤੇ ਉਥੋਂ ਹੀ ਇਸ ਦਾ ਪ੍ਰਭਾਵ ਸਰੀਰ ਤੱਕ ਪਹੁੰਚਦਾ ਹੈ। ਅਦਾਕਾਰਾ ਨੇ ਦੱਸਿਆ ਕਿ ਕਿਵੇਂ ਥੈਰੇਪੀ ਅਤੇ ਇੱਕ ਅਨੁਸ਼ਾਸਿਤ ਜੀਵਨ ਨੇ ਉਨ੍ਹਾਂ ਨੂੰ ਅੱਜ ਦੇ ਤਣਾਅਪੂਰਨ ਦੌਰ ਵਿੱਚ ਸੰਤੁਲਿਤ ਰੱਖਣ ਵਿੱਚ ਅਹਿਮ ਭੂਮਿਕਾ ਨਿਭਾਈ ਹੈ।
ਅਜੋਕੀ ਫਿਟਨੈੱਸ ਸੰਸਕ੍ਰਿਤੀ 'ਤੇ ਚੁੱਕੇ ਸਵਾਲ
ਕੁਬਰਾ ਮੁਤਾਬਕ, ਆਧੁਨਿਕ ਫਿਟਨੈੱਸ ਸੱਭਿਆਚਾਰ ਦੀ ਸਭ ਤੋਂ ਵੱਡੀ ਸਮੱਸਿਆ ਇਹ ਹੈ ਕਿ ਲੋਕ ਸਿਰਫ਼ ਦਿਖਾਵੇ 'ਤੇ ਜ਼ੋਰ ਦਿੰਦੇ ਹਨ। ਉਹ ਕਹਿੰਦੀ ਹੈ ਕਿ ਅਸੀਂ ਅਕਸਰ ਫਿਟਨੈੱਸ ਟ੍ਰੈਂਡਸ ਦੇ ਚੱਕਰ ਵਿੱਚ ਇਹ ਭੁੱਲ ਜਾਂਦੇ ਹਾਂ ਕਿ ਹਰ ਸਰੀਰ ਵੱਖਰਾ ਹੁੰਦਾ ਹੈ। ਅਸੀਂ ਖੁਦ 'ਤੇ ਚੰਗਾ ਦਿਖਣ ਲਈ ਇੰਨਾ ਦਬਾਅ ਪਾਉਂਦੇ ਹਾਂ ਕਿ ਅਸੀਂ ਅਸਲ ਸਿਹਤ ਨੂੰ ਅੱਖੋਂ-ਓਹਲੇ ਕਰ ਦਿੰਦੇ ਹਾਂ।
ਤਣਾਅ ਅਤੇ ਸਰੀਰਕ ਸਿਹਤ ਦਾ ਸਬੰਧ
ਕੋਵਿਡ-19 ਦੇ ਦੌਰ ਨੂੰ ਆਪਣੀ ਜੀਵਨ ਯਾਤਰਾ ਦਾ ਅਹਿਮ ਮੋੜ ਦੱਸਦਿਆਂ ਕੁਬਰਾ ਨੇ ਖ਼ੁਲਾਸਾ ਕੀਤਾ ਕਿ ਉਨ੍ਹਾਂ ਨੇ ਸਮਝਿਆ ਕਿ ਕਿਵੇਂ ਦਿਮਾਗ ਦੁਆਰਾ ਨਿਯੰਤਰਿਤ ਰਸਾਇਣ ਜਿਵੇਂ ਡੋਪਾਮਿਨ, ਸੈਰੋਟੋਨਿਨ ਅਤੇ ਐਸਟ੍ਰੋਜਨ ਸਾਡੇ ਸਰੀਰ ਨੂੰ ਚਲਾਉਂਦੇ ਹਨ। ਉਨ੍ਹਾਂ ਚਿਤਾਵਨੀ ਦਿੱਤੀ ਕਿ ਤਣਾਅ ਸਿਰਫ਼ ਮਾਨਸਿਕ ਸਥਿਤੀ ਨਹੀਂ ਹੈ, ਸਗੋਂ ਇਹ ਸਰੀਰਕ ਸਿਹਤ ਨੂੰ ਸਿੱਧਾ ਪ੍ਰਭਾਵਿਤ ਕਰਦਾ ਹੈ।
ਖ਼ਾਸ ਨੁਕਤਾ: ਕੁਬਰਾ ਅਨੁਸਾਰ, ਜਦੋਂ ਤਣਾਅ ਕਾਰਨ ਸਰੀਰ ਵਿੱਚ ਕੌਟੀਸੋਲ ਦਾ ਪੱਧਰ ਵੱਧ ਜਾਂਦਾ ਹੈ, ਤਾਂ ਸਰੀਰ ਦਾ ਭਾਰ ਘਟਣਾ ਵੀ ਬੰਦ ਹੋ ਜਾਂਦਾ ਹੈ। ਜੇਕਰ ਮਨ ਮਜ਼ਬੂਤ ਨਹੀਂ ਹੈ, ਤਾਂ ਸਭ ਤੋਂ ਪਹਿਲਾਂ ਮਾੜਾ ਅਸਰ ਸਰੀਰ 'ਤੇ ਹੀ ਦੇਖਣ ਨੂੰ ਮਿਲਦਾ ਹੈ।